ယူကရိန်းကာကွယ်ရေးဝန်ကြီး ဖယ်ဒရော့က ၎င်းအား ကာကွယ်ရေးဝန်ကြီးအဖြစ်မှ ဖယ်ရှားလိုက်သည်ကို လက်မခံဘဲ ပြန်ခန့်အပ်ရန် တောင်းဆိုနေသည်။

ဖယ်ဒရော့က သမ္မတ ဇယ်လန်စကီးအား ကျေးဇူးတင်ရှိကြောင်း ပြောကြားခဲ့ကာ စစ်မြေပြင်တွင် တိုက်ပွဲဝင်နေသည့် စစ်သားများအပြင် စစ်ပွဲလမ်းကြောင်းကို အဆုံးအဖြတ်ပေးနိုင်သည့် တာဝန်ရှိသူသုံးဦးမှာ သမ္မတ၊ ကာကွယ်ရေးဝန်ကြီးနှင့် စစ်ဦးစီးချုပ်တို့သာ ဖြစ်​ကြောင်း အလေးပေးပြောဆိုခဲ့သည်။

ပြီးခဲ့သည့်သီတင်းပတ်က ကာကွယ်ရေးဝန်ကြီးကို ရာထူးမှ ဖယ်ရှားလိုက်မှုကြောင့် နိုင်ငံတစ်ဝန်း ဆန္ဒပြမှုများ ပေါ်ပေါက်ခဲ့သည်။ ယူကရိန်းစစ်တပ်ကို အားကောင်းအောင် ပြုပြင်ပြောင်းလဲနိုင်သူအဖြစ် ချီးကျူးခံခဲ့ရသူ အသက် ၃၅ နှစ်အရွယ် ဖယ်ဒရော့အား ရာထူးမှဖယ်ရှားပြီးနောက် သမ္မတ ဇယ်လန်စကီးက ဖယ်ဒရော့နှင့် သဘောထားကွဲလွဲခဲ့သည့် စစ်ဦးစီးချုပ် အိုလက်ဆန်ဒါ ဆာစကီးကိုလည်း ရာထူးမှ ဖယ်ရှားလိုက်ရသည်။

သို့သော် ဆန္ဒပြသူများက စစ်ဦးစီးချုပ်ကို ရာထူးမှဖယ်ရှားလိုက်ရုံနှင့် မလုံလောက်ဘဲ ဖယ်ဒရော့ကို ကာကွယ်ရေးဝန်ကြီးအဖြစ် ပြန်လည်ခန့်အပ်ပေးသည်အထိ ဆက်လက်ဆန္ဒပြမည်ဟု ​ကြွေး​ကြော်ထားသည်။

ဖယ်ဒရော့က ၎င်းကို ဇန်နဝါရီတွင် ကာကွယ်ရေးဝန်ကြီးအဖြစ် ခန့်အပ်ကတည်းက ၎င်းတွင် စစ်ပွဲကို မည်သို့အဆုံးသတ်မည်ဆိုသည့် တိကျသည့် အစီအစဉ်ရှိကြောင်း ဇူလိုင် ၂၃ ရက်တွင် သတင်းထောက်များအား ပြောကြားခဲ့သည်။သမ္မတက ဖယ်ဒရော့အား ဒုတိယဝန်ကြီးချုပ်အပါအဝင် အခြားအစိုးရရာထူးများကို ကမ်းလှမ်းခဲ့သော်လည်း ဖယ်ဒရော့က ငြင်းပယ်ခဲ့သည်။

Ref: BBC

Photo: Reuters / AP