ဖွဲ့စည်းပုံအခြေခံဥပဒေ ပြင်ဆင်သည့် မူကြမ်းများသည် တစ်အုပ်လုံးကို အသစ်ရေးဆွဲသလို ဖြစ်နေသည့်အပြင် အရေးကြီးခြင်းနှင့် အရေးမကြီးခြင်းပါ ရောနှောနေသည့်အတွက် ကန့်ကွက်ရခြင်းဖြစ်ကြောင်း သမ္မတရုံးဝန်ကြီးဟောင်းဖြစ်သူ ကယားပြည်နယ် မဲဆန္ဒနယ်အမှတ်(၉)မှ အမျိုးသားလွှတ်တော်ကိုယ်စားလှယ် ဦးစိုးသိန်းက ဝေဖန်ပြောကြားသည်။
ဖေဖော်ဝါရီ ၂၆ ရက်က ပြုလုပ်သည့် ဒုတိယအကြိမ် ပြည်ထောင်စုလွှတ်တော် အစည်းအဝေးတွင် ဖွဲ့စည်းပုံအခြေခံဥပဒေကို ဒုတိယအကြိမ်ပြင်ဆင်သည့် ဥပဒေမူကြမ်းပါ ပုဒ်မ၊ မုဒ်မခွဲများအပေါ် လွှတ်တော်၌ ဆွေးနွေးရာတွင် ၎င်းက အထက်ပါအတိုင်း ဝေဖန်ဆွေးနွေးခဲ့ခြင်း ဖြစ်သည်။
“တွေ့ရတာက တစ်အုပ်လုံး အသစ်ရေးဆွဲသလို ဖြစ်နေပါတယ်။ အရေးကြီးတာရော၊ အရေးမကြီးတာရော ရောပြွန်းနေပါတယ်။ ဒီတော့ ကန့်ကွက်ရခြင်းဖြစ်ပါတယ်” ဟု ဦးစိုးသိန်းက ပြောကြားသည်။
လက်ရှိ လွှတ်တော်တွင် ဆွေးနွေးနေ သည့် ဖွဲ့စည်းပုံအခြေခံဥပဒေပြင်ဆင်ရေး မူကြမ်းများတွင် သမ္မတ၏ ဗီဒိုအာဏာ၊ အမျိုး သားလွှတ်တော်ဥက္ကဋ္ဌ၏ ဗီဒိုအာဏာ၊ ဖက် ဒရယ်အုပ်ချုပ်ရေး၊ ကိုယ်ပိုင်ပြဋ္ဌာန်းခွင့်၊ မြူနီ စပယ်အုပ်ချုပ်ရေး၊ သာသနာ့ဝန်ထမ်းမဲပေး ခွင့် စသည့်အချက်များ ပါဝင်လာခြင်းမရှိ ကြောင်း ၎င်းင်းက ဆိုသည်။
“ယခု ဥပဒေကြမ်းနှစ်ခုမှာ ဘယ်မှာလဲ သမ္မတရဲ့ Veto ၊ ဘယ်မှာလဲ အမတ်အရေအတွက်နည်းတဲ့ အမျိုးသားလွှတ်တော်ဥက္ကဋ္ဌရဲ့ Veto ၊ ဘယ်မှာလဲ ဖက်ဒရယ်အုပ်ချုပ်ရေး၊ ဘယ်မှာလဲ ကိုယ်ပိုင်ပြဋ္ဌာန်းခွင့်၊ ဘယ်မှာလဲ မြူနီစီပယ်အုပ်ချုပ်ရေး၊ ဘယ်မှာလဲ Resource Sharing ၊ ဘယ်မှာလဲ သာသနာ့ဝန်ထမ်းတွေ မဲပေးခွင့်၊ ဝန်ထမ်းကို ပါတီနိုင်ငံရေးကို လုပ်ခွင့်ပြုရင် ကြီးမားသောအကျိုးဆက် တွေ့ကြုံရမယ်ဆိုတာ စဉ်းစားသင့်တယ်” ဟု ဦးစိုးသိန်းက ပြောကြားသည်။
ထို့ပြင် ဖွဲ့စည်းပုံအခြေခံဥပဒေကို သုံးသပ်ပြင်ဆင်ခြင်းကို လက်ခံပြီး တိုင်းရင်းသားများ ဆန္ဒပြင်းပြနေသည့် ဖက်ဒရယ်ဒီမိုကရေစီအတွက်ဆိုပါက ယင်းနှင့်ပတ်သက်သည့် ပုဒ်မ မည်မျှပါသနည်းဆိုသည်ကို ဆန်းစစ်ကြည့်ရန်လိုကြောင်း ၎င်းက ထောက်ပြသည်။
“ကျွန်တော် ယခင်အစိုးရအဖွဲ့ရဲ့ ပြုပြင်ပြောင်းလဲရေး ဦးဆောင်ကော်မတီဝင်တစ်ဦးပါ။ ဒီခြေဥနဲ့ပဲ ပြုပြင်ပြောင်းလဲဖို့ လုပ်ခဲ့ပါတယ်။ နိုင်ငံရေးပြုပြင်ပြောင်းလဲမှု၊ လူမှုစီးပွား ပြုပြင်ပြောင်းလဲမှု၊ အုပ်ချုပ်ရေး ပြုပြင်ပြောင်း လဲမှု၊ ပုဂ္ဂလိကကဏ္ဍ ပြုပြင်ပြောင်းလဲမှုတွေကို အတိုင်းအတာတစ်ခုအထိ အကောင်အထည် ဖော်နိုင်ခဲ့ပါတယ်။ ဒီခြေဥအောက်မှာပဲ ၂၀၁၁-၂၀၁၆ ပထမသက်တမ်းကာလ နိုင်ငံတော်အခြေအနေကို လေ့လာနိုင်ပါတယ်” ဟု ဦးစိုးသိန်းက ဆိုသည်။
လက်ရှိ ဖွဲ့စည်းပုံအခြေခံဥပဒေအောက်တွင် ဒုတိယသက်တမ်း၌ အထိုက်အလျောက် တိုးတက်နေသည်ကိုတွေ့ရပြီး နိုင်ငံတော် အကြီးအကဲများအဖြစ် တာဝန်ပေးအပ်ရာတွင် ကိုးကွယ်သည့်ဘာသာ ကန့်သတ်ချက်ထားခြင်းမရှိသည်ကို မြင်နိုင်ကြောင်း ၎င်းက ဆက်လက်ပြောကြားသည်။
တပ်မတော်နှင့် ပြည်ခိုင်ဖြိုးပါတီက တင်သွင်းထားသည့် ဥပဒေကြမ်းငါးခုသည် ရှင်းသော်လည်း ဦးထွန်းထွန်းဟိန် တင်သွင်းသည့် ဥပဒေကြမ်းနှစ်ခုကို သုံးသပ်ပါက Package များဖြစ်နေကြောင်း၊ အချက်ပေါင်း ၃၇၆၅ ချက်တွင် ၁၁၄ ချက်ကို မည်သို့ ရွေးချယ်ဆုံးဖြတ်ခဲ့သည်နှင့် တိုင်းရင်းသားများ၏ ဆန္ဒ ပါ မပါဆိုသည်ကို ဦးစိုးသိန်းက မေးခွန်းထုတ်ခဲ့သည်။
ထိုသို့ ဦးစိုးသိန်း၏ ဆွေးနွေးချက်များနှင့်ပတ်သက်၍ NLD ပါတီ၏ ပြည်သူ့လွှတ်တော်ကိုယ်စားလှယ် ဦးမျိုးဇော်ဦးက မတ် တပ်ရပ်၍ ကန့်ကွက်ခဲ့သဖြင့် ပြည်ထောင်စု လွှတ်တော်နာယက ဦးတီခွန်မြတ်က လုံး ကောက်ပြန်စိစစ်ပြီး ဆောင်ရွက်ပေးမည်ဟု ပြောကြားသည်။
ပြည်ထောင်စု လွှတ်တော်နာယက၏ ပြောကြားမှုအပြီးတွင်း ဦးစိုးသိန်းက ဖြေရှင်းချက်ပေးရန် ကြိုးစားခဲ့သော်လည်း နာယက က မိုက်ပေးခဲ့ခြင်းမရှိပေ။
