အစ္စရေးက ဂါဇာအလယ်ပိုင်းရှိ စစ်ရှောင်ပါလက်စတိုင်းသားများနေထိုင်ရာ စာသင်ကျောင်းကို ဗုံးကြဲတိုက်ခိုက်ခဲ့သောကြောင့် လူ ၁၈ ဦးသေဆုံးသွားခဲ့သည်ဟု ကယ်ဆယ်ရေးသမားများက ပြောကြားခဲ့ သည်။ သေဆုံးသွားသူများထဲတွင် ကုလသမဂ္ဂဝန်ထမ်းများပါဝင်သည်ဟု ဆိုသည်။ သို့ရာတွင် အစ္စရေးစစ်တပ်ကမူ ဟားမာ့စ်ကွပ်ကဲရေးဌာနကို တိုက်ခိုက်ခဲ့ခြင်းဖြစ်သည်ဟု ပြောကြားခဲ့သည်။
နူဆေးရတ်ရှိ အယ်လ်ဂျော်နီကျောင်းသည် ဂါဇာတွင်ဖြစ်ပွားနေသော ၁၁ လကြာစစ်ပွဲအတွင်း အကြိမ်ကြိမ် ဗုံးကြဲခံခဲ့ရသည်။ စက်တင်ဘာ ၁၁ ရက်တိုက်ခိုက်မှုကြောင့် ကုလသမဂ္ဂက ဖွင့်ထားသော ကျောင်း၏အစိတ်အပိုင်းများ ပြားပြားဝပ်ပြို ကျခဲ့သည်။ အဆိုပါ စာသင်ကျောင်းတွင် ဂါဇာမြို့သားများ ခိုလှုံနေသည်ဟုဆိုသည်။
“အစ္စရေးတပ်ဖွဲ့တွေက UNRWA ကဖွင့်ထားတဲ့ အယ်လ်ဂျော်နီစာသင်ကျောင်းကို ဗုံးကြဲခဲ့တာငါးကြိမ်ရှိပါပြီ။ ၁၈ ဦးသေဆုံးသွားခဲ့ပါတယ်။ UNRWA ဝန်ထမ်းနှစ်ဦး၊ ကလေးတွေနဲ့အမျိုးသမီးတွေ သေဆုံးသွားခဲ့ပါတယ်။ အခြားလူ ၁၈ ဦး ဒဏ်ရာရခဲ့ပါတယ်”ဟု ဂါဇာမြို့ပြကာကွယ်ရေးအဖွဲ့ ပြောရေးဆိုခွင့်ရှိသူ မာမွတ်ဘာဆယ်လ်က တယ်လီဂရမ်တွင် ပို့စ်တင်ခဲ့သည်။
Ref: AFP
