ဥရောပသမဂ္ဂသည် မြန်မာနိုင်ငံအပေါ် ချမှတ်ထားသော လက်နက်ရောင်းချမှု တားဆီးပိတ်ပင်ခြင်းကို နောက်ထပ်တစ်နှစ်သက် တမ်းထပ်တိုးလိုက်ကြောင်း ဧပြီ ၂၆ ရက်က ထုတ်ပြန်ခဲ့ပြီး မြန်မာ့တပ်မတော်အရာရှိများကိုလည်း တစ်ဦးချင်း ပိတ်ဆို့တားမြစ်မှုများ ချမှတ်ရန် ပြင်ဆင်နေကြောင်း Reuters သတင်းတွင် ဖော်ပြခဲ့သည်။

ဥရောပသမဂ္ဂအနေဖြင့် မြန်မာနိုင်ငံအပေါ် ချမှတ်ထားသော လက်နက်တားဆီးပိတ်ပင်မှုကို ၂၀၁၈ ခုနှစ် ဧပြီ ၃၀ ရက်အထိ တစ်နှစ်ထပ်တိုးလိုက်ကြောင်း ၂၀၁၇ ခုနှစ် ဇွန် ၂၈ ရက်က ထုတ်ပြန်ခဲ့ပြီးနောက် ယခုကဲ့သို့ သက်တမ်းပြည့်ခါနီးတွင် ထပ်မံသက်တမ်းတိုးလိုက်ခြင်းဖြစ်သည်။

သက်တမ်းတိုးလိုက်သည့် လက်နက်ရောင်းချမှု တားဆီးပိတ်ပင်ခြင်းတွင် လက်နက်များနှင့် ဖိနှိပ်မှုများအတွက် အသုံးပြုနိုင်သော အခြားပစ္စည်းကိရိယာများ၊ စစ်ဘက်ဆိုင်ရာ သင်တန်းပို့ချမှုနှင့် ဆက်သွယ်ရေးကို စောင့်ကြည့်ရာတွင် အသုံးပြုသောပစ္စည်းများ ပါဝင်ကြောင်း ဥရောပကောင်စီက ပြောကြားခဲ့ကြောင်း သတင်းတွင် ဖော်ပြထားသည်။

ထို့ပြင် ဥရောပသမဂ္ဂအနေဖြင့် မြန်မာ့တပ်မတော်အရာရှိများကို တစ်ဦးချင်း ပိတ်ဆို့တားမြစ်မှုများချမှတ်ရာတွင် ခရီးသွားလာမှု ပိတ်ပင်ခြင်းနှင့် ပိုင်ဆိုင်မှုများကို ထုတ်ယူသုံးစွဲနိုင်မှုမရှိစေရန် ထိန်းချုပ်ခြင်းများ ပါဝင်မည်ဖြစ်ကြောင်း သိရသည်။ အလားတူ မြန်မာ့တပ်မတော်အရာရှိများကို တစ်ဦးချင်း ပိတ်ဆို့တားမြစ်မှုများ ချမှတ်ခြင်းကို အမေရိကန်ပြည်ထောင်စုနှင့် ကနေဒါတို့က ချမှတ်ခဲ့ပြီးဖြစ်ကြောင်းလည်း Reuters သတင်းတွင် ဖော်ပြထားသည်။

ဥရောပသမဂ္ဂ၏ မြန်မာနိုင်ငံအပေါ် တားဆီးပိတ်ပင်မှုအရ ဥရောပသမဂ္ဂ အဖွဲ့ဝင်နိုင်ငံများအနေဖြင့် မြန်မာနိုင်ငံကို ပြည်တွင်းရေး ဖိနှိပ်မှုများတွင် အသုံးမပြုစေရန်အတွက် လက်နက်နှင့် ဆက်စပ်ပစ္စည်းများကို ရောင်းချခြင်းမပြုရန် တားမြစ်ထားခြင်းဖြစ်ကြောင်း သိရသည်။

ဥရောပသမဂ္ဂအနေဖြင့် မြန်မာနိုင်ငံအပေါ် တားဆီးပိတ်ပင်မှုများကို ရပ်ဆိုင်းခဲ့ပြီးနောက် ၂၀၁၂ ခုနှစ်တွင် မြန်မာနိုင်ငံ၌ ရုံးဖွင့်လှစ်ခဲ့သည်။

၂၀၁၃ ခုနှစ်တွင် ဥရောပသမဂ္ဂသည် မြန်မာနိုင်ငံအပေါ် တားဆီးပိတ်ပင်မှုများအနက် လက်နက်တားဆီးပိတ်ပင်မှုများမှလွဲ၍ အားလုံးကို ဖယ်ရှားပေးခဲ့သည်။