ထန်းတပင်မြို့နယ်တွင် ငါးနှစ်အရွယ်ကလေးငယ်ကို အဓမ္မပြုကျင့် သတ်ဖြတ်ပြီး နားကပ်လုယူခဲ့သူကို ဖမ်းဆီးရမိခဲ့ကြောင်း ရဲတပ်ဖွဲ့နှင့်နီးစပ်သူများထံမှ သိရသည်။
ဇူလိုင် ၃ ရက် နံနက်က ရန်ကုန်တိုင်းဒေသကြီး ထန်းတပင်မြို့နယ်ရှိ ငါးနှစ်အရွယ် ကလေးငယ်တစ်ဦးအား အဖွားဖြစ်သူက ကျောင်းသွားရန် ပြင်ဆင်ပေးနေစဉ် ပျောက်ဆုံးသွားခဲ့ကြောင်း၊ ပျောက်ဆုံးသဖြင့် လိုက်လံရှာဖွေရာ တူးချောင်းကျေးရွာ၊ ကံမြင့်လမ်း၌ ညိုမည်းစွဲဒဏ်ရာ၊ နားရွက်ပျက်လုဒဏ်ရာများဖြင့် သေဆုံးနေပြီး အလောင်းကို ဆာလာအိတ်ဖြင့်ထည့်ကာ စွန့်ပစ်ထားသည်ကို တွေ့ရှိခဲ့သည်။
ဆရာဝန်၏ ဆေးစစ်ချက်အရ ကလေးငယ်မှာ အဓမ္မပြုကျင့်ခံရပြီး သေဆုံးနေခြင်းဖြစ်ကြောင်း၊ ဖြစ်စဉ်နှင့် ပတ်သက်ပြီး ထန်းတပင်မြို့နယ်၊ တက်သစ်နယ်မြေရဲစခန်း၌ ရာဇသတ်ကြီး ပုဒ်မ-၃၀၂/၃၉၂ တို့ဖြင့် အမှုဖွင့်စစ်ဆေးခဲ့ကြောင်း သိရသည်။
အဆိုပါဖြစ်စဉ်မှ ကျူးလွန်သူကို ဇူလိုင် ၆ ရက်တွင် ပဲခူးတိုင်းဒေသကြီး နတ်တလင်းမြို့၌ ဖမ်းဆီးရမိခဲ့ကြောင်း၊ ၎င်းမှာ ဧရာဝတီတိုင်း၊ ပန်းတနော်မြို့နယ်၊ ခနွဲခဖိုကျေးရွာတွင်နေထိုင်သူရဲဝင်းပိုင်ဖြစ်ကြောင်း သိရသည်။
