စစ်ကိုင်းတိုင်းဒေသကြီး လွှတ်တော်ဥက္ကဋ္ဌ ဦးသန်းက ပယ်မဲပါနေရခြင်းနှင့် ပတ်သတ်၍ လွှတ်တော်တွင် ပြောကြားနေစဉ်
စစ်ကိုင်းတိုင်းဒေသကြီး လွှတ်တော်တွင် အဆိုများနှင့်ပတ်သက်၍ ဆန္ဒမဲခံယူခြင်း၊ မဲခွဲဆုံးဖြတ်ခြင်း ပြုလုပ်ရာတွင် အမြဲတမ်းပယ်မဲတစ်မဲ ပါနေခြင်းသည် လွှတ်တော်ကို စော်ကားရာရောက်ကြောင်း စစ်ကိုင်းတိုင်းဒေသကြီး လွှတ်တော်ဥက္ကဋ္ဌ ဦးသန်းက ပြောကြားသည်။
ဇွန် ၁၁ ရက်က ကျင်းပသည့် ဒုတိယအကြိမ် စစ်ကိုင်းတိုင်းဒေသကြီး လွှတ်တော် (၁၄) ကြိမ်မြောက် ပုံမှန်အစည်းအဝေး ၁၅ ရက်မြောက်နေ့တွင် မုံရွာမြို့နယ်မဲဆန္ဒနယ် အမှတ် (၁) တိုင်းဒေသကြီး လွှတ်တော်ကိုယ်စားလှယ် ဒေါ်အမာကြည် တင်သွင်းခဲ့သည့် စစ်ကိုင်းတိုင်းဒေသကြီး အစိုးရအဖွဲ့၏ အလံ၊ အမှတ်အသားတံဆိပ်နှင့် ရင်ထိုးတံဆိပ်တို့အား သိသာထင်ရှား ကွဲလွဲပြတ်သားသော ဒီဇိုင်းပုံစံဖြင့် ပြင်ဆင်ပြောင်းလဲ သတ်မှတ်ပေးပါရန် တိုက်တွန်းကြောင်းအဆိုအား လွှတ်တော်၌ မဲခွဲဆုံးဖြတ်ရာ ပယ်မဲတစ်မဲ ပါရှိသဖြင့် တိုင်းလွှတ်တော်ဥက္ကဋ္ဌက ယင်းကဲ့သို့ ပြောကြားခဲ့ခြင်းဖြစ်သည်။
“အမြဲတမ်း ပယ်မဲတစ်မဲ ပါနေတာကို တွေ့ရပါတယ်။ ဒီပယ်မဲတစ်မဲဟာ ကျွန်တော်တို့ အစည်းအဝေးတိုင်းမှာ တွေ့နေရပါတယ်။ မဲမပေးတတ်လို့ ဆိုရင်တော့ ပြဿနာမဟုတ်ပါဘူး။ မဲပေးတတ်ရဲ့နဲ့ ပယ်မဲပေးနေတာဟာ တမင်ရည်ရွယ်ချက်နဲ့ လုပ်နေတယ်လို့ပဲ ကျွန်တော်တို့ နားလည်ပါတယ်။ ဒါကြောင့် ဒါဟာ ကျွန်တော်တို့ စစ်ကိုင်းတိုင်းဒေသကြီး လွှတ်တော်ကို စော်ကားရာရောက်ပါတယ်။ လွှတ်တော်ကိုယ်စားလှယ်တွေအနေနဲ့ ဆန္ဒမဲပေးတဲ့အခါမှာ မိမိရဲ့သဘောဆန္ဒကို သုံးခွင့်ရှိပါတယ်။ မဲပေးရမယ့် နေရာကလည်း ထောက်ခံမဲ၊ ကန့်ကွက်မဲ၊ ကြားနေမဲဆိုပြီးတော့ သုံးမျိုးရှိပါတယ်။ နောက်တစ်ခါ ဒါမျိုးမလုပ်ကြဖို့ ကျွန်တော့်အနေနဲ့ လွှတ်တော်ကိုယ်စားလှယ်တွေကို မေတ္တာရပ်ခံပါတယ်” ဟု စစ်ကိုင်းတိုင်းလွှတ်တော်ဥက္ကဋ္ဌ ဦးသန်းက ပြောကြားသည်။
စစ်ကိုင်းတိုင်းဒေသကြီး လွှတ်တော်တွင် မဲခွဲဆုံးဖြတ်တိုင်း အမြဲတမ်း ပယ်မဲတစ်မဲကနေ သုံးမဲအထိ ပါနေကြောင်း၊ ယင်းကဲ့သို့ ပယ်မဲများ ပါနေခြင်းသည် တိုင်းဒေသကြီး လွှတ်တော်ကို သိက္ခာကျအောင် လုပ်နေခြင်းဟု ထင်မြင်မိကြောင်း ကနီမြို့နယ် မဲဆန္ဒနယ်မြေ အမှတ်(၂) တိုင်းဒေသကြီး လွှတ်တော် ကိုယ်စားလှယ် ဦးထွန်းထွန်းဝင်းက သုံးသပ် ပြောကြားသည်။
စစ်ကိုင်းတိုင်းဒေသကြီး လွှတ်တော်တွင် အမျိုးသားဒီမိုကရေစီအဖွဲ့ချုပ်မှ လွှတ်တော် ကိုယ်စားလှယ် ၆၈ ဦး၊ တပ်မတော်သား လွှတ်တော်ကိုယ်စားလှယ် ၂၅ ဦး၊ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ လွှတ်တော်ကိုယ်စားလှယ်ငါးဦး၊ တိုင်းလိုင်(ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီမှ လွှတ်တော်ကိုယ်စားလှယ်နှစ်ဦး စုစုပေါင်း လွှတ်တော်ကိုယ်စားလှယ် ၁၀၀ ရှိသည်။
