အမျိုးသားဒီမိုကရေစီအဖွဲ့ချုပ်ပါတီတွင် ပုဂ္ဂိုလ်ရေးမဲဆွယ်စည်းရုံးမှုများအစား ပါတီအတွက် စည်းရုံးရေးဆင်းရမည်ဖြစ်ပြီး ပြည်သူလူထုနှင့်ဆက်ဆံရာတွင် နှိမ်ချဆက်ဆံရန် ပဲခူးတိုင်းဒေသကြီး အနောက်ပိုင်းလွှတ်တော် ကိုယ်စားလှယ်လောင်းများအား ဒေါ်အောင်ဆန်းစုကြည်က မှာကြားခဲ့ကြောင်း သတင်းရရှိသည်။ပဲခူးတိုင်းဒေသကြီး အနောက်ပိုင်း ပြည်ခရိုင် ပြည်မြို့နယ်သို့ ဒေါ်အောင်ဆန်းစုကြည်သည် သြဂုတ် ၁၀ ရက် ည ၆ နာရီခွဲကရောက်ရှိခဲ့ပြီး သြဂုတ် ၁၁ ရက် နံနက်ပိုင်းက မင်္ဂလာဥယျာဉ်ဟိုတယ်ခန်းမတွင် လွှတ်တော်ကိုယ်စားလှယ်လောင်းများနှင့် နံနက် ၈ နာရီမှစ၍ ၉ နာရီ မိနစ် ၂၀ အထိ တွေ့ဆုံအမှာစကားပြောကြားခဲ့ခြင်းဖြစ်သည်။"အန်တီဆိုလိုချင်တဲ့ဟာကတော့ ဒီနေ့အပြောင်းအလဲဖြစ်ဖို့အတွက် ရွေးကောက်ပွဲဟာအရေးကြီးတယ်။ ကိုယ်စားလှယ်လောင်းတွေရော၊ အောင်နိုင်ရေးတွေရော၊ အလုပ်အမှုဆောင်တွေရောက ပါတီအောင်နိုင်ရေးကို တကယ်ကိုပဲအားသွန်ခွန်စိုက်လုပ်ကြဖို့ အဓိကအားဖြင့် ကိုယ်စားလှယ်လောင်းတွေကို ပြည်သူတွေနဲ့ဆက်ဆံတဲ့အခါမှာ နှိမ်ချပြီးတော့ဆက်ဆံဖို့ နောက်တစ်ခုက ညီညွတ်ရေးအရေးကြီးကြောင်း ကိုယ်စားလှယ်လောင်းအားလုံး ပါတီစည်းရုံးရေးဆင်းတဲ့အခါမှာ ပုဂ္ဂိုလ်ရေးစည်းရုံးရေးကိုမဆင်းပါနဲ့။ ပါတီအောင်နိုင်ရေးကိုပဲ စည်းရုံးကြပါဆိုပြီး အဓိကမှာကြားသွားပါတယ်" ဟု အမျိုးသားဒီမိုကရေစီအဖွဲ့ချုပ်ပါတီ ပြည်ခရိုင်အလုပ်အမှုဆောင် အတွင်းရေးမှူး ဦးမြင့်သန်းထွန်းကဆိုသည်။အဆိုပါမှာကြားသွားမှုအခြေအနေများနှင့်ပတ်သက်၍ ပြည်ခရိုင် ပန်းတောင်းမြို့နယ် မဲဆန္ဒနယ်အမှတ် (၁) မှ တိုင်းဒေသကြီး လွှတ်တော်ကိုယ်စားလှယ်အဖြစ် ဝင်ရောက်အရွေးခံမည့် အထက်တန်းရှေ့နေ ဒေါ်ဇင်မိုးထိုက်ကလည်း "လူပုဂ္ဂိုလ်အနေနဲ့ စည်းရုံးရေးမဆင်းဖို့ အဓိကအားဖြင့် ပါတီအောင်နိုင်ရေးကိုပဲလုပ်ဖို့၊ အားလုံးညီညီညွတ်ညွတ်လုပ်ကြဖို့ အရင်တုန်းကမတည့်တာတွေရှိခဲ့ရင်လည်း အခုချိန်မှာလက်တွဲပြီး ညီညီညွတ်ညွတ်လုပ်ကြဖို့လိုကြောင်း အဓိကဇောင်းပေးပြောသွားခဲ့ပါတယ်" ဟုပြောကြားသည်။အမျိုးသားဒီမိုကရေစီအဖွဲ့ချုပ်ပါတီအနေဖြင့် ပဲခူးတိုင်းဒေသကြီး အနောက်ပိုင်းအတွင်းမှ အမျိုးသားလွှတ်တော်ကိုယ်စားလှယ် ခြောက်ဦး၊ ပြည်သူ့လွှတ်တော်ကိုယ်စားလှယ် ၁၄ ဦး၊ တိုင်းဒေသကြီးလွှတ်တော်ကိုယ်စားလှယ် ၂၈ ဦး ဝင်ရောက်ရွေးကောက်ခံမည်ဖြစ်ကြောင်း သိရသည်။
ပုဂ္ဂိုလ်ရေးမဲဆွယ်စည်းရုံးမှုများအစား ပါတီအတွက် စည်းရုံးရေးဆင်းရမည်ဖြစ်ပြီး ပြည်သူလူထုနှင့်ဆက်ဆံရာတွင် နှိမ်ချဆက်ဆံရန် လွှတ်တော်ကိုယ်စားလှယ်လောင်းများအား ဒေါ်အောင်ဆန်းစုကြည်မှာကြား
