နှစ်သစ်တွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်လည်း ကိုယ်၏ ကျန်းမာခြင်း၊ စိတ်၏ ချမ်းသာခြင်းနှင့်အတူ စစ်မှန်သော ငြိမ်းချမ်းရေးရရှိရေး၊ ဖက်ဒရယ်ပြည်ထောင်စု တည်ဆောက်ရေးတို့အား လျင်မြန်သွက်လက်စွာ ဆက်လက် ဆောင်ရွက်နိုင်ပါစေကြောင်း ဆုမွန်ကောင်းတောင်းရင်း အကြောင်းပြန်ကြားအပ်ပါသည်ဟူ၍ တအာင်းလက်နက်ကိုင်အဖွဲ့ (PSLF/TNLA) က အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာနသို့ ဒီဇင်ဘာ ၂၄ ရက်တွင် စာပေးပို့ခဲ့သည်။
ပြည်ထောင်စုသမ္မတ မြန်မာနိုင်ငံတော် အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာနမှ ပေးပို့လာသော နိုင်ငံတော်၏ အတိုင်ပင်ခံပုဂ္ဂိုလ်၊ နိုင်ငံခြားရေးဝန်ကြီးဌာနဝန်ကြီး၊ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာနဥက္ကဋ္ဌ၏ နှစ်သစ်ကူးသဝဏ်လွှာအား PSLF/TNLA ဗဟိုဌာနချုပ်က ကောင်းမွန်စွာ လက်ခံရရှိပါကြောင်း၊ မိမိတို့ထံ နှစ်သစ်ကူူးသဝဏ်လွှာ ပေးပို့သည့်အတွက် အထူးကျေးဇူးတင်ရှိပါကြောင်း အကြောင်းပြန်ကြားစာတွင် ပါရှိသည်။
အမျိုးသား ပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန ဥက္ကဋ္ဌ၊ နိုင်ငံတော်၏ အတိုင်ပင်ခံပုဂ္ဂိုလ်က ပေးပို့သည့် နှစ်သစ်ကူးသဝဏ်လွှာအား ချစ်ကြည်ရင်းနှီးစွာ ပေးပို့အပ်ပါကြောင်း၊ နှစ်သစ်တွင် ပျော်ရွှင်စွာချမ်းမြေ့ပါစေကြောင်း ဆုမွန်ကောင်း တောင်းအပ်ပါသည်ဟူ၍ နိုင်ငံတော်အတိုင်ပင်ခံရုံးဝန်ကြီးဌာန ညွှန်ကြားရေးမှူးချုပ် ဦးဇော်ဌေးက တအာင်းလက်နက်ကိုင်အဖွဲ့ (PSLF/TNLA) နှင့် ကချင်လက်နက်ကိုင်အဖွဲ့ (KIO/KIA) သို့ ဒီဇင်ဘာ ၂၂ ရက်တွင် ပေးပို့ခဲ့သည်။
တအာင်းလက်နက်ကိုင်အဖွဲ့ (PSLF/TNLA) နှင့် ကချင်လက်နက်ကိုင်အဖွဲ့ (KIO/KIA) တို့သည် မြောက်ပိုင်း တိုင်းရင်းသားလက်နက်ကိုင် အဖွဲ့များဖြင့် ဖွဲ့စည်းထားသည့် ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ (FPNCC) တွင် အဖွဲ့ဝင်များအဖြစ် ပါဝင်ဆောင်ရွက်လျက် ရှိကြသည်။
FPNCC ကော်မတီတွင် “ဝ” သွေးစည်းညီညွတ်ရေးပါတီ (UWSP/SSA) ၊ ကချင်လက်နက်ကိုင်အဖွဲ့ (KIO/KIA) ၊ ရှမ်းပြည်တိုးတက်ရေးပါတီ (SSPP/SSA) ၊ ကိုးကန့်လက်နက်ကိုင်အဖွဲ့ (MNDAA) ၊ မိုင်းလားအဖွဲ့ (NDAA) ၊ တအာင်းလက်နက်ကိုင်အဖွဲ့ (PSLF/TNLA) ၊ ရခိုင်လက်နက်ကိုင်အဖွဲ့ (AA) တို့ ပါဝင်သည်။
အဆိုပါ မြောက်ပိုင်းတိုင်းရင်းသား လက်နက်ကိုင်အဖွဲ့များသည် NCA စာချုပ်အား လက်မခံဘဲ NCA စာချုပ်နှင့် အလားတူ အပစ်အခတ်ရပ်စဲရေး စာချုပ်တစ်စောင်အား အစိုးရထံ ပေးပို့ထားပြီး အစိုးရနှင့် တွေ့ဆုံဆွေးနွေးရာတွင် FPNCC ကော်မတီအနေဖြင့် တွေ့ဆုံမည်ဖြစ်ကြောင်း ကြေညာထားသော်လည်း အစိုးရဘက်က ယင်းကော်မတီအား အသိအမှတ်မပြုပေ။
