ကျိုက်ထိုမြို့နယ်အတွင်းရှိ ကျေးရွာအချို့တွင် လက်နက်ကြီးကျည်ကျရောက်မှုကြောင့် ဒေသခံများ ထွက်ပြေးတိမ်းရှောင်နေရကြောင်း ကရင်အမျိုးသားအစည်းအရုံး(KNU) ဗဟိုက ထုတ်ပြန်သည်။
ယင်းထုတ်ပြန်ချက်တွင် ကျိုက်ထိုမြို့နယ်အတွင်းရှိ ဇီးပြောင်းကျေးနယ်အုပ်စုနှင့် ပျဉ်းကတိုးကုန်း ကျေးနယ်အုပ်စုများတွင် လက်နက်ကြီးကျည်ကျရောက်မှုကြောင့် ယင်းကျေးရွာမှ ဒေသခံများ ထွက်ပြေးတိမ်းရှောင်နေရကြောင်း ဖော်ပြထားသည်။
ဇူလိုင် ၉ ရက် ည ၁၀ နာရီခန့်က လက်နက်ကြီးကျည်ကျရောက်ခဲ့သဖြင့် ဇီးပြောင်းကျေးနယ်အုပ်စုရှိ ကညင်အိုင်၊ ကျောက်ရေတွင်း၊ ဇီးပြောင်းကျေးရွာများမှ ဒေသခံအချို့ ထွက်ပြေးတိမ်းရှောင်နေရကြောင်း KNU ဗဟိုထုတ်ပြန်ချက်တွင် ဖော်ပြထားသည်။
ထို့အတူ ဇူလိုင် ၁၀ ရက် ညနေပိုင်းတွင်လည်း ပျဉ်းကတိုးကုန်းကျေးနယ် ရွှေဖြူအနီးတွင် လက်နက်ကြီးကျည်ကျရောက်ခဲ့ရာ ဒေသခံများ ထိခိုက်မှုမရှိသေးသော်လည်း ထွက်ပြေးတိမ်းရှောင်နေကြရကြောင်း ပါရှိသည်။
