ဘာစီလိုနာအသင်း၏ ပိုလန်ဝါရင့်တိုက်စစ်မှူး လီဝန်ဒေါစကီးက မိမိိတို့အသင်းအနေဖြင့် ယခုတစ်ပတ်အတွင်းယှဉ်ပြိုင်ကစားမည့် နိုင်ငံတကာပွဲစဉ်များအပြီးတွင် ပိုမိုသန်မာလာမည်ဖြစ်ကြောင်း ကြုံးဝါးပြောဆိုခဲ့သည်။
ဘာစီလိုနာအသင်းသည် နိုင်ငံတကာပွဲစဉ်များမတိုင်မီတွင် လာလီဂါအမှတ်ပေးဇယားအား အမှတ်ဖြတ်ဦးဆောင်ထားပြီး ရီးယဲလ်မက်ဒရစ်၏နောက် ချန်ပီယံဆုအတွက် ဒုတိယရေပန်းအစားဆုံးအသင်းအဖြစ် ရပ်တည်နေသည်။
ဘာစီလိုနာအသင်း၏ လက်ရှိအခြေအနေနှင့်ပတ်သက်ပြီး လီဝန်ဒေါစကီးက ''နိုင်ငံတကာပွဲစဉ်တွေအပြီးမှာ ဒဏ်ရာရကစားသမားတွေ ပြန်လည်သက်သာလာတော့မှာဖြစ်သလို၊ ကျွန်တော်တို့အသင်းအနေနဲ့ လက်ရှိထက် ပိုမိုသန်မာတဲ့အသင်းအဖြစ် ပြန်လာနိုင်မယ်လို့ ယုံကြည်ပါတယ်'' ဟုပြောကြားခဲ့သည်။
ဘာစီလိုနာအသင်းသည် လက်ရှိလာလီဂါအမှတ်ပေးဇယားထိပ်ဆုံးနေရာတွင်ရပ်နေသော်လည်း ဒဏ်ရာရကစားသမားများပြားနေပြီး စတီဂန်၊ အာရူဟို၊ အော်လ်မို၊ ဖာမင်လိုပက်ဇ်၊ ခရစ္စတန်ဆန်နှင့် ဘာနယ်လ်အစရှိသည့် အဓိက ကစားသမားများကို ဆုံးရှုံးထားရကြောင်း စပိန်မီဒီယာများက ဖော်ပြခဲ့သည်။
