ဖေဖော်ဝါရီ ၂၃ ရက်က နေပြည်တော်ရှိ လွှတ်တော်ဝင်းအတွင်း၌ ကျင်းပသည့် မြန်မာနိုင်ငံ လွှတ်တော်အဖွဲ့ (MPU) အစည်းအဝေးကို တွေ့ရစဉ် (ဓာတ်ပုံ-ပြည်ထောင်စုလွှတ်တော်)

မြန်မာနိုင်ငံ လွှတ်တော်အဖွဲ့ဥပဒေ ပြဋ္ဌာန်းခြင်းမှာ တိုင်းဒေသကြီးနှင့် ပြည်နယ်လွှတ်တော်များကို လွှမ်းမိုးချုပ်ကိုင်ရန် မဟုတ်ကြောင်း ပြည်ထောင်စု လွှတ်တော်နာယက မန်းဝင်းခိုင်သန်းက ပြောကြားသည်။

နေပြည်တော်ရှိ လွှတ်တော်ဝင်းအတွင်း၌ ဖေဖော်ဝါရီ ၂၃ ရက်က ကျင်းပသည့် မြန်မာနိုင်ငံ လွှတ်တော်အဖွဲ့ (MPU) အစည်းအဝေးတွင် ပြည်ထောင်စု လွှတ်တော်နာယက မန်းဝင်းခိုင်သန်းက အထက်ပါကဲ့သို့ ထည့်သွင်းပြောကြားခဲ့ကြောင်း ပြည်ထောင်စုလွှတ်တော် က သတင်းထုတ်ပြန်ခဲ့သည်။

အစည်းအဝေး၌ မြန်မာနိုင်ငံ လွှတ်တော်အဖွဲ့ဥပဒေကို ပြဋ္ဌာန်းနိုင်ခဲ့ပြီ ဖြစ်ကြောင်း၊ ယင်းဥပဒေ ပြဋ္ဌာန်းခြင်းမှာ တိုင်းဒေသကြီးနှင့် ပြည်နယ်လွှတ်တော်များကို လွှမ်းမိုးချုပ်ကိုင်ရန် မဟုတ်ကြောင်း၊ အဖွဲ့အစည်းတိုင်းမှာ ကိုယ်ပိုင်ဥပဒေများ ရှိကြောင်း၊ ဥပဒေပြဋ္ဌာန်းခြင်းသည် လုပ်ငန်းများကို တိတိကျကျ ဆောင်ရွက်နိုင်စေရန် ဖြစ်ကြောင်း၊ ပြည်ထောင်စုနှင့် တိုင်းဒေသကြီးနှင့် ပြည်နယ်လွှတ်တော်များအကြား ဆက်သွယ်ညှိနှိုင်း ဆောင်ရွက်နိုင်ရေးနှင့် တိုင်းဒေသကြီးနှင့် ပြည်နယ်လွှတ်တော်များ အချင်းချင်း ဆက်သွယ်ညှိနှိုင်း ဆောင်ရွက်ရေးတို့ကို တိုးမြှင့်ဆောင်ရွက်နိုင်မှာ ဖြစ်ကြောင်း၊ မြန်မာနိုင်ငံ လွှတ်တော်အဖွဲ့ အဖွဲ့ဝင်များသည် လွှတ်တော်အဖွဲ့၏ ညှိနှိုင်း ဆုံးဖြတ်ချက်များကို ဆောင်ရွက်ရမည်ဖြစ်ပြီး ဆောင်ရွက်ပြီးစီးကြောင်းကို လွှတ်တော်အဖွဲ့သို့ ပြန်လည်အစီရင်ခံရန် လိုအပ်ပါကြောင်း ပြည်ထောင်စုလွှတ်တော်နာယက မန်းဝင်းခိုင်သန်းက ပြောကြားခဲ့သည်ဟု သတင်းထုတ်ပြန်ထားသည်။

ထို့အတူ ပြည်သူ့လွှတ်တော် ဥက္ကဋ္ဌ ဦးဝင်းမြင့်က မြန်မာနိုင်ငံ လွှတ်တော်အဖွဲ့ဥပဒေ၏ ရည်ရွယ်ချက်မှာ လွှတ်တော်အသီးသီး၏ ဆောင်ရွက်မှုများ နည်းလမ်း မှန်ကန်ခိုင်မာပြီး အရည်အသွေး ကောင်းမွန် တိုးတက်မြင့်မားရေးအတွက် အဖွဲ့အစည်းများနှင့် ပူးပေါင်းဆောင်ရွက်ရန် ဖြစ်ကြောင်း၊ နိုင်ငံတကာအဖွဲ့အစည်းများ၊ အပြည်ပြည်ဆိုင်ရာ အဖွဲ့အစည်းများနှင့် ပူးပေါင်းဆောင်ရွက်ရာတွင် တိုင်းဒေသကြီးနှင့် ပြည်နယ်လွှတ်တော်များ ပါဝင်ပါက အင်အားခိုင်မာ တောင့်တင်းလာမည် ဖြစ်ကြောင်း၊ မြန်မာနိုင်ငံ လွှတ်တော်အဖွဲ့ အဖွဲ့ဝင်များအနေဖြင့် ဖွဲ့စည်းပုံ အခြေခံဥပဒေ နှင့် လွှတ်တော်ဆိုင်ရာဥပဒေ၊ နည်းဥပဒေများကို ပိုင်နိုင်စွာ လေ့လာထားရန်လိုကြောင်း ပြောကြားခဲ့သည်ဟု သတင်းထုတ်ပြန်ခဲ့သည်။

ထို့ပြင် ပြည်သူ့လွှတ်တော် ဒုတိယဥက္ကဋ္ဌ ဦးတီခွန်မြတ်ကလည်း မြန်မာနိုင်ငံ လွှတ်တော်အဖွဲ့ဥပဒေကြမ်းကို ပြည်သူ့လွှတ်တော်၊ လွှတ်တော်အခွင့်အရေး ကော်မတီမှ တင်သွင်းခဲ့ကြောင်း၊ ဖက်ဒရယ်ဒီမိုကရေစီ အောင်မြင်ရန်အတွက် ဆောင်ရွက်ခဲ့ခြင်း ဖြစ်ကြောင်း ရှင်းလင်း တင်ပြခဲ့သည်ဟု လွှတ်တော်၏ သတင်းထုတ်ပြန်ချက်တွင် ဖော်ပြထားသည်။

ဖက်ဒရယ်စနစ်သို့ ပြောင်းလဲရာတွင် ၂၀၀၈ ခုနှစ် ဖွဲ့စည်းပုံ အခြေခံဥပဒေမှာလည်း လိုအပ်ချက်များ၊ ပြင်ဆင်စရာ များစွာရှိနေသည့်အချိန်တွင် အဆိုပါဥပဒေမှာ ရှိရင်းစွဲ ၂၀၀၈ ဖွဲ့စည်းပုံ အခြေခံဥပဒေထက် ပြည်နယ်၊ တိုင်းလွှတ်တော်များ၏ အခွင့်အရေးများကို ပိုမို တင်းကျပ်လိုက်သည့် အခြေအနေတွင် ရှိနေကြောင်း ရခိုင်အမျိုးသားပါတီမှ ပြည်သူ့လွှတ်တော်ကိုယ်စားလှယ် ဦးဖေသန်း က ပြောကြားထားသည်။

“ကျွန်တော်ကတော့ တော်တော် စိတ်မကောင်းဘူး။ ဒီဥပဒေ ပြဋ္ဌာန်းလို့ကို NLD အစိုးရသိက္ခာ ဘာမှတက်လာမှာ မဟုတ်ဘူး။ ပိုပြီးတောင် တိုင်းရင်းသားတွေအတွက် သံသယစိတ်တွေ ဝင်သွားတာပဲ ရှိတယ်။ တစ်ဖက်က ချင်းထည့်တာလား ဆိုတာတောင် သံသယ ဖြစ်လာတယ်” ဟု ပြည်သူ့လွှတ်တော် ကိုယ်စားလှယ် ဦးဖေသန်းက ပြောကြားသည်။

ထို့ပြင် ရှမ်းတိုင်းရင်းသားများ ဒီမိုကရေစီအဖွဲ့ချုပ်ပါတီမှ တွဲဖက် အထွေထွေအတွင်းရေးမှူး (၂) စိုင်းကျော်ညွန့်က “ဒီဥပဒေက ဖက်ဒရယ်စနစ်ကို အကောင်အထည်ဖော်မယ်ဆိုတဲ့ အစိုးရက ပြဒါးတစ်လမ်း သံတစ်လမ်း သွားနေတယ်ဆိုတာကို ပြသရာ ရောက်တယ်။ ပါးစပ်ကတော့ ဖက်ဒရယ် ဆိုပြီးတော့” ဟု ပြောကြားထားသည်။

မြန်မာနိုင်ငံ လွှတ်တော်အဖွဲ့ဥပဒေကို ဖေဖော်ဝါရီ ၈ ရက်က ပြဋ္ဌာန်းခဲ့ပြီး မြန်မာနိုင်ငံ လွှတ်တော်အဖွဲ့ကို ဥက္ကဋ္ဌအဖြစ် ပြည်ထောင်စုလွှတ်တော် နာယက၊ ဒုတိယဥက္ကဋ္ဌအဖြစ် ပြည်သူ့လွှတ်တော်ဥက္ကဋ္ဌ သို့မဟုတ် အမျိုးသားလွှတ်တော်ဥက္ကဋ္ဌ၊ အဖွဲ့ဝင်အဖြစ် ပြည်သူ့လွှတ်တော် ဒုတိယဥက္ကဋ္ဌ သို့မဟုတ် အမျိုးသားလွှတ်တော် ဒုတိယဥက္ကဋ္ဌ၊ အဖွဲ့ဝင်များအဖြစ် တိုင်းဒေသကြီးလွှတ်တော် သို့မဟုတ် ပြည်နယ်လွှတ်တော် ဥက္ကဋ္ဌများ၊ အတွင်းရေးမှူးအဖြစ် ပြည်ထောင်စုလွှတ်တော် ဒုတိယနာယကဖြင့် ဖွဲ့စည်းရမည် ဖြစ်သည်။