အီဂျစ်နိုင်ငံ ကိုင်ရိုမြို့တွင် ရခိုင်ပြည်နယ်၌ ဖြစ်ပွားနေသော အခြေအနေများကို သတင်းစာ၊ ရုပ်သံနှင့် ဆိုရှယ်မီဒီယာတို့မှ နေ့စဉ်လှုံ့ဆော် ဖော်ပြနေမှုကြောင့် မြန်မာသံရုံးလုံခြုံရေး စိုးရိမ်ရသည့် အနေအထား ဖြစ်ပေါ်လာကြောင်း အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးဌာန ပြည်ထောင်စုဝန်ကြီး ဦးကျော်တင်က ပြည်ထောင်စုလွှတ်တော်တွင် ပြောကြားသည်။
နိုင်ငံတော်သမ္မတထံမှ ပေးပို့ထားသော ၂၀၁၇ ခုနှစ် ပြည်ထောင်စု၏ ဘဏ္ဍာငွေ အရအသုံးဆိုင်ရာ ဥပဒေပါ အရေးပေါ် ရန်ပုံငွေမှ ကျပ် ၁၃၅၉၅ ဒသမ ၁၆၆ သန်း ခွဲဝေသုံးစွဲခဲ့ သည့် ကိစ္စရပ်များနှင့် ပတ်သက်ပြီး နေပြည်တော်၌ ဖေဖော်ဝါရီ ၁၃ ရက်က ပြုလုပ်သည့် ဒုတိယအကြိမ် ပြည်ထောင်စုလွှတ်တော် သတ္တမပုံမှန် အစည်းအဝေး သတ္တမနေ့တွင် အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးဌာန ပြည်ထောင်စုဝန်ကြီးက ရှင်းလင်းပြောကြားရာတွင် အထက်ပါအတိုင်း ပြောကြားခဲ့ခြင်းဖြစ်သည်။
“အီဂျစ်နိုင်ငံ ကိုင်ရိုမြို့မှာ ယခုကာလအတွင်း မြန်မာနိုင်ငံ ရခိုင်ပြည်နယ်တွင် ဖြစ်ပွားနေသော အခြေအနေများကို သတင်းစာ ရုပ်သံ၊ ဆိုရှယ်တို့မှနေ၍ နေ့စဉ်မပြတ် လှုံ့ဆော်ဖော်ပြနေမှုများကြောင့် မြန်မာသံရုံး အပေါ်မှာ အန္တရာယ်ပြုနိုင်မည့် အလားအလာများ၊ လုံခြုံရေးအရ စိုးရိမ်ရသည့် အနေအထားများြ ဖစ်ပေါ်လာကြောင်း မြန်မာသံအမတ်ကြီးက တင်ပြလာပါတယ်။ ကိုင်ရိုမြို့ မြန်မာသံရုံးမှာ သံအမတ်ကြီးနဲ့ အရာထမ်း အမှုထမ်းပေါင်း ခြောက်ဦးရှိပြီး မိသားစုအပါအဝင် လူဦးရေ ၁၁ ဦးရှိပါတယ်။ ဒါကြောင့်မို့ သံရုံးမိသားစုများ လုံခြုံရေးအတွက် အီဂျစ်နိုင်ငံခြားရေး ဝန်ကြီးဌာနကို ဆက်သွယ်ပြီးတော့ လုံခြုံရေး တိုးမြှင့်ကာကွယ်ပေးဖို့ရန် အတွက် မေတ္တာရပ်ခံခဲ့ပါတယ်” ဟု ပြည်ထောင်စုဝန်ကြီး ဦးကျော်တင်က ပြောကြားသည်။
ထိုသို့ မေတ္တာရပ်ခံချက်အရ လက်ရှိတာဝန်ချထားသည့် ရဲဝန်ထမ်းနှစ်ဦးအပြင် ဝန်ထမ်းတိုးမြှင့် တာဝန်ချထားပေးမည် ဖြစ်ကြောင်းနှင့် လိုအပ်မည့် လုံခြုံရေး အစီအမံများကို ဖြည့်ဆည်းဆောင်ရွက်ပေးရန် မြန်မာသံရုံးဘက်သို့ တောင်းဆိုလာခြင်းကြောင့် မြန်မာသံအမတ်ကြီး အနေဖြင့် အီဂျစ်ရဲတပ်ဖွဲ့မှ အကြံပြုထားသည့် လုံခြုံရေး အစီအမံများကို ဆောင်ရွက်ရန် တင်ပြလာကြောင်း အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးဌာန ပြည်ထောင်စုဝန်ကြီးက ဆိုသည်။
အဆိုပါ ကိုင်ရိုမြို့တွင် လုံခြုံရေးဆိုင်ရာ စီမံကိန်းများ မဖြစ်မနေ အကောင်အထည် ဖော်ရန်အတွက် သက်ဆိုင်ရာ ဘဏ္ဍာနှစ်အတွင်း ရန်ပုံငွေလျာထားခြင်း မရှိသည့်အတွက် အရေးပေါ်ရန်ပုံငွေမှ ကျခံသုံးစွဲရန် လျှောက်ထားခဲ့ခြင်းဖြစ်ပြီး နိုင်ငံခြားရေး ဝန်ကြီးဌာန၏ ငွေလုံးငွေရင်း အသုံးစရိတ်ဖြစ်သည့် ငွေကျပ် ၄၇ ဒသမ၂၄၄ သန်းအား ကိုင်ရိုမြို့တွင် ကျခံသုံးစွဲနိုင်ရေးအတွက် မှတ်တမ်းတင်ခွင့်ပြုရန် ပြည်ထောင်စု လွှတ်တော်သို့ တင်ပြခဲ့သည်။
