ရခိုင်ရိုးမတောင်တန်း တစ်နေရာကို တွေ့ရစဉ်

ဗြိတိန်နိုင်ငံက ရန်ကုန်တိုင်းဒေသကြီးနှင့် ပဲခူးတိုင်းဒေသကြီး အတွင်းရှိ ကြိုးဝိုင်းများတွင် ဖက်စပ်ရင်းနှီးမြှုပ်နှံမှုဖြင့် ပုဂ္ဂလိက ကျွန်းစိုက်ခင်း တည်ထောင်ထုတ်လုပ် ရောင်းချခြင်း လုပ်ငန်းကို ဒေါ်လာ ၁၁၅ သန်း မြှုပ်နှံလုပ်ကိုင်မည်ဖြစ်ကြောင်း ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာနမှ သိရသည်။

ရန်ကုန်တိုင်းဒေသကြီး၊ တိုက်ကြီးမြို့နယ်၊ ဥက္ကံကြိုးဝိုင်း၊ အကွက်အမှတ် ၃၈၊ ၃၉၊ ၄၀၊ ၄၁၊ ပဲခူးတိုင်းဒေသကြီး (အနောက်ပိုင်း)၊ သာယာဝတီမြို့နယ်၊ သုံးဆယ်ကြိုးဝိုင်း၊ အကွက်အမှတ် ၆၄၊ ၆၅၊ ၆၆၊ ၆၇၊ ၆၈၊ ၆၉၊ ၇၄၊ ၇၁ (ပိုင်း) တို့တွင် ဗြိတိန်နိုင်ငံက Global Agriculture Joint Venture Co.,Ltd အမည်ဖြင့် ဖက်စပ်ရင်းနှီးမြှုပ်နှံပြီး လုပ်ကိုင်မည်ဟု သိရသည်။

အစိုးရသစ်လက်ထက်တွင် သစ်တောသယံဇာတ အရင်းအမြစ်များ ရေရှည်တည်တံ့စေရေးနှင့် သစ်တောဖုံးလွှမ်းမှု ကောင်းမွန်လာစေရေး၊ ရာသီဥတုပြောင်းလဲမှု လျှော့ချရေးဆိုင်ရာ နိုင်ငံတကာ ကတိကဝတ်များအား ဖြည့်ဆည်းနိုင်ရန်အတွက် သယံဇာတနှင့် သဘာဝပတ်ဝန်းကျင် ထိန်းသိမ်းရေး ဝန်ကြီးဌာန အနေဖြင့် သိသာထင်ရှားသည့် ပြောင်းလဲမှုများ အနေဖြင့် ၂၀၁၆-၂၀၁၇ ဘဏ္ဍာနှစ်တွင် သစ်ထုတ်လုပ်ခြင်းကို ရပ်ဆိုင်းခဲ့ကြောင်း၊ ပဲခူးရိုးမအား ကျွန်းနှင့် သစ်မာ ထုတ်လုပ်ခြင်းကို ၁၀ နှစ်တာ ရပ်နားခဲ့ကြောင်း၊ မကွေးတိုင်းဒေသကြီး အပါအဝင် တိုင်းဒေသကြီးနှင့် ပြည်နယ်အလိုက် သစ်တောပြုန်းတီးမှု၊ တောနိမ့်တောပျက် ဧရိယာနှင့် ရွက်အုပ်ပွင့် တောများအပေါ် အခြေခံပြီး သစ်တောစိုက်ခင်းများ တည်ထောင်ခြင်းနှင့် သဘာဝတောများ ပြုစုထိန်းသိမ်း စောင့်ရှောက်ခြင်း လုပ်ငန်းများပါဝင်သည့် မြန်မာနိုင်ငံ သစ်တောများ ပြန်လည်တည်ထောင်ခြင်း စီမံကိန်းကို ၂၀၁၇- ၂၀၁၈ ခု နှစ်မှ ၂၀၂၆-၂၀၂၇ ခုနှစ်အထိ ၁၀ နှစ်တာ ကာလအတွင်း ငါးနှစ်ကာလ နှစ်ခုခွဲခြားပြီး အကောင်အထည်ဖော် ဆောင်ရွက်လျက်ရှိကြောင်း သယံဇာတနှင့် သဘာဝပတ်ဝန်းကျင် ထိန်းသိမ်းရေး ဝန်ကြီးဌာန ပြည်ထောင်စုဝန်ကြီး ဦးအုန်းဝင်းက ပြောကြားခဲ့သည်။

၂၀၁၇-၂၀၁၈ ဘဏ္ဍာနှစ်အတွင်း မြန်မာနိုင်ငံ၏ လယ်ယာကဏ္ဍတွင် ရင်းနှီးမြှုပ်နှံမှုပမာဏ ဒေါ်လာသန်း ၁၃၀ ဝင်ရောက်ထားပြီး ဗြိတိန်နိုင်ငံက ဖက်စပ်ရင်းနှီးမြှုပ်နှံမှုဖြင့် ပုဂ္ဂလိက ကျွန်းစိုက်ခင်း တည်ထောင်ထုတ်လုပ် ရောင်းချခြင်း လုပ်ငန်းကို ဒေါ်လာ  ၁၁၅ ဖြင့် အများဆုံး ဝင်ရောက်လုပ်ကိုင်မည် ဖြစ်ကြောင်း ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာနမှ သိရသည်။

“ဒီနှစ်ထဲမှာ လယ်ယာကဏ္ဍမှာ လေးခုရှိတယ်။ လေးခုက စုစုပေါင်း ရင်းနှီးမြှုပ်နှံမှုပမာဏ ဒေါ်လာသန်း ၁၃၀ ရှိတယ်။ အဲဒီအထဲ မှာ ယူကေက ၁၁၅ သန်းနဲ့ အများဆုံး မြှုပ်နှံထားပါတယ်” ဟု ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာနမှ တာဝန်ရှိသူ တစ်ဦးက ပြောကြားခဲ့သည်။