မြန်မာနိုင်ငံကူးလက်မှတ်ထုတ်ပေးရေးရုံးခွဲများဖြစ်သည့် လားရှိုးရုံးခွဲတွင် Onlie Appointment ယူထားသူများ မန္တလေးရုံးခွဲတွင်၄င်း၊ မြစ်ကြီးနားရုံးခွဲတွင် Onlie Appointment ယူထားသူများ ရန်ကုန်ရုံးတွင်၄င်း လျှောက်ထားနိုင်ကြောင်း မြန်မာနိုင်ငံကူးလက်မှတ်ထုတ်ပေးရေးရုံးက စက်တင်ဘာ ၁ ရက်တွင် အသိပေးကြေညာချက် ထုတ်ပြန်ထားသည်။
ယင်းကြေညာချက်တွင် မြန်မာနိုင်ငံကူးလက်မှတ်ထုတ်ပေးရေးရုံးခွဲ(လားရှိုး)တွင် Online Appointment Date ရရှိထားသူများအနေဖြင့် ရန်ကုန်ရုံးနှင့် တောင်ကြီးရုံးတို့တွင် လျှောက်ထားနိုင်သည့်အပြင် စက်တင်ဘာ ၂ ရက်ကစ၍ မန္တလေးရုံးခွဲတွင်လည်း လျှောက်ထားနိုင်ကြောင်း သိရသည်။
ထို့ပြင် မြန်မာနိုင်ငံကူးလက်မှတ်ထုတ်ပေးရေးရုံးခွဲ(မြစ်ကြီးနား)တွင် Online Appointment Date ရရှိထားသူများအနေဖြင့် မန္တလေးရုံးခွဲတွင် လျှောက်ထားနိုင်သည့်အပြင် စက်တင်ဘာ ၂ ရက်ကစ၍ ရန်ကုန်ရုံးတွင်လည်း လျှောက်ထားနိုင်ကြောင်း သိရသည်။
ဆက်လက်ပြီး မြန်မာနိုင်ငံကူးလက်မှတ်လျှောက်ထားရာတွင် စက်တင်ဘာ ၁ ရက်က စတင်၍ စာအုပ်တန်ဖိုးငွေ ၃၅၀၀၀ ကျပ်မှ ၄၀၀၀၀ ကျပ်သို့ ပြောင်းလဲသတ်မှတ်လိုက်ကြောင်း မြန်မာနိုင်ငံကူးလက်မှတ်ထုတ်ပေးရေးရုံးက သြဂုတ် ၂၉ ရက်က ထုတ်ပြန်ထားသည်။
