၂၀၁၇-၂၀၁၈ ဘဏ္ဍာနှစ်တွင် ပို့ကုန်တန်ဖိုး အမေရိကန်ဒေါ်လာ ၁၅ လီလျံရှိ၍ ယမန်နှစ်ထက် တိုးလာပြီး ကုန်သွယ်မှုလိုငွေသည် ၂၀၁၆-၂၀၁၇ ဘဏ္ဍာနှစ်ထက် ကျဆင်းခဲ့ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန ကိုယ်စား စက်မှုဝန်ကြီးဌာန၊ ပြည်ထောင်စုဝန်ကြီး ဦးခင်မောင်ချိုက ပြောကြားသည်။
နေပြည်တော်၌ စက်တင်ဘာ ၁၀ ရက်က ပြုလုပ်သော ဒုတိယအကြိမ် ပြည်ထောင်စု လွှတ်တော် နဝမပုံမှန် အစည်းအဝေး ၁၉ ရက်မြောက်တွင် ပြည်ထောင်စု စာရင်းစစ်ချုပ်ရုံး၏၂၀၁၆-၂၀၁၇ ဘဏ္ဍာရေးနှစ် စစ်ဆေးတွေ့ရှိချက် အစီရင်ခံစာအပေါ် ပြည်သူ့ ငွေစာရင်း ပူးပေါင်းကော်မတီ၏ လေ့လာတွေ့ရှိချက်နှင့် သဘောထားမှတ်ချက် အစီရင်ခံစာ အမှတ်စဉ် (၇/၂၀၁၈) နှင့် လွှတ်တော် ကိုယ်စားလှယ်များ၏ ဆွေးနွေးချက်များအပေါ် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနကိုယ်စား စက်မှုဝန်ကြီးဌာန ပြည်ထောင်စုဝန်ကြီး ဦးခင်မောင်ချိုက ရှင်းလင်း ပြောကြားရာတွင် အထက်ပါအတိုင်း ပြောကြားခဲ့ခြင်း ဖြစ်သည်။
“ပို့ကုန် အမယ်တွေကို ပိုမို တိုးချဲ့ခြင်း၊ တင်ပို့တဲ့ နိုင်ငံတွေကို တိုးချဲ့ခြင်း၊ တင်ပို့တဲ့ ပမာဏကို တိုးချဲ့ခြင်းတို့ဖြင့် ပို့ကုန်တိုးမြှင့်ရေးကို ဆောင်ရွက်သွားမှာ ဖြစ်ပါတယ်။ ဒီလို ဆောင်ရွက်ခဲ့တဲ့အတွက် ၂၀၁၆-၂၀၁၇ ဘဏ္ဍာနှစ်မှာ မြန်မာနိုင်ငံရဲ့ ပို့ကုန်တန်ဖိုးဟာ အမေရိကန် ဒေါ်လာ ၁၂ ဘီလျံ ရှိခဲ့ပေမယ့် ၂၀၁၇-၂၀၁၈ ဘဏ္ဍာနှစ်မှာ ပို့ကုန်အမေရိကန် ဒေါ်လာ ၁၅ ဘီလျံသို့ တိုးလာပြီး ကုန်သွယ်မှုလိုငွေဟာ ၂၀၁၆-၂၀၁၇ ဘဏ္ဍာနှစ်မှာ အမေရိကန် ဒေါ်လာ ၅ ဒသမ ၂ ဘီလျံကနေ၂၀၁၇- ၂၀၁၈ ဘဏ္ဍာနှစ်မှာ အမေရိကန် ဒေါ်လာ ၃ ဒသမ ၈ ဘီလျံသို့ ကျဆင်းခဲ့ပါကြောင်းကိုလည်း တင်ပြလိုပါတယ်” ဟု စက်မှုဝန်ကြီးက ပြောကြားသည်။
၂၀၁၁ ခုနှစ်မှ စတင်ခဲ့သည့် ပြုပြင်ပြောင်းလဲမှုများနှင့်အတူ ကုန်သွယ်မှုဆိုင်ရာ ဖြေလျော့ ပြုပြင်ပြောင်းလဲမှုများ ပြုလုပ်ခြင်း၊ မြန်မာနိုင်ငံတော် ဗဟိုဘဏ်မှ နိုင်ငံခြားငွေ လွတ်လပ်စွာ စီးဆင်းခွင့်ပြု၍ ပို့ကုန်တင်ပို့မှ တင်သွင်းနိုင်သည့် စနစ်ကို ပယ်ဖျက်ခဲ့ခြင်း၊ နိုင်ငံတော်၏ တည်ဆောက်ရေး လုပ်ငန်းများအတွက် ရင်းနှီးမြှုပ်နှံမှုနှင့် လုပ်ငန်းသုံးပစ္စည်းများ၊ စက်ယန္တရားများ ပိုမိုတင်သွင်းခဲ့ခြင်း၊ အထူးစီးပွားရေးဇုန် စီမံကိန်းများ အကောင်အထည်ဖော် ဆောင်ရွက်ခြင်း၊ နိုင်ငံခြား ရင်းနှီးမြှုပ်နှံမှုများအတွက် တင်သွင်းမှုများနှင့် ပုဂ္ဂလိကကဏ္ဍ ဖွံ့ဖြိုးတိုးတက်စေရေးအတွက် လွတ်လပ်စွာ တင်သွင်းခွင့်ပြုမှုများအရ သွင်းကုန်တင်သွင်းမှု ပိုမိုလာပြီး ပို့ကုန်နှင့် သွင်းကုန်တိုးတက်မှု အချိုးမညီမျှဘဲ ၂၀၁၂-၂၀၁၃ ဘဏ္ဍာနှစ်မှစ၍ ကုန်သွယ်မှု လိုငွေများ ဖြစ်ပေါ်ခဲ့ကြောင်း ၎င်းက ပြောကြားသည်။
ထို့ပြင် နိုင်ငံတော် တည်ဆောက်ဆဲ ကာလဖြစ်သည့်အတွက် နိုင်ငံတကာမှ ရင်းနှီးမြှုပ်နှံသူများကို ဖိတ်ခေါ်နေသည့် ကာလဖြစ်ပြီး ဝင်ရောက်လာသည့် နိုင်ငံခြား ရင်းနှီးမြှုပ်နှံမှုများမှ လိုအပ်သည့် ကုန်ပစ္စည်းများ တင်သွင်းမှု များပြားနေခြင်းကြောင့် သွင်းကုန်တိုးချဲ့ တင်သွင်းမှုသည်လည်း အခြားသော ဖွံ့ဖြိုးဆဲနိုင်ငံများကဲ့သို့ မဖြစ်မနေ ဆက်လက် ဖြစ်ပေါ်နေမည်ဟု သုံးသပ်ရကြောင်း၊ အထူးစီးပွားရေးဇုန်များသည် ပို့ကုန်တိုးချဲ့ တင်ပို့ နိုင်သလို သွင်းကုန်များကိုလည်း အစားထိုးနိုင်သည်ကို တွေ့ရကြောင်း စက်မှုဝန်ကြီးဌာန ပြည်ထောင်စုဝန်ကြီး ဦးခင်မောင်ချိုက ပြောကြားသည်။
ဆက်လက်ပြီး စက်မှုဝန်ကြီးက ကုန်သွယ်မှု သာမန်စာရင်းအပိုင်းတွင် ကုန်စည်များသာမက ဝန်ဆောင်မှုအပိုင်းသည်လည်း ပါဝင်နေခြင်းကြောင့် နိုင်ငံတော် ဝင်ငွေရရှိသည့် ဝန်ဆောင်မှုလုပ်ငန်းများ ဖြစ်သော ခရီးသွားလုပ်ငန်း၊ လေယာဉ်ဖြတ်သန်းခ၊ လေဆိပ်ရပ်နားခ၊ လေယာဉ်ဆီဖြည့်ခ၊ သင်္ဘောဆိပ်ကမ်း ရပ်နားခ၊ သင်္ဘောဆိပ်ကမ်းများအတွက် ဝင်ထွက်မှုဆိုင်ရာ အခွန်အခများ၊ လေယာဉ်လိုင်းများမှ ပြည်တွင်းပြည်ပ နိုင်ငံခြားသား ခရီးသွားများအတွက် ရရှိမည့် လေယာဉ်ခများ၊ ပြည်ပ အလုပ်အကိုင်များမှ ရရှိမည့် ဝင်ငွေများ စသည်တို့ကို ထည့်သွင်း တွက်ချက်ပါက ကုန်သွယ်မှုလိုငွေကို ပိုမို လျော့ကျစေမည် ဖြစ်ကြောင်း ပြောကြားသည်။
