ပခုက္ကူ နှင့် ညောင်ပင်ကြီးကြား ဖောက်ခွဲဖျက်ဆီးခံရသည့် မဟာဓာတ်အားလိုင်းတိုင် ပြန်လည်ပြုပြင်ပြီးနောက် ယခု ဇူလိုင်လ ၂၃ ရက်နေ့ မွန်းလွဲ ၃ နာရီခန့်မှစ၍ ပခုက္ကူခရိုင်တွင်း မြို့များ လျှပ်စစ်မီး ပြန်လည်ရရှိနေပြီဖြစ်ကြောင်း သိရသည်။
ဖောက်ခွဲဖျက်ဆီးခံရသည့် မဟာဓာတ်အားလိုင်းတိုင် အမြန်ပြန်လည်ပြုပြင်နိုင်ရေးအ တွက် လျှပ်စစ်ဝန်ကြီးဌာန ညွှန်ကြားချက် ၊ မဟာဓာတ်အားလိုင်း ဝန်ထမ်းများ နှင့် ဒေသလုံခြုံရေးတပ်ဖွဲ့များ ပူးပေါင်းဆောင်ရွက်ခဲ့ကြောင်း သိရသည်။
` ၁၉ ရက်နေ့က မီးစပြတ်သွားတာ။ ခုညနေ မီးပြန်လာပြီ။ သိရသလောက်တော့ ဓာတ်အားတိုင် foundation ပါ မိုင်းထိသွားတာ။အသစ်က ပြန်စရသလိုပဲ။ မြို့နဲ့ နီးတာရော သက်ဆိုင်ရာကရော အားစိုက်လို့ ဒီရက်လောက်နဲ့ မီးပြန်ရတာ။ လျှပ်စစ်မီး ပျက်ရင် အရင်ဆုံးထိခိုက်တာ အများပြည်သူပဲ ။ လျှပ်စစ်မီးက ကျန်းမာရေး စီးပွားရေး လူမှု ရေး အကုန်ဆက်နွယ်နေတာ ´ ဟု ပခုက္ကူမြို့ခံတစ်ဦး ကပြောသည်။
ဇူလိုင် ၁၉ ရက် ည ၇ နာရီခွဲခန့်တွင် မကွေးတိုင်းဒေသကြီး ပခုက္ကူမြို့နယ် ပေါင်လောင်ကန်ရွာအနီး ၁၃၂ ကေဗွီ မဟာဓာတ်အားလိုင်း တိုင်အမှတ် (၃၃၈) အား PDF များက မိုင်းထောင်ဖောက်ခွဲဖျက်ဆီးခဲ့သဖြင့် ပခုက္ကူ၊ ရေစကြို၊ မြိုင်နှင့် ကမ္မမြို့များသို့ သွယ်တန်းထားသည့် လျှပ်စစ်မီးလိုင်းများ ပြတ်တောက်သွားခဲ့ကြောင်း သိရသည်။
( ဖေက်ခွဲဖျက်စီးခံရသည့် ဓာတ်အားပေးတိုင်အား မဟာဓာတ်အားပေးလိုင်းဝန်ထမ်းများ ပြုပြင်နေစဉ် ) ဓာတ်ပုံ - ပခုက္ကူလျှပ်စစ် ဖေ့စ်ဘုတ်
