ထိုင်းနှင့် မြန်မာကြား မယ်ဟောင်ဆန် နယ်စပ်ဖြတ်ကျော်ဂိတ်တွင် မြန်မာနိုင်ငံသို့ ကုန်စည်စီးဆင်းမှုကို ယာယီရပ်ဆိုင်းထားကြောင်း Khaosod English သတင်းဝက်ဘ်ဆိုက်တွင် ဖော်ပြထားသည်။

ထိုင်း လုံခြုံရေးတပ်ဖွဲ့ဝင်များသည် မူးယစ်ဆေးဝါးမှောင်ခိုကူးမှုနှင့် မူးယစ်ဆေးဝါးချက်လုပ်ရာတွင် အသုံးပြုသည့် ဓာတုပစ္စည်းများ သယ်ဆောင်မှုကို တားဆီးနှိမ်နင်းရန် ကြိုးပမ်းသည့်အနေဖြင့် Huai Phueng နယ်စပ်ဂိတ်တွင် စည်းကမ်းများ တင်းကျပ်လိုက်ပြီး ခြေလျင်ခရီးသွားလာခွင့်ကိုသာ ခွင့်ပြုထားကာ နယ်စပ်ဖြတ်ကျော် ကုန်စည်တင်ပို့မှုနှင့် မော်တော်ယာဉ် သွားလာမှုများကိုမူ ရပ်ဆိုင်းထားသည်။

မေ ၂၂ ရက်က မယ်ဟောင်ဆန်ခရိုင်မှ နယ်စပ်ကုန်သည် ၂၀ ကျော်သည် အဆိုပါ တားမြစ်ကန့်သတ်ချက်များကို ကန့်ကွက်ရန်အတွက် ဟွေ့ဖာတိုက်နယ် စီမံခန့်ခွဲရေးအဖွဲ့ရုံးတွင် တွေ့ဆုံခဲ့သည်။

မြန်မာနိုင်ငံသို့ ကုန်စည်သယ်ယူပို့ဆောင်ရေး ရပ်ဆိုင်းသွားခြင်းကြောင့် ဒေသတွင်းစီးပွားရေးလုပ်ငန်းများကို ပြင်းထန်စွာ ထိခိုက်စေပြီး နေ့စဉ်ကုန်စည်ပေးပို့မှုများ ရပ်တန့်သွားကြောင်း ကုန်သည်များက ပြောကြားကာ မယ်ဟောင်ဆန်ခရိုင်အုပ်ချုပ်ရေးမှူးနှင့် လုံခြုံရေးအေဂျင်စီများထံ ညှိနှိုင်းပေးရန် တရားဝင် အသနားခံစာ တင်ပြခဲ့သည်။

နယ်စပ်ကုန်သွယ်ရေးအပေါ် မှီခိုနေရသည့် နယ်စပ်ဒေသနေ လူထုအတွက် ယခုကန့်သတ်ချက်များကြောင့် ကြီးမားသော စီးပွားရေးအခက်အခဲများ ကြုံတွေ့နေရသဖြင့် ပုံမှန်ကုန်စည်သယ်ယူပို့ဆောင်ရေးအတွက် ယာယီစစ်ဆေးရေးဂိတ်ကို ပြန်လည်ဖွင့်လှစ်ပေးရန် လုပ်ငန်းရှင်များက တာဝန်ရှိသူများကို တောင်းဆိုခဲ့ကြသည်။

လုံခြုံရေးတာဝန်ရှိသူများကမူ Huai Phueng နယ်စပ်ဂိတ်သည် လုံးဝပိတ်ထားသည်ဆိုသည့် ပြောဆိုချက်များကို ငြင်းဆိုခဲ့ပြီး ခြေလျင်ခရီးသွားများအတွက် ဆက်လက်ဖွင့်ပေးထားကြောင်း ဖြေရှင်းခဲ့သည်။

သို့သော် လုံခြုံရေးအတွက် စိုးရိမ်ရသည့် အခြေအနေများနှင့် တရားမဝင်မူးယစ်ဆေးဝါးထုတ်လုပ်မှုနှင့် ဆက်နွှယ်နေသည်ဟု ယူဆရသော မှောင်ခိုကုန်စည်များနှင့် ဓာတုပစ္စည်းများကို ကြားဖြတ်ဖမ်းဆီးရန် ပြန်လည်ပြင်ဆင်ထားသည့် စစ်ဆေးရေးလုပ်ထုံးလုပ်နည်းများကြောင့် မြန်မာနိုင်ငံအတွင်းသို့  ကုန်စည်သယ်ယူပို့ဆောင်မှုနှင့် မော်တော်ယာဉ်ဖြတ်သန်းမှုအားလုံးကို ယာယီရပ်ဆိုင်းထားခြင်းဖြစ်သည်ဟု ဆိုသည်။

နယ်စပ်တစ်ဖက်ခြမ်းရှိ တရားမဝင်မူးယစ်ဆေးဝါးထုတ်လုပ်ရေးလုပ်ငန်းများသို့ ပေးပို့ရန် ရည်ရွယ်ထားသည်ဟု ယူဆရသော သံသယဖြစ်ဖွယ် ဓာတုပစ္စည်းသယ်ဆောင်မှုများကို မကြာသေးမီက ဖမ်းဆီးရမိခဲ့ပြီးနောက် ယခုကဲ့သို့ စစ်ဆေးမှုများကို တင်းကျပ်လိုက်ခြင်းဖြစ်ကြောင်း တာဝန်ရှိသူများက ပြောကြားခဲ့သည်။

ထို့အပြင် အချို့သောလုပ်ငန်းရှင်များသည် အခွန်မှတ်တမ်းများကို မှန်ကန်စွာတင်ပြခြင်းမရှိသဖြင့် စစ်ဆေးမှုများနှင့် စာရွက်စာတမ်းလုပ်ထုံးလုပ်နည်းများကို ပြန်လည်သုံးသပ်နေစဉ်အတွင်း ကုန်စည်စီးဆင်းမှုများကို ယာယီရပ်ဆိုင်းထားရခြင်းဖြစ်ကြောင်း တာဝန်ရှိသူများက ဆိုသည်။

ယခုလုပ်ဆောင်ချက်များသည် နယ်စပ်ဖြတ်ကျော်ကုန်သွယ်မှုကို ကြီးကြပ်ကွပ်ကဲမှု ပိုမိုအားကောင်းစေရန်နှင့် တရားမဝင်ပစ္စည်းများ နယ်စပ်စစ်ဆေးရေးဂိတ်ကို ဖြတ်သန်းသယ်ဆောင်သွားခြင်းမရှိစေရန် ရည်ရွယ်ခြင်းဖြစ်ကြောင်း လုံခြုံရေးတာဝန်ရှိသူများက ပြောကြားခဲ့သည်။

ထို့ပြင် ပြည်နယ်အာဏာပိုင်များသည် အဆိုပါနယ်စပ်ဂိတ်၏ ရေရှည်စီမံခန့်ခွဲမှုအခြေအနေနှင့် ပိုမိုတင်းကျပ်သော ထိန်းချုပ်မှုအောက်တွင် တရားဝင်ကုန်သွယ်မှုများ ပြန်လည်စတင်နိုင်ရေးအတွက် စစ်ဆေးရေးလုပ်ထုံးလုပ်နည်းများကို ပြင်ဆင်နိုင်မည့် အခြေအနေများကို ဆွေးနွေးရန် မေလ ၂၇ ရက်တွင် ပူးတွဲကော်မတီအစည်းအဝေး ပြုလုပ်ရန်လည်း စီစဉ်ထားသည်။

Ref: Khaosod English