ဘတ်ဂျက်ရေးဆွဲသူများ သို့မဟုတ် ဘတ်ဂျက်ရေးဆွဲရေးလုပ်ငန်းစဉ်တွင် ပါဝင်သူများအတွက် ဘတ်ဂျက်တို့၏ သဘောတရားများကို ကောင်းစွာသိရှိထားရန် အရေးကြီးသည်။ ယင်းသဘောတရားများသည် အဖွဲ့အစည်းတစ်ရပ်၏ ဘဏ္ဍာရေးဆိုင်ရာ ကျန်းမာရေး၌ လုံးဝကွဲပြားခြားနားသွားအောင် ပြုနိုင်သည်။ သင့်တော်ကောင်းမွန်သည့် ဘတ်ဂျက်ရေးဆွဲရေးလုပ်ငန်းစဉ် မဖြစ်ခြင်းသည် အဖွဲ့အစည်းများ သို့မဟုတ် ကုမ္ပဏီများ ကျဆုံးရခြင်း၏ အဓိကအကြောင်းရင်းတစ်ရပ် ဖြစ်သည်။
အကောင်းမြင်မထားဘဲ ကွန်ဆာဗေးတစ်ဖြစ်ပါ- ဘတ်ဂျက်နှင့်ပတ်သက်၍ ပထမဆုံးသော သဘောတရားမှာ အရာရာသည် မျှော်လင့်ထားသည့်အတိုင်း ဖြစ်လာလိမ့်မည်ဟူသော အခြေခံပေါ်မူတည်၍ ဘတ်ဂျက်ရေးဆွဲခြင်းကို ရှောင်ကြဉ်ရန်ဖြစ်သည်။ အကောင်းမြင်သည့် ကြိုတင်ခန့်မှန်းချက်များနှင့်ပတ်သက်၍ အလွန်သတိထားရန်လို၏။ မိမိ၏ ဝင်ငွေကို လျှော့တွက်ပြီး ကုန်ကျမည့်ငွေကို ပိုတွက်ခြင်းဆီသို့ ဦးတည်လျက် လုံခြုံရေးသဘောတရားတစ်ရပ် တည်ဆောက်ရန် ကြိုးပမ်းပါ။
အဖွဲ့အလိုက်လုပ်ဆောင်မှုနှင့် အကြံပြုမှု- ဘတ်ဂျက်ရေးဆွဲရာတွင် အရေးကြီးဆုံး သဘောတရားတစ်ရပ်မှာ အဖွဲ့အလိုက်လုပ်ဆောင်မှုနှင့် အကြံပြုမှုများ လိုအပ်ခြင်းဖြစ် သည်။ ဘတ်ဂျက်တစ်ခုလုံးအတွက် လုံးဝတာဝန်ရှိသူမှာ လူတစ်ဦးတည်းပင် ဖြစ်စေကာမူ လုပ်ငန်းစဉ်အားလုံးအတွက် တစ်ဦးတည်းက တာဝန်မယူသင့်ပေ။ ဘတ်ဂျက်ရေးဆွဲခြင်း တာဝန်ကို ပိုင်းခြားထားရမည်ဖြစ်ပြီး မည်ကဲ့သို့သော သုံးစွဲမှုက လိုအပ်ဖွယ်ရှိသနည်းဟူသည်ကို သိသူများနှင့် မည်ကဲ့သို့သောဝင်ငွေကို အကျိုးသင့်အကြောင်းသင့် မျှော်လင့်နိုင်သနည်းဟူသည်ကို သိသူများဟူ၍ ပိုင်းခြားရန်လိုသည်။ ဘတ်ဂျက်ရေးဆွဲရာ၌ လူများစွာ ပါဝင်ခြင်းသည် လုပ်ငန်းစဉ်ကို နှေးကွေးသွားစေနိုင်သော်လည်း ပို၍တိကျကာ ပို၍ယုံကြည်ရဖွယ် ဖြစ်စေနိုင်သည်။
အချိန်များများ ခွင့်ပြုပါ- ဘတ်ဂျက်ရေးဆွဲခြင်းသည် နာရီအနည်းငယ်အတွင်း ပြီးဆုံးနိုင်သည့် လုပ်ငန်းမဟုတ်ပါ။ ကောင်းမွန်သော ဘတ်ဂျက်တစ်ခုကို သီတင်းပတ်ပေါင်းများစွာ သို့မဟုတ် လအတန်ကြာ ရေးဆွဲရနိုင်သည်။ အချက်အလက်အသစ်များ ခေါင်းထဲပေါ်လာပါက ကိန်းဂဏန်းများကို အပြောင်းအလဲ ပြုလုပ်ရနိုင်သည်။ သုတေသနပြုမှုနှင့် တိုင်ပင်ဆွေးနွေးရမှုများစွာ လုပ်ဆောင်ရသောကြောင့် ဘတ်ဂျက်ရေးဆွဲရေး လုပ်ငန်းစဉ်သည် အချိန်များစွာ လိုအပ်နိုင်သည်။
အထောက်အထား ကောင်းမွန်ပါစေ- ဘတ်ဂျက်ရေးဆွဲသူများအနေဖြင့် ၎င်းတို့ ပြုလုပ်လိုက်သည့် အထောက်အထား စာရွက်စာတမ်းများအား အခြားသူတစ်ဦးအနေဖြင့် ကောင်းစွာဖတ်နိုင် နားလည်နိုင်ရန် အရေးကြီးသည်။ ဘတ်ဂျက်၌ ဖော်ပြထားမှုများ ရှင်းလင်းမှုမရှိခြင်းနှင့် ကိန်းဂဏန်းများအား ရှင်းရှင်းလင်းလင်း ညွှန်းဆိုဖော်ပြထားမှုမရှိခြင်းတို့က ကိန်းဂဏန်းများသည် မည်သည့်နေရာမှလာသနည်း သို့မဟုတ် မည်သို့မည်ပုံတွက် ချက်ထားသနည်းဟူသည်ကို နားလည်ရန် ခက်ခဲစေလိမ့်မည်။ ဘတ်ဂျက်များအား စီးပွားရေး သို့မဟုတ် ဘဏ္ဍာရေးဆိုင်ရာ ပညာရပ်နယ်ပယ်နှင့်ပတ်သက်၍ ကောင်းစွာသိရှိခြင်း မရှိသည့် လူအမျိုးမျိုး နားလည်နိုင်စေရမည်ကို သတိပြုရန်လိုသည်။
မည်သို့ပင်ဆိုစေကာမူ အဖွဲ့အစည်းများ သို့မဟုတ် ကုမ္ပဏီများ အောင်မြင်ခြင်း သို့မဟုတ် ကျဆုံးခြင်းသည် သင့်တော်ကောင်းမွန်သည့် ဘတ်ဂျက်ရေးဆွဲရေးလုပ်ငန်းစဉ်ပေါ်၌ များစွာမူတည်နေပါကြောင်း The Dialy Eleven သတင်းစာက ရေးသားအပ်ပါသည်။
(သြဂုတ် ၂၉ ရက်နေ့ထုတ် The Daily Eleven သတင်းစာ အယ်ဒီတာ အာဘေ်ာ)
