နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ ဂျပန်နိုင်ငံခရီးစဉ်အတွင်း ဒေါက်တာအေးမောင် အမြန်ဆုံးလွတ်မြောက်ရေး အပါအဝင် အချက်ခြောက်ချက်အား ရခိုင်လူငယ်များက အောက်တိုဘာ ၈ ရက်က ဂျပန်နိုင်ငံ တိုကျိုမြို့ မြန်မာသံရုံးရှေ့တွင် တောင်းဆိုဆန္ဒပြခဲ့ကြကြောင်း သိရသည်။

အဆိုပါ ဆန္ဒပြပွဲကို ရက္ခိုင်လူငယ်များ အစည်းအရုံး-ဂျပန် (Arakan Youths Union-Japan) က ဦးဆောင် ပြုလုပ်ခဲ့ခြင်းဖြစ်ပြီး ဆန္ဒပြရခြင်း အကြောင်းရင်းမှာ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် ပြည်ထောင်စုမြန်မာနိုင်ငံအစိုးရ အပါအဝင် ပြည်သူများ သိရှိစေရန်အတွက် ဖြစ်ကြောင်းလည်း သိရသည်။

ဆန္ဒပြပွဲတွင် တောင်းဆိုသည့်အချက်များမှာ ရခိုင်လူထုခေါင်းဆောင် ဒေါက်တာအေးမောင် လွတ်မြောက်ရေး၊ စာရေးဆရာ ဝေဟင်အောင် လွတ်မြောက်ရေး၊ မြောက်ဦး လူငယ်ရှစ်ဦးအား ထပ်မံတရားစွဲဆိုထားခြင်းကို ချက်ချင်းရပ်တန့်ပေးရေး၊ ပြည်ထောင်စုမြန်မာနိုင်ငံအတွင်း ရခိုင်လူမျိုးများ လွတ်လပ်စွာ သွားလာခွင့်နှင့် နေထိုင်ခွင့်များအား ပိတ်ပင်တားဆီးခြင်းကို ချက်ချင်းရပ်တန့်ပေးရေး၊ ကျောက်ဖြူမြို့နယ် မဒေးကျွန်းပင်လယ်ရေ ညစ်ညမ်းမှုကို အမြန်ဆုံး သန့်ရှင်းစစ်ဆေးပေးရေးနှင့် ရခိုင်နိုင်ငံရေးအကျဉ်းသားများ လွတ်မြောက်ရေးတို့ဖြစ်သည်။

ထို့ပြင် ဆန္ဒပြရခိုင်လူငယ်များသည် အထက်ပါ တောင်းဆိုချက် ခြောက်ချက်ပါ ပိုစတာများအပြင် NLD အစိုးရမှ ရခိုင်လူမျိုးများကို ဖိနှိပ်ခြင်းနှင့် ပြဿနာများ ဖန်တီးနေမှုများ ချက်ချင်းရပ်တန့်ပေးရန် စာတမ်းပိုစတာနှင့် ဒေါက်တာအေးမောင်၊ စာရေးဆရာ ဝေဟင်အောင်တို့၏ ပုံများကိုလည်း ကိုင်ဆောင်ဆန္ဒပြခဲ့ကြသည်။

ရက္ခိုင်လူငယ်များအစည်းအရုံး-ဂျပန် ဥက္ကဋ္ဌ ဦးစိုးနိုင်က “ဒေါ်အောင်ဆန်းစုကြည် ဂျပန်ကိုလာတဲ့အချိန် ကျွန်တော်တို့ အခုလို ဆန္ဒပြတာဟာ ကျွန်တော်တို့ ရခိုင်လူမျိုးတွေရဲ့ ဖိနှိပ်ချုပ်ချယ်ခံနေရမှုတွေကို ဒေါ်အောင်ဆန်းစုကြည် အပါအဝင် တစ်ကမ္ဘာလုံးက သိစေချင်တဲ့အတွက် ဖြစ်ပါတယ်။ ပြီးတော့ ကျွန်တော်တို့ လေးစားရတဲ့ ဒေါက်တာအေးမောင်နဲ့ စာရေးဆရာဝေဟင်အောင် လွတ်မြောက်ဖို့နဲ့ မြောက်ဦးက လူငယ်ရှစ်ဦးကို ပြန်လည်လွှတ်ပေးဖို့ တောင်းဆိုတာ ဖြစ်ပါတယ်” ဟု ပြောကြားသည်။

ဒေါက်တာအေးမောင်နှင့် စာရေးဆရာ ဝေဟင်အောင် လွတ်မြောက်ရေးအတွက် တောင်းဆိုမှုများကို ရက္ခိုင်လူငယ်များအစည်းအရုံး-ဂျပန်  (Arakan Youths Union-Japan) အနေဖြင့် စက်တင်ဘာလအတွင်းကလည်း ပြုလုပ်ခဲ့ကြောင်း သိရသည်။

ဂျပန်နိုင်ငံသို့ အလုပ်သဘော ခရီးရောက်ရှိနေသော နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် အောက်တိုဘာ ၈ ရက်က ဂျပန်လုပ်ငန်းရှင်များနှင့် တွေ့ဆုံပွဲတစ်ခုသို့ တက်ရောက်ခဲ့ကြောင်း  နိုင်ငံတကာ သတင်းဖော်ပြချက်များအရ သိရသည်။

ထို့ပြင် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် တိုကျိုမြို့ရှိ New Otani ဟိုတယ်၌ အောက်တိုဘာ ၈ ရက် ဒေသစံတော်ချိန် နံနက် ၉ နာရီခွဲတွင် Komeito ပါတီ၏ Chief Representative ဖြစ်သူ Mr.Yamaguchi Natsuo အားလည်းကောင်း၊ နံနက် ၁၀ နာရီတွင် မြန်မာနိုင်ငံ၏ အမျိုးသားပြန်လည်သင့်မြတ်ရေးဆိုင်ရာ ဂျပန်နိုင်ငံအစိုးရ၏ အထူးကိုယ်စားလှယ်ဖြစ်သူ Mr.Yohei Sasakawa အားလည်းကောင်း လက်ခံတွေ့ဆုံခဲ့ကြောင်း နိုင်ငံခြားရေးဝန်ကြီးဌာနက သတင်းထုတ်ပြန်သည်။

ထို့အတူ နိုင်ငံတော်၏အတိုင်ပင်ခံပုဂ္ဂိုလ်သည် အောက်တိုဘာ ၇ ရက်ကလည်း ဖူကူရှိမားခရိုင် အီဇုမိဇကိကျေးရွာရှိ ‘Kokoron’ လုပ်ငန်းစုသို့ သွားရောက် လေ့လာခဲ့ကြောင်း သတင်းထုတ်ပြန်ထားချက်အရ သိရသည်။

အီဇုမိဇကိကျေးရွာရှိ ‘Kokoron’ လုပ်ငန်းစုတွင် နိုင်ငံတော်၏အတိုင်ပင်ခံပုဂ္ဂိုလ်အား ဖူကူရှိမားခရိုင် ဒုတိယအုပ်ချုပ်ရေးမှူး မစ္စတာမာဆာကီဆူဇူကီနှင့် လယ်ယာစိုက်ပျိုးရေး၊ သစ်တောနှင့် ငါးလုပ်ငန်းဝန်ကြီးဌာန ညွှန်ကြားရေးမှူးချုပ် မစ္စတာယိုရှီနိုရိဆူဇူကီတို့က ကြိုဆိုနှုတ်ဆက်ခဲ့ကြပြီး တာဝန်ရှိသူများက ငလျင်ဘေးဒဏ်သင့်ပြီးနောက်ပိုင်း ဒေသတွင်း ပြန်လည်တည်ဆောက်ရေးလုပ်ငန်းများ ဆောင်ရွက်ခဲ့မှု အခြေအနေများကို လည်းကောင်း၊ အီဇုမိဇကိကျေးရွာနှင့် စပ်လျဉ်းသည့် အခြေအနေများကိုလည်းကောင်း၊ ‘Kokoron’ လုပ်ငန်းစု၏ ဖွဲ့စည်းမှု၊ လုပ်ငန်းဆောင်ရွက်နေမှု အခြေအနေများနှင့် ‘Kokoron’ လုပ်ငန်းစုနှင့် ချိတ်ဆက်ဆောင်ရွက်လျက်ရှိသော အဖွဲ့အစည်းများ အခြေအနေကိုလည်းကောင်း ရှင်းလင်းတင်ပြခဲ့ကြကာ မြန်မာကိုယ်စားလှယ်အဖွဲ့ဝင်များက သိလိုသည်များကို ပြန်လည်မေးမြန်းခဲ့ကြောင်း သိရသည်။ ထို့နောက် နိုင်ငံတော်၏အတိုင်ပင်ခံပုဂ္ဂိုလ်နှင့် ကိုယ်စားလှယ်အဖွဲ့ဝင်များသည် ‘Kokoron’ လုပ်ငန်းစု၏ စိုက်ခင်းများကို သွားရောက် လေ့လာခဲ့ကြောင်း သိရသည်။