ရွှေပြည်သာမြို့နယ် ဗိုလ်ချုပ်လမ်းနှင့်ငွေလမ်းထောင့်ရှိ ဆိုင်ခန်းတွဲငါးခန်း မီးလောင်ကျွမ်းမှု နိုဝင်ဘာ ၂၉ ရက် နံနက်ပိုင်းက ဖြစ်ပွားခဲ့ကြောင်း သိရသည်။
နိုဝင်ဘာ ၂၉ ရက် နံနက် ၁၁ နာရီကျော်ခန့်တွင် ရွှေပြည်သာမြို့နယ်၊ ၅/၃ ရပ်ကွက်၊ ဗိုလ်ချုပ်လမ်းနှင့် ငွေလမ်းထောင့်တွင် မီးလောင်ကျွမ်းမှုဖြစ်ပွားကြောင်း သတင်းရသဖြင့် သက်ဆိုင်ရာမီးသတ်တပ်ဖွဲ့မှ သွားရောက်ခဲ့ကြောင်း သိရသည်။
အဆိုပါလမ်းထောင့်ရှိ ဆိုင်ခန်းတွဲငါးခန်းမီးလောင်ကျွမ်းခဲ့ခြင်းဖြစ်ကြောင်း မီးလောင်ရာသို့ ရောက်ရှိခဲ့သည့် မီးသတ်တပ်ဖွဲ့ဝင်တစ်ဦး၏ ပြောကြားချက်အရ သိရသည်။
“ဆိုင်ခန်းတွဲငါးခန်းလောင်တာပါ။ ကားဘထ္ထရီဆိုင်၊ အလှပြင်ဆိုင်၊ ကားဝါယာရိန်းနဲ့ အခြားဆိုင်နှစ်ဆိုင်ပါ။ အဓိကကတော့ ဆိုင်ခန်းတွေ လောင်တာပါ။ ကြီးကြီးမားမားတော့ ထိခိုက်တာမရှိပါဘူး” ဟု မီးလောင်ရာသို့ ရောက်ရှိခဲ့သည့် မီးသတ်တပ်ဖွဲ့ဝင်တစ်ဦးက ပြောကြားသည်။
မီးလောင်မှုအား မီးသတ်တပ်ဖွဲ့မှ Level 1 အဆင့်မီးငြိှမ်းသတ်ခဲ့ပြီး မီးလောင်ကျွမ်းရာနေရာသို့ ပရဟိတအဖွဲ့များမှလည်း လာရောက်ကူညီရေးလုပ်ငန်းများ ဆောင်ရွက်ခဲ့ကြောင်း သိရသည်။
ဓာတ်ပုံ - Leo Leo
