မွန်ပြည်နယ် သထုံမြို့နယ် မြေနီကုန်း ကျေးရွာ ရန်ကုန်-မော်လမြိုင်ကားလမ်းနံဘေးရှိ Puma Power စက်သုံးဆီအရောင်းဆိုင် မှ မန်နေဂျာအား နိုဝင်ဘာ ၈ ရက် မွန်းလွဲပိုင်းက လက်နက်ကိုင်အဖွဲ့တစ်ဖွဲ့က ဖမ်းဆီးခေါ် ဆောင်သွားကြောင်း သတင်းရရှိသည်။
နိုဝင်ဘာ ၈ ရက် မွန်းလွဲ ၁၂ နာရီခွဲခန့် က သထုံမြို့နယ် မြေနီကုန်းကျေးရွာရှိ အဆိုပါ Puma Power စက်သုံးဆီအရောင်းဆိုင်သို့ probox အမည်းရောင်ယာဉ်တစ်စီး ရောက်ရှိလာပြီး ယာဉ်ပေါ်မှ လက်နက်ကိုင် အမျိုးသား နှစ်ဦး ဆင်းလာကာ ဆိုင်ဝန်ထမ်းဖြစ်သူ မောင်ဟန်ထူးစျာန်နှင့် မောင်အောင်မြင့်သန်းတို့ နှစ်ဦးအား စစ်ဆေးရန်ရှိသည်ဟုဆိုကာ စက်သုံးဆီအရောင်းဆိုင် အနောက်ဘက်သို့ ခေါ် သွားပြီးနောက် ၎င်းတို့နှစ်ဦး၏ လက်အား ကြိုးချည်နှောင်ပြီး ပါးစပ်အား တိပ်အကြည်ရောင်စဖြင့် ရစ်ပတ်ချုပ်နှောင်ထားခဲ့ကြောင်း နှင့် မိုင်းပေါက်ကွဲသံကြားမှသာ စက်သုံးဆီအ ရောင်းဆိုင်အနောက်မှ ထွက်လာကြရန် မှာ ကြားခဲ့သည်ဟု သိရကြောင်း အဆိုပါစက်သုံး ဆီအရောင်းဆိုင်နှင့် နီးစပ်သူတစ်ဦးက ပြော ကြားသည်။
၎င်းက ဆက်လက်ပြီး “ပြီးတော့ သေနတ်ကိုင်ဆောင်ထားတဲ့ အမျိုးသားတစ်ဦးက စက်သုံးဆီဆိုင်ထဲက မန်နေဂျာရုံးခန်းထဲကို ဝင်သွားပြီးတော့ စက်သုံးဆီအရောင်းဆိုင်မန်နေဂျာဖြစ်တဲ့ အသက် ၃၈ နှစ်အရွယ် ဒေါ် သိမ့်သူဇာကို ဖမ်းဆီးခေါ်ဆောင်သွားတယ် လို့ သိရပါတယ်။ ဒေါ်သိမ့်သူဇာ က သထုံမြို့ နယ် နောင်ကုလားရွာကြီးကျေးရွာမှာ နေထိုင် တဲ့သူပါ” ဟု ပြောကြားသည်။
ထို့ပြင် မန်နေဂျာရုံးခန်းအတွင်းရှိ accer အမျိုးအစား လက်တော့တစ်လုံး၊ စားပွဲအံဆွဲ အတွင်းမှ စက်သုံးဆီရောင်းချရငွေ ကျပ်ခြောက်သိန်းကျော်အား ယူဆောင်သွားပြီးနောက် သထုံမြို့နယ် သုဝဏ္ဏဝတီမြို့ (ကျိုက္ကော်) ဘက် သို့ မောင်းနှင်သွားသည်ဟု သိရကြောင်းနှင့် မွန်းလွဲ ၁၂ နာရီ ၄၅ မိနစ်ခန့်တွင် မန်နေဂျာရုံး ခန်းအတွင်းမှ အသံမိုင်းပေါက်ကွဲမှုဖြစ်ပွားခဲ့ကြောင်း ၎င်းင်းက ဆိုသည်။
ထို puma power စက်သုံးဆီအရောင်း ဆိုင် မန်နေဂျာအား မည်သည့်လက်နက်ကိုင် အဖွဲ့က ဖမ်းဆီးခေါ်ဆောင်သွားသည်ကို မသိရသေးကြောင်းနှင့် အခင်းဖြစ်ပွားပြီးနောက် လုံခြုံရေးတပ်ဖွဲ့ဝင်များက ပိတ်ဆို့စစ်ဆေးမှု များလုပ်ဆောင်ခဲ့ကြောင်း သိရသည်။
အလားတူ ပြီးခဲ့သည့် နိုဝင်ဘာ ၆ ရက် မွန်းလွဲ ၂ နာရီခန့်တွင် မုဒုံမြို့နယ် ကျိုက်ရွဲကျေး ရွာရှိ ဟွန်ဒါမြန်မာ သစ်ပါးလွှာစက်ရုံဝင်းအ တွင်းသို့ အင်အား ၂၀ ခန့်ရှိ မွန်ပြည်သစ်ပါတီ (ဗီ) အဖွဲ့မှ သေနတ်ဖောက်ကာ ဝင်ရောက် လာပြီးနောက် စက်ရုံမှူး၊ မန်နေဂျာနှင့် တရုတ် နိုင်ငံသားပညာရှင်တစ်ဦးတို့အား ဖမ်းဆီး ခေါ်ဆောင်သွားသည့်ဖြစ်စဉ် ဖြစ်ပွားခဲ့သေး ကြောင်း ဒေသတွင်း သတင်းအရင်းအမြစ်များ ၏ သတင်းဖော်ပြချက်များအရ သိရသည်။
