![Photo: MFF](https://news-eleven.com/sites/news-eleven.com/files/styles/news_detail_image/public/news-images/mff_61.jpg?itok=rxKW2bYt)
မြန်မာ့လက်ရွေးစင်အမျိုးသမီးအသင်း နှင့် ဟောင်ကောင်လက်ရွေးစင်အမျိုးသမီးအသင်းတို့သည် လာမည့်အောက်တိုဘာ ၂၃၊ ၂၆ ရက်များတွင် ရန်ကုန်မြို့၌ နိုင်ငံတကာအသိအမှတ်ပြု ခြေစမ်းပွဲနှစ်ပွဲ ယှဉ်ပြိုင်ကစားမည်ဖြစ်ကြောင်း သိရသည်။
မြန်မာနိုင်ငံဘောလုံးအဖွဲ့ချုပ်(MFF) သည် မြန်မာ့လက်ရွေးစင်အမျိုးသမီးအသင်း နှင့် ဟောင်ကောင်လက်ရွေးစင်အမျိုးသမီးအသင်းတို့၏ ပထမခြေစမ်းပွဲကို လာမည့် အောက်တိုဘာ ၂၃ ရက်၊ ညနေ ၄ နာရီတွင် ရန်ကုန်မြို့ရှိ သုဝဏ္ဏကွင်း၌ ကျင်းပမည်ဖြစ်သည်။
MFF သည် မြန်မာ့လက်ရွေးစင်အမျိုးသမီးအသင်း နှင့် ဟောင်ကောင်လက်ရွေးစင်အမျိုးသမီးအသင်းတို့၏ ဒုတိယခြေစမ်းပွဲကို လာမည့်အောက်တိုဘာ ၂၆ ရက်၊ ညနေ ၄ နာရီတွင် ကျင်းပရန်စီစဉ်ထားသော်လည်း ကစားမည့်ကွင်းကိုမူ အတည်မပြုနိုင်သေးကြောင်း သိရသည်။
မြန်မာ့လက်ရွေးစင်အမျိုးသမီးအသင်း နှင့် ဟောင်ကောင်လက်ရွေးစင်အမျိုးသမီးအသင်းတို့သည် သမိုင်းတစ်လျှောက် ထိပ်တိုက်နှစ်ကြိမ်တွေ့ဆုံဖူးပြီး မြန်မာအမျိုးသမီးအသင်းက နှစ်ကြိမ်စလုံး အနိုင်ရရှိထားသည်။
မြန်မာ့လက်ရွေးစင်အမျိုးသမီးအသင်းသည် လွန်ခဲ့သည့် ၂၀၁၅ ခုနှစ်၊ နိုဝင်ဘာအတွင်းက ဟောင်ကောင်သို့ သွားရောက်၍ ဟောင်ကောင်လက်ရွေးစင်အမျိုးသမီးအသင်းနှင့် နိုင်ငံတကာအသိအမှတ်ပြု ခြေစမ်းပွဲကစားခဲ့ရာ(၃-၀) ဂိုးဖြင့် အနိုင်ရရှိထားသည်။
မြန်မာ့လက်ရွေးစင်အမျိုးသမီးအသင်းသည် ပြီးခဲ့သည့် ၁၉ ကြိမ်မြောက် ဟန်ကျိုးအာရှအားကစားပြိုင်ပွဲ အမျိုးသမီးဘောလုံးပြိုင်ပွဲတွင် ဟောင်ကောင်လက်ရွေးစင်အမျိုးသမီးအသင်းနှင့် တစ်အုပ်စုတည်းကျရောက်ခဲ့ပြီး ထိုစဉ်က အုပ်စုတွင်း၌(၁-၀) ဂိုးဖြင့် အနိုင်ရှိခဲ့သည်။
မြန်မာ့လက်ရွေးစင်အမျိုးသမီးအသင်းနှင့် ဟောင်ကောင်လက်ရွေးစင်အမျိုးသမီးအသင်းတို့သည် ပြီးခဲ့သည့်ဇူလိုင်းအတွင်းက နိုင်ငံတကာအသိအမှတ်ပြု ခြေစမ်းပွဲနှစ်ပွဲစီ ကစားထားကြသည်။
မြန်မာ့လက်ရွေးစင်အမျိုးသမီးအသင်းသည် ပြီးခဲ့သည့်ဇူလိုင်းအတွင်းက အိန္ဒိယအမျိုးသမီးအသင်းနှင့် ရန်ကုန်မြိုတွင် ခြေစမ်းပွဲနှစ်ပွဲကစားခဲ့ရာ ပထမပွဲတွင်(၂-၁) ဂိုးဖြင့် အနိုင်ရခဲ့ပြီး ဒုတိယပွဲတွင်(၁-၁) ဂိုးဖြင့် သရေကျခဲ့သည်။
ဟောင်ကောင်လက်ရွေးစင်အမျိုးသမီးအသင်းသည် ပြီးခဲ့သည့်ဇူလိုင်အတွင်းက အင်ဒိုနီးရှားအမျိုးသမီးအသင်းနှင့် ဟောင်ကောင်တွင် ခြေစမ်းပွဲနှစ်ပွဲကစားခဲ့ရာ ပထမပွဲတွင်(၃-၂) ဂိုး၊ ဒုတိယပွဲတွင် (၄-၁) ဂိုးတို့ဖြင့် အနိုင်ရရှိခဲ့သည်။
မြန်မာ့လက်ရွေးစင်အမျိုးသမီးအသင်းကို ဂျပန်နိုင်ငံသား ယုကီတက်ဆုရိုက နည်းပြချုပ်အဖြစ် ပြီးခဲ့သည့် ၂၀၂၃ခုနှစ် ဧပြီမှစ၍ တာဝန်ယူကိုင်တွယ်နေသည်။
ဂျပန်နိုင်ငံသား ယုကီတက်ဆုရိုလက်ထက်တွင် မြန်မာအမျိုးသမီးအသင်းသည် ၂၀၂၃ ကမ္ဘောဒီးယားဆီးဂိမ်းစ်ပြိုင်ပွဲနှင့် ၁၉ ကြိမ်မြောက် ဟန်ကျိုးအာရှအားကစားပြိုင်ပွဲတို့ ဝင်ရောက်ယှဉ်ပြိုင်ခဲ့သည်။
မြန်မာအမျိုးသမီးအသင်းသည် ကမ္ဘောဒီးယားဆီးဂိမ်းစ် ပြိုင်ပွဲတွင် ဗိုလ်လုပွဲသို့ တက်ရောက်ခဲ့ပြီး အာရှအားကစားပြိုင်ပွဲတွင်မူ အုပ်စုအဆင့်မှ ထွက်ခဲ့ရသည်။