နိုင်ငံရေး တည်ငြိမ်မှု မရှိချိန်တွင် တပ်မတော်သည် နိုင်ငံရေး အသုံးချခံ မဖြစ်ရန် လိုအပ်ကြောင်း တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ဧပြီ ၁၈ ရက်တွင် ပြင်ဦးလွင်တပ်နယ်၊ တပ်မတော် အုပ်ချုပ်မှုကျောင်း၌ တက်ရောက်လျက်ရှိသည့် ဥပဒေ (အရာရှိ) ဒီပလိုမာသင်တန်းမှ တပ်မတော် အရာရှိကြီးများအား တွေ့ဆုံ အမှာစကားပြောကြားရာတွင် ထည့်သွင်းပြောကြားခဲ့ခြင်း ဖြစ်ကြောင်း တပ်မတော်ကာကွယ်ရေးဦးစီးချုပ်ရုံး၏ ထုတ်ပြန်ချက်အရ သိရသည်။
တပ်မတော်သည် နိုင်ငံတော် ကာကွယ်ရေးတာဝန် ထမ်းဆောင်လျက်ရှိပြီး ပြည်သူလူထုကို စောင့်ရှောက်နေသည့် အဖွဲ့အစည်း၊ နိုင်ငံတကာနှင့် ဆက်ဆံ ဆောင်ရွက်နေသည့် အဖွဲ့အစည်းတစ်ခု ဖြစ်ကြောင်း၊ အထူးသဖြင့် နယ်စပ်ဒေသတွင် နှစ်နိုင်ငံ တပ်မတော် နှစ်ရပ် ဆက်ဆံရေးများရှိပြီး ရေပြင်ပိုင်နက်၊ မြေပြင်ပိုင်နက်များတွင် ပူးပေါင်းလေ့ကျင့်မှုများ ရှိကြောင်း၊ လိုအပ်ပါက ပူးပေါင်း တာဝန်ထမ်းဆောင်မှုများ ရှိနိုင်သဖြင့် တပ်မှူးများအနေဖြင့် နိုင်ငံတကာဥပဒေများကို သိရှိနေရန်၊ လက်အောက်ကို သိရှိ လိုက်နာအောင် ဦးဆောင်မှုပေးရန် လိုအပ်ကြောင်း တပ်မတော်ကာကွယ်ရေးဦးစီးချုပ်က ပြောကြားသည်။
ထို့ပြင် ယခုအချိန်တွင် ဒီမိုကရေစီ လမ်းကြောင်းပေါ် လျှောက်လှမ်းကြရာ၌ စစ်ဘက်၊ အရပ်ဘက် ဆက်ဆံရေးမှာ ပိုမိုအရေးကြီးလာသဖြင့် ဥပဒေများကို ပိုမိုသိရှိ နားလည်ရန် လိုအပ်ကြောင်း၊ မိမိတို့ နိုင်ငံတွင် ပြည်တွင်း လက်နက်ကိုင်ပဋိပက္ခများ ချုပ်ငြိမ်းမှု မရှိသေးခြင်း၊ နိုင်ငံရေးအရ တည်ငြိမ်မှု မရှိခြင်းတို့ကြောင့် ငြိမ်းချမ်းမှု ရှိအောင် ဆောင်ရွက်ရန်လိုပြီး နိုင်ငံရေး တည်ငြိမ်မှု မရှိချိန်တွင် မိမိတို့ တပ်မတော်သည် နိုင်ငံရေးအရ အသုံးချခံ မဖြစ်ရန်လိုကြောင်း၊ မိမိတို့ သွားနေသည့် လမ်းကြောင်းမှာ အမျိုးသားနိုင်ငံရေး ဖြစ်ကြောင်း၊ ထို့ကြောင့် အဆင့်အလိုက် တပ်မတော်အရာရှိများ အားလုံး ဖွဲ့စည်းပုံ အခြေခံဥပဒေကို သိရှိနားလည်ရန် လိုကြောင်း၊ စစ်ဘက် တရားစီရင်ရေးများ ဆောင်ရွက်ရာတွင် ဖြစ်စဉ် အကြောင်းအရာအလိုက် ပြစ်မှု၊ ပြစ်ဒဏ်များ ရှိကြောင်း၊ အုပ်ချုပ်ရေးနှင့် စစ်ဘက် တရားစီရင်ရေး စနစ်အရ တပ်မှူးများသည် ရှေ့နေ၊ တရားသူကြီး နှင့် အုပ်ချုပ်သူ စသည်ဖြင့် အသီးသီးသော တာဝန်များ ဆောင်ရွက်ရကြောင်း၊ အုပ်ချုပ်သူ အနေဖြင့် ဖခင်စိတ်ထား၊ တပ်မှူးစိတ်ထားဖြင့် ညီညွတ်မျှတစွာ ဆောင်ရွက်ရမည် ဖြစ်ပြီး တရားသူကြီး အနေဖြင့် ဆင်ခြင်တုံတရားဖြင့် တရားမျှတစွာ ဆောင်ရွက်ရမည် ဖြစ်ကြောင်း၊ ရှေ့နေ အနေဖြင့် မိမိလူအား အပြစ်မရှိပါက ပြစ်ဒဏ် မကျအောင်၊ အပြစ်ရှိပါက ထိုက်သင့်သည့် ပြစ်ဒဏ်သာ ကျခံစေရန် ဆောင်ရွက်ရကြောင်း၊ တပ်မှူးများ အနေဖြင့် လက်အောက်ငယ်သားများအား အုပ်ချုပ်ရာတွင် ဘက်လိုက်မှုမရှိဘဲ ညီညွတ်မျှတစွာ အုပ်ချုပ်ရမည် ဖြစ်ကြောင်း၊ ဥပဒေနှင့် ပတ်သက်လျှင် ပုဂ္ဂိုလ်စွဲ၊ ဆန္ဒစွဲ ကင်းစွာဖြင့် တရားမျှတစွာ ဆောင်ရွက်ရမည်ဖြစ်ကြောင်း တပ်မတော်ကာကွယ်ရေးဦးစီးချုပ် က ပြောကြားသည်။
တပ်မတော်တွင် စစ်မှုထမ်း ဥပဒေအရ ၁၈ နှစ် ပြည့်ပြီးမှသာ တစ်နည်းအားဖြင့် ဥပဒေအရ မဲပေးခွင့် ရှိသူများသာ တပ်မတော်အတွင်း တာဝန်ထမ်းဆောင်ခွင့် ရှိကြောင်း၊ ထို့ကြောင့် တရားဥပဒေကို မသိနားမလည်ဟု ဆိုပြီးချိုးဖောက်၍ မရသကဲ့သို့ ဥပဒေအထက်တွင် မည်သူမှ နေ၍မရကြောင်း၊ ဥပဒေ ချိုးဖောက်ပါက ဥပဒေအရ အရေးယူခံရမည် ဖြစ်ကြောင်း၊ ရခိုင်ပြည်နယ်၊ ဘူးသီးတောင်- မောင်တောဒေသ၊ အင်းဒင်ကျေးရွာတွင် ဖြစ်ပွားခဲ့သည့် ပြဿနာများအား ဂျီနီဗာကွန်ဗန်းရှင်းနှင့်အညီ တပ်မတော်မှ ဆောင်ရွက်ခဲ့ပြီး တစ်ဦးချင်း လိုက်နာမှု အားနည်းသည့် အရာရှိ၊ စစ်သည်များအား ဥပဒေနှင့်အညီ အရေးယူ ဆောင်ရွက်ခဲ့ရသည်များလည်း ရှိကြောင်း၊ ဘင်္ဂါလီ အကြမ်းဖက်သမားများက ၂၀၁၆ ခုနှစ် အောက်တိုဘာလတွင် လုံခြုံရေး ကင်းစခန်းများအား လူအင်အား များစွာဖြင့် လက်နက်ကိုင် အကြမ်းဖက် တိုက်ခိုက်ခြင်း၊ လက်နက်များ လုယူခြင်း၊ ဒေသခံ တိုင်းရင်းသားများနှင့် လုံခြုံရေး တပ်ဖွဲ့ဝင်များအား ရက်စက်စွာ သတ်ဖြတ်ခြင်းများအား ဥပဒေမဲ့ ကျူးလွန်ခဲ့ခြင်းကြောင့် တပ်မတော်က ဥပဒေနှင့်အညီ နယ်မြေရှင်းလင်းရေး ဆောင်ရွက်ခဲ့ရကြောင်း၊ ၂၀၁၇ ခုနှစ် သြဂုတ်လတွင် အလားတူ အကြမ်းဖက် တိုက်ခိုက်မှုများ ထပ်မံ လုပ်ဆောင်လာသဖြင့် ဥပဒေနှင့်အညီ နယ်မြေရှင်းလင်းနိုင်ခဲ့သဖြင့် ၎င်းတို့၏ ရည်ရွယ်ချက် မအောင်မြင်ခဲ့ကြောင်း၊ အကြမ်းဖက်သမားများ အနေဖြင့် လူအင်အား များစွာဖြင့် ဥပဒေမဲ့ ပြစ်မှုကျူးလွန်ခဲ့ခြင်းအပေါ် ပြစ်ဒဏ်ကျခံရမည်ကို စိုးရိမ်သဖြင့် ၎င်းတို့ကိုယ်တိုင်နှင့် မိသားစု၊ ဆွေမျိုး၊ ပတ်သက် ဆက်နွယ်သူများ အားလုံး တစ်ဖက်နိုင်ငံသို့ ထွက်ပြေး တိမ်းရှောင်သွားကြခြင်းသာ ဖြစ်ပြီး ဥပဒေအရ ပြစ်ဒဏ်ပေးခံရမည်ကို စိုးရိမ်ကာ ပြန်မလာရဲခြင်းကို ၎င်းတို့အပေါ် တပ်မတော်သားများက နှိပ်စက် အနိုင်ကျင့်မှုများကြောင့်ဟု နိုင်ငံတကာသိအောင် မဟုတ်မမှန် ပြောကြားခြင်းဖြင့် မိမိတို့အပေါ် အထင်အမြင်လွဲအောင် စွပ်စွဲပြောကြားလျက်ရှိကြောင်း ၎င်းကပြောကြားသည်။
