ဒုတိယအကြိမ် အမျိုးသားလွှတ်တော် အဋ္ဌမပုံမှန် အစည်းအဝေး ကာလအတွင်း ကြယ်ပွင့်ပြမေးခွန်း ၈၆ ခု၊ ကြယ်ပွင့်မပြမေးခွန်း ၁၂၄ ခု မေးမြန်းခဲ့ပြီး လွှတ်တော်ကိုယ်စားလှယ်က တင်သွင်းခဲ့သည့် အဆိုတစ်ခု အတည်ပြုခဲ့သည်။
အဋ္ဌမပုံမှန် အစည်းအဝေး ကာလတွင် လွှတ်တော်ကိုယ်စားလှယ် ဦးလှဆန်း တင်သွင်းခဲ့သည့် ပြည်ထောင်စုသမ္မတ မြန်မာနိုင်ငံ တစ်ဝန်းလုံးရှိ နိုင်ငံသူ နိုင်ငံသားများ ဘေးကင်းလုံခြုံသော စားနပ်ရိက္ခာများ ဖူလုံစွာ ရရှိစေရေးအတွက် ကျေးလက်နေ တောင်သူလယ်သမားများအား ပြည်ထောင်စုအစိုးရမှ အသိပညာ၊ နည်းပညာများ အထောက်အပံ့ အကူအညီပေးပြီး G.A.P စနစ် (Good Agriculture Practice) နည်းစနစ်ဖြင့် တစ်နိုင်ငံလုံး စိုက်ပျိုးထုတ်လုပ်နိုင်ရေး ဆောင်ရွက်ပေးရန် အဆိုအား ထောက်ခံသူများသည့်အတွက် အတည်ပြုခဲ့သည်။
ထို့ပြင် ဥပဒေကြမ်းများအနေဖြင့် မြန်မာနိုင်ငံ စာရင်းကောင်စီဥပဒေကို ပြင်ဆင်သည့် ဥပဒေကြမ်း၊ သိပ္ပံနည်းပညာနှင့် တီထွင်ဆန်းသစ်မှု ဥပဒေကြမ်း၊ နိုင်ငံ့ဝန်ထမ်းဥပဒေကို ဒုတိယအကြိမ် ပြင်ဆင်သည့် ဥပဒေကြမ်း၊ မြန်မာနိုင်ငံကြက်ခြေနီအသင်း ဥပဒေကို ပြင်ဆင်သည့် ဥပဒေကြမ်း၊ အဂတိလိုက်စားမှု တိုက်ဖျက်ရေးဥပဒေကို စတုတ္ထအကြိမ် ပြင်ဆင်သည့် ဥပဒေကြမ်း၊ မြေလွတ်၊ မြေလပ်နှင့်မြေရိုင်းများ စီမံခန့်ခွဲရေး ဥပဒေကို ပြင်ဆင်သည့် ဥပဒေကြမ်း၊ ပြည်သူ့လွှတ်တော်တွင် စတင်ဆွေးနွေးပြီး အမျိုးသားလွှတ်တော်သို့ ပေးပို့လာသည့် မြန်မာသမိုင်းအဖွဲ့ဥပဒေ ကြမ်း၊ သစ်တောဥပဒေကြမ်း၊ ရုပ်မြင် သံကြားနှင့်အသံထုတ်လွှင့်ခြင်းဆိုင်ရာ ဥပဒေကို ပြင်ဆင်သည့် ဥပဒေ ကြမ်း၊ ရုပ်မြင်သံကြားနှင့် ဗီဒီယိုဥပဒေကို ပြင်ဆင်သည့် ဥပဒေကြမ်း၊ တောင်သူလယ်သမား အခွင့်အရေး ကာကွယ်ရေးနှင့် အကျိုးစီးပွား မြှင့်တင်ရေး ဥပဒေကို ဒုတိယအကြိမ် ပြင်ဆင်သည့် ဥပဒေကြမ်း၊ မြန်မာနိုင်ငံ သွားနှင့်ခံတွင်းကောင်စီ ဥပဒေကြမ်း၊ အပြည်ပြည်ဆိုင်ရာ ထေရဝါဒဗုဒ္ဓ သာသနာပြု တက္ကသိုလ် ဥပဒေကြမ်း၊ မြန်မာနိုင်ငံ တိုင်းရင်းဆေးကောင်စီ ဥပဒေကြမ်းများကို လွှတ်တော်ကိုယ်စားလှယ်များ ဆွေးနွေးရန် ဆောင်ရွက်ခဲ့ကြောင်း အမျိုးသားလွှတ်တော် ဥက္ကဋ္ဌက ပြောကြားသည်။
အမျိုးသားလွှတ်တော် ပြည်တွင်းပြည်ပ အလုပ်သမားဆိုင်ရာ ကော်မတီဥက္ကဋ္ဌ တင်သွင်းခဲ့သည့် အလုပ်သမားရေးရာ အငြင်းပွားမှု ဖြေရှင်းရေး ဥပဒေကို ဒုတိယအကြိမ် ပြင်ဆင်သည့် ဥပဒေကြမ်းအား အမျိုးသား လွှတ်တော်တွင် အတည်ပြုပြီးနောက် ပြည်သူ့လွှတ်တော်သို့ ပေးပို့ခဲ့ကြောင်း၊ တောင်သူလယ်သမားရေးရာ ကော်မတီဥက္ကဋ္ဌ တင် သွင်းခဲ့သည့် ၂၀၁၇ ခုနှစ် မြေသိမ်း ဥပဒေကြမ်းကို လွှတ်တော်ကိုယ်စားလှယ်များ ဆွေးနွေးနိုင်ရန် အမည်စာရင်း တောင်းခံခြင်း၊ ပြည်သူ့လွှတ်တော်မှ ပြင်ဆင်ချက်များဖြင့် အတည်ပြုပြီး ပေးပို့လာသော စုပေါင်းပိုင်အဆောက်အအုံဆိုင်ရာ နည်းဥပဒေများကို လွှတ်တော်၏ အဆုံးအဖြတ်ရယူခြင်း၊ အမျိုးသားလွှတ်တော် အစိုးရ၏ အာမခံချက်များ၊ ကတိများနှင့် တာဝန်ခံချက်များ စိစစ်ရေးကော်မတီ၏ ဒုတိယအကြိမ် အမျိုးသားလွှတ်တော် သတ္တမပုံမှန် အစည်းအဝေး ကာလတွင် တင်သွင်းမေးမြန်းခဲ့သည့် အဆိုများ၊ မေးခွန်းများနှင့် စပ်လျဉ်းသည့် အစီရင်ခံစာ တင်သွင်းခြင်းနှင့် လွှတ်တော်၏ အတည်ပြုခြင်းများ ဆောင်ရွက်ခဲ့ကြောင်း သိရသည်။
အမျိုးသားလွှတ်တော် အစည်းအဝေးအား မေ ၁၄ ရက်တွင် စတင်ခဲ့ပြီး ဇွန် ၂၁ ရက်တွင် ရပ်နားခဲ့ပြီး အမျိုးသားလွှတ်တော် အစည်းအဝေးအား ၁၈ ရက် ကျင်းပခဲ့ခြင်းဖြစ်သည်။
