ဘီလင်းမြို့နယ် ကြသောင်းဆိပ်ကျေးရွာ BGF စခန်းအား KNLA နှင့် PDF ပူးပေါင်းအဖွဲ့က ဝင်ရောက်တိုက်ခိုက်ခဲ့ရာတွင် နှစ်ဖက်သေဆုံးနှင့် ဒဏ်ရာရရှိသူများရှိဟု ဒီဇင်ဘာ ၁၈ ရက်တွင် ကရင်အမျိုးသားအစည်းအရုံး (KNU) သတင်းနှင့်ပြန်ကြားရေးဌာနက သတင်းထုတ်ပြန်ချက်အရ သိရသည်။
ကြသောင်းဆိပ်ကျေးရွာရှိ BGF-၁၀၁၃ တပ်စခန်းအား KNU လက်အောက်ခံ ကရင့်အမျိုးသားလွတ်မြောက်ရေးတပ်မတော် (KNLA) တပ်မဟာ (၁)၊ တပ်ရင်း(၁)နှင့် PDF ပူးပေါင်းတပ်ဖွဲ့များက ဒီဇင်ဘာလ ၁၇ ရက် နံနက် ၆ နာရီ၌ စတင်တိုက်ခိုက်ခဲ့ပြီး ည ၉ နာရီခွဲ၌ BGF-၁၀၁၃ စခန်းအား KNLA ပူးပေါင်းတပ်ဖွဲ့က သိမ်းယူနိုင်ခဲ့ကြောင်း KNU ၏ သတင်းထုတ်ပြန်မှုအရ သိရသည်။
ထို့ပြင် အဆိုပါတိုက်ပွဲအတွင်း ကြသောင်းဆိပ် BGF စခန်းကို ပစ်ကူပေးသည့်အနေဖြင့် ကတိုင်ဒိ BGF စခန်းမှ လက်နက်ကြီးများဖြင့် ပစ်ခတ်မှုများကြောင့် ကျေးရွာအတွင်းရှိ လူနေအိမ်များ ပျက်စီးမှုရှိခဲ့သည်ဟု KNU ပြန်ကြားရေးဌာန၏ သတင်းထုတ်ပြန်ချက်တွင် ဖော်ပြပါရှိသည်။
BGF စခန်းအား သိမ်းယူပြီးနောက် စခန်းအတွင်းရှိ ကျန်ရှိနေသေးသော ပစ္စည်းများ၊ တဲအိမ်များအား ည ၁၀ နာရီအချိန်၌ KNLA ပူးပေါင်းတပ်ဖွဲ့က မီးရှို့ရှင်းလင်းခဲ့ကြောင်း၊ ယခုတိုက်ပွဲတွင် BGF ဖက်မှ နှစ်ဦး သေဆုံးကာ ငါးဦးထိခိုက်ဒဏ်ရာရခဲ့ပြီး KNLA ပူးပေါင်းတပ်ဖွဲ့မှတစ်ဦးသေ၊ သုံးဦး ဒဏ်ရာရရှိခဲ့ကြောင်း KNU သတင်းထုတ်ပြန်ချက်အရ သိရသည်။
ကြသောင်းဆိပ်စခန်းအား ၁၉၉၃ ခုနှစ်ခန့်က တပ်မတော်လက်အောက်ခံတပ်များက လာရောက်တပ်စွဲထားခဲ့ပြီး နောက်ပိုင်းတွင် BGF တပ်ဖွဲ့များကိုသာ စေလွှတ်၍ စခန်းချစေခဲ့ခြင်းဖြစ်ကြောင်း KNU ၏ သတင်းထုတ်ပြန်မှုအရ သိရသည်။
ကရင်ပြည်နယ် မြဝတီမြို့နယ်ရှိ လေးကေ့ကော်မြို့တွင် တပ်မတော်ဘက်မှ ဝင်ရောက်ရှာဖွေဖမ်းဆီးမှုများ ပြုလုပ်ပြီးနောက် တပ်မတော်နှင့် KNLA အကြား ပစ်ခတ်မှုများ ဖြစ်ပွားခဲ့ခြင်းဖြစ်သည်။
လေးကေ့ကော်ဖြစ်စဉ်အပါအဝင် လက်ရှိဖြစ်ပွားနေသာ အခြေအနေများနှင့်ပတ်သက်၍ တပ်မတော်က သတင်းထုတ်ပြန်ခြင်း မရှိသေးပေ။
