ဂျာမနီနိုင်ငံသည် နိုင်ငံလုံးဆိုင်ရာ ရွေးကောက်ပွဲများ ကျင်းပနေသည့် ‘အဟော့ဆုံးအချိန်’ ကို ယခုဖြတ်သန်းလျက်ရှိသည်။ ရွေးကောက်ပွဲရာသီတို့၏ ထုံးစံအတိုင်း ကိုယ်စားလှယ်လောင်းတို့၏ ကိုယ့်ကိုယ်ကိုယ် သတိထားခံရအောင် လူမြင်သူမြင် ပြထားသည့် ကြော်ငြာများ၊ ဘေဘုတ်များနှင့် မဲပေးရန် နှိုးဆော်နေကြသည်။ သာမန်အခြေအနေအတိုင်းဆိုလျှင် ဂျာမနီ၌ ပါတီတစ်ခုက မဲဆွယ်ပွဲ ပြုလုပ်ရန်အတွက် တင်းကျပ်သော ဥပဒေပြဋ္ဌာန်းချက်များရှိ၏။ သို့သော် ကိုနာဗိုင်းရပ်စ်ကပ်ရောဂါ ရင်ဆိုင်လိုက်ရသည့်အဖြစ်က မူလအခြေအနေကဲ့သို့ မဲဆွယ်နိုင်မှု အလိုအလျောက် လျော့ပါးခဲ့ပြီး နယ်ပယ်စည်းမျဉ်းများ ကျော်လွန်ကာ အွန်လိုင်းမှနေ၍ မဲဆန္ဒရှင်တို့ကို စည်းရုံးနေရပါသည်။ ဂျာမန်သတင်းစာ Die Welt က ‘ဖက်ဒရယ် ရွေးကောက်ပွဲဟူသမျှမှာ ဒီတစ်ခါပျင်းခြောက်ခြောက် အနိုင်ဆုံးလား’ ဟူ၍ သတင်းခေါင်းစဉ် တပ်ခဲ့သည်။

ဂျာမနီ၏ ခေတ်ပြိုင်နိုင်ငံရေးကို အလှုပ်အခတ်နည်းပါးသဖြင့် စိတ်မဝင်စားခဲ့သူများပင်လျှင် မကြာမီအချိန်အတွင်း အလှုပ်အယမ်းများလာနိုင်သည့် နိုင်ငံရေးမိုးလေဝသကို မျက်တွေ့လက်တွေ့ မြင်ကြရပါတော့မည်။ ၂၀၂၁ ခု၊ စက်တင်ဘာလ ၂၆ ရက်နေ့တွင် မဲဆန္ဒရှင်များသည် ဘင်းစတက်ဟုခေါ်သော နိုင်ငံလုံးဆိုင်ရာ ပါလီမန်ကိုယ်စားလှယ်များကို ရွေးချယ်ကြလိမ့်မည်။ ထိုရွေးကောက်ပွဲမှ အနိုင်ရသည့်ပါတီသည် ၁၆ နှစ်တာ ဝန်ကြီးချုပ်တာဝန်ထမ်းဆောင်ခဲ့သော အိန်ဂျလာမာကယ်၏နေရာကို အစားထိုးဆက်ခံမည် ဖြစ်သည်။ မာကယ်သည် ဂျာမန်နိုင်ငံရေးလောကတွင် နှစ်ရှည်လများ တာဝန်ထမ်းဆောင်ခဲ့ပြီး ခက်ခဲသည့်ကာလတစ်ခုကို ချန်ရစ်ကာ ရန်သူများရော၊ မိတ်ဆွေများကိုပါ နှုတ်ဆက်လျက် လူမြင်ကွင်းမှ ထွက်ခွာတော့မည်ဖြစ်၏။ ဂျာမနီနှင့် ဥရောပ၏ ပဋိပက္ခ အသွယ်သွယ် ရင်ဆိုင်ရချိန်အတွင်း သူ၏တည်ငြိမ်သော ဆောင်ရွက်ချက်များဖြင့် လမ်းကြောင်းမှန်စေခဲ့ပြီး သူ့ခြေရာကို မည်သူနင်းနိုင်မည်နည်း။

ရွေးကောက်ပွဲဝင်နေသည့် ပါတီခြောက်ခုက ဤမေးခွန်းကို ဖြေနိုင်ပါလိမ့်မည်။ ယခုရွေးကောက်ပွဲ၌ လက်ငင်းကောက်ယူထားသော စစ်တမ်းများအရ ဆိုရှယ်ဒီမိုကရက်တစ်ပါတီ (Social Democratic Party) ၊ မာကယ်၏ ခရစ်ယာန်ဒီမိုကရက်တစ်သမဂ္ဂ (Christian Democratic Union) နှင့် အစိမ်းရောင်ပါတီ (The Green Party) တို့မှာ ထိပ်ဆုံးပြိုင်ဘက်များ ဖြစ်ကြသည်။ သို့သော် အစိုးရဖွဲ့နိုင်သည်ထိ မည်သည့်ပါတီကမှ အပြတ်အသတ်နိုင်ရန် အလားအလာမရှိဘဲ ညွန့်ပေါင်းအစိုးရအဖြစ် ပေါ်ထွက်လာရန် ရှိနေသည်။ ဂျာမနီနိုင်ငံအတွက် အခွင့်အလမ်းကောင်းများစွာရှိနေသည့်တိုင် စိန်ခေါ်ချက်တို့ကလည်း မနည်းမနောရှိပါ၏။ နှစ်နိုင်ငံ ပြန်လည်ပေါင်းစည်းခဲ့သည့် နှစ် ၃၀ ကျော်ကာလတစ်လျှောက် ကြီးထွားလာသည့် ဒဏ်ရာဒဏ်ချက်များလည်း ရှိပါ၏။ ထပ်မံပေါ်ထွက်လာမည့် ခေါင်းဆောင်အသစ်က တိုင်းပြည်အတွက် အစီအစဉ်အသစ်ကို ယူဆောင်လာနိုင်မည်လော၊ သို့တည်းမဟုတ် မာကယ်လျှောက်ခဲ့သည့်လမ်းအတိုင်း ဆက်လက်လျှောက်လှမ်းမည်လော။

မာကယ်၏ ၁၆ နှစ်တာခရီး

မာကယ်အနေနှင့် ယခုကဲ့သို့ ကြာရှည်လေးမြင့်စွာ ဝန်ကြီးချုပ်တာဝန်ကို ထမ်းဆောင်ရလိမ့်မည်ဟု ဘယ်တုန်းကမှ မထင်ခဲ့ပါ။ အရှေ့ဂျာမနီတွင် ကြီးပြင်းခဲ့သော သင်းအုပ်ဆရာ၏ သမီးတစ်ယောက် ဖြစ်သည့်အတွက်၊ ၂၀၀၅ ခုနှစ် ဝန်ကြီးချုပ်အဖြစ် တာဝန်စတင်ထမ်းဆောင်ရချိန်၌ အရာရာကို သံသယနှင့် အကြည့်ခံခဲ့ရ၏။ သို့သော် သူသည် ၁၉၉၀ ပြည့်လွန်နှစ်များဆီကပင် ဝန်ကြီးချုပ် ဟဲလ်မိုခိုးလ်၏ လက်ရင်းတပည့်အဖြစ် ဖက်ဒရယ်အဆင့် ဝန်ကြီးတာဝန်များကို ကျေကျေညက်ညက် ထမ်းရွက်ခဲ့ဖူးသည်။ မာကယ်သည် ရူပဗေဒပညာရှင်တစ်ယောက် ဖြစ်သည့်အတွက် ဆန်းစစ်လေ့လာတတ်သူ၊ အသေးစိတ်တိကျသူ၊ ပြဿနာရပ်ကို ပြဋ္ဌာန်းထားသည့် ဖွဲ့စည်းပုံအခြေခံဥပဒေနှင့် လျော်ညီစွာ ကျင့်သုံးနိုင်အောင် ခွဲခြမ်းစိတ်ဖြာတတ်သူ ဖြစ်သည်။ ပုဂ္ဂိုလ်ရေးသွင်ပြင်အနေနှင့် အေးအေးဆေးဆေးရှိပြီး လက်တွေ့ကျကာ ကျိုးကြောင်းဆီလျော်သော ပြဿနာကို ချဉ်းကပ်တတ်မှုက သူ၏အားသာချက်ဖြစ်ပြီး၊ ဖြည်းဖြည်းချင်း လူရှိန်လောက်သည့် နိုင်ငံရေးသမားတစ်ယောက် ဖြစ်လာခဲ့၏။

ဝန်ကြီးချုပ်တစ်ယောက်အဖြစ် မာကယ်ချန်ရစ်နိုင်ခဲ့သော အဓိကနိုင်ငံရေးအမွေမှာ သူ၏ခရစ်ယာန်ဒီမိုကရက်တစ်သမဂ္ဂ (Christian Democratic Union - CDU) ကို ဂျာမနီနိုင်ငံရေးနယ်ပယ်အတွင်းသို့ တရားနည်းလမ်းကျစွာ ရှင်သန်နိုင်စေခဲ့ခြင်းဖြစ်၏။ ပါတီ၏ သဘောသဘာဝအရ ဗဟိုလက်ယာစွန်းဂိုဏ်းဂဏ ‘နွှယ်’ ခဲ့သော်လည်း မာကယ်၏ ဦးဆောင်မှုအောက်တွင် ပါတီသည် သူ့ပြိုင်ဘက် လက်ဝဲသမားတို့နှင့် အရေးကြီးကိစ္စများ၌ အောင်မြင်စွာ လက်တွဲဆောင်ရွက်နိုင်ခဲ့ သည်။ ရာဇဝင်တွင် စာတင်ကျန်ရစ်မည့် အကောင်းဆုံးဥပမာအဖြစ် ၂၀၁၁ ခုနှစ်၊ ဖူကူရှီးမား နျူကလီးယားဓာတ်ပေါင်းဖို မတော်တဆ ဖြစ်ရပ်နောက်ပိုင်းတွင် နျူကလီးယားစွမ်းအင်နှင့် ပတ်သက်၍ တစ်ဆင့်ချင်း ဖြေလျှော့သွားစေခဲ့သည့် မာကယ်၏ ဆုံးဖြတ်ချက် ဖြစ်ပါသည်။ စွမ်းအင်ကဏ္ဍ၌ နျူကလီးယားကို ပယ်ဖျက်ရေးသည် အစိမ်းရောင်ပါတီ၏ နှစ်ရှည်လများ ကြွေးကြော်သံဖြစ်ခဲ့ပြီး မာကယ်က ထို့ထက်ပို၍ တိုးချဲ့စဉ်းစားပြီး ‘စွမ်းအင်အပြောင်းအလဲ’ (Energiewende) မှသည် ပြန်လည်သုံးစွဲနိုင်သော ရင်းမြစ်များအဖြစ် အသွင်ပြောင်းနိုင်ခဲ့၏။ CDU လား၊ အစိမ်းပါတီလား ဝေခွဲရခက်နေသော မဲပြားပိုင်ရှင်များအတွက် ဤဆောင်ရွက်ချက်က သူ့ပါတီအတွက်မဲပြားများ သိမ်းကျုံးရရှိစေခဲ့သည်။ စစ်မှုမထမ်းမနေရ ဥပဒေဖျက်သိမ်းခြင်း၊ အနည်းဆုံးလုပ်ခ မြှင့်တင်ခြင်းနှင့် ကိုရိုနာဗိုင်းရပ်စ်ကပ်ရောဂါ ရင်ဆိုင်ခြင်းတို့၌ မာကယ်သည် အလားတူဆောင်ရွက်ပုံမျိုးကို မနီးရိုးစွဲ ကျင့်သုံးခဲ့၏။

ကမ္ဘာ့နိုင်ငံရေးဇာတ်ခုံ၌ မာကယ်သည် ဥရောပ၏ ထီးလိုမင်းလိုခေါင်းဆောင်အဖြစ် ရောက်ရှိလာခဲ့သည်။ သူ၏ဂျာမနီ၏ စီးပွားရေးအခြေခိုင်မှုကို ခြေကုပ်ယူကာ ဒေသတွင်းလုံခြုံရေးနှင့် စီးပွားရေးဆက်သွယ်မှုများကို ထိန်းထားနိုင်ခဲ့၏။ မဟာအင်အားကြီးနိုင်ငံများဖြစ်သည့် အမေရိကန်ပြည်ထောင်စု၊ ရုရှားနှင့် တရုတ်တို့အကြား စစ်အေးကာလက တည်ရှိခဲ့သော ထိပ်တိုက်ရင်ဆိုင်မှုမျိုးကို ရှောင်ရှားစေကာ အလယ်အလတ်ကျသည့် ‘ခွင်’ ၌ မာကယ်နေရာယူနိုင်ခဲ့သည်။

မာကယ်၏ မဟာဗျူဟာမှာ ချိန်ခွင်လျှာညီမျှရေးဖြစ်၏။ တရုတ်သည် ဂျာမနီ၏ အကြီးဆုံးကုန်သွယ်ဖက်နိုင်ငံ ဖြစ်သည့်အတွက် သူ့အစိုးရသည် လူ့အခွင့်အရေးဆိုင်ရာ ကိစ္စရပ်များအတွက် ဘေဂျင်းကို ဘယ်သောအခါမှ ဖိအားမပေးခဲ့ပါ။ တစ်ဖန် ဥရောပသမဂ္ဂ၏ ဆိုက်ဘာလုံခြုံရေးမူကို လေးစားလိုက်နာသောအားဖြင့် ဂျာမနီဆက်သွယ်ရေး လောက၌ ဟွာဝေး၏ 5G တပ်ဆင်မှုကို ယခုအချိန်ထိ ခွင့်မပြုသေးပါ။

ထို့နည်းတူ ရုရှားနှင့် ဆက်ဆံရေးတွင်လည်း Nord Stream 2 ဓာတ်ငွေ့ပိုက်လိုင်း စီမံချက်အရ စီးပွားရေးနှင့် စွမ်းအင်ကဏ္ဍ အဆက်အစပ်ရှိခဲ့သော်လည်း ၂၀၁၄ ခုနှစ် ရုရှားတို့ ခရိုင်းမီးယားကို တိုက်ခိုက်သိမ်းပိုက်သည့်အခါ ဂျာမနီ၏ ပိတ်ဆို့မှုကို တိုးမြှင့်ခဲ့၏။ ယခုနှစ်ဦးပိုင်း ရုရှားအတိုက်အခံခေါင်းဆောင် ပလက်ဇီနာဗာညီ အဆိပ်မိသောအခါ ဆေးကုသခံ ဒုက္ခသည်တစ်ယောက်အဖြစ် ဂျာမနီက လက်ခံခဲ့သည်။

တစ်ချိန်တည်းမှာပင် ၁၆ နှစ်တာ ဝန်ကြီးချုပ်သက်တမ်းအတွင်း ၀ါရှင်တန်နှင့် မော်စကိုတို့ ဆက်ဆံရေးဆိုးရွားလာသည့်အခါတိုင်း မာကယ်သည် ချစ်ကြည်ရေး တံတားတစ်စင်းအဖြစ် အကြိမ်ကြိမ် အကျိုးဆောင်ပေးခဲ့ပါ၏။

ဂျာမန်အများစု၏စိတ်ထဲတွင် မာကယ်၏ အကြီးမြင့်ဆုံးသော ဂုဏ်ရည်အဖြစ် ကပ်ဆိုက်ချိန်၊ ပဋိပက္ခဖြစ်ချိန်ကို အောင်အောင်မြင်မြင် ပဲ့ကိုင်နိုင်စွမ်းရှိသော စီမံခန့်ခွဲသူဟု သတိရနေကြပါလိမ့်မည်။ ၂၀၀၉ ခုနှစ်အတွင်း ဥရောပနိုင်ငံများ ကြွေးပူမိချိန်တွင် မာကယ်သည် ဂရိနိုင်ငံအတွက် ဥရောပသမဂ္ဂ၏ ဘဏ္ဍာရေး ကျားကန်ပေးသည့် အစီအမံကို ဦးဆောင်ကိုင်တွယ်ပေးခဲ့ရာ အခက်အခဲကြားမှ ကယ်တင်နိုင်ခဲ့သည့်အတွက် လက်ခုပ်သံများ ရရှိခဲ့၏။ အမေရိကန်ပြည်ထောင်စု၌ ဒေါ်နယ်ထရန့် သမ္မတဖြစ်လာသည့်အခါ အတ္တလန္တိတ်သမုဒ္ဒရာကို ကျော်လွန်ပြီး သြဇာချဲ့ထွင်လိုသည့် အဆင်အကွက်များ မြင်လာကြချိန်တွင် ထိုခြေလှမ်းအပေါ်ဟာ ကွက်နင်းနိုင်မည့်သူမှာ မာကယ်သာဖြစ်ကြောင်းအများက မြင်ကြသည်။ ထိုထင်မြင်ချက် မှန်ကန်ကြောင်းကို ၂၀၀၈ ခုနှစ်အတွင်း ကနေဒါ၌ ကျင်းပခဲ့သော G-7 ထိပ်သီး အစည်းအဝေးက ထွက်ပေါ်လာသည့် ဓာတ်ပုံတစ်ပုံက သက်သေပြလိုက်သည်။ ကမ္ဘာ့ခေါင်းဆောင်များ ဝန်းရံလျက်ရှိသော၊ မာကယ်ကစားပွဲကို လက်ထောက်ကာ မတ်တတ်ရပ်လျက် အနေအထားဖြင့် ထိုင်နေသည့် စိတ်တိုတတ်သူ ထရန့်ကို စိုက်ကြည့်နေသော ပုံဖြစ်၏။

မာကယ်၏ ခေါင်းဆောင်မှုသက်တမ်းတစ်လျှောက် အခက်ခဲဆုံး ပြဿနာအဖြစ် ဥပမာပေးမည်ဆိုလျှင် ၂၀၁၅ ခုနှစ် ဒုက္ခသည်များ ဝင်ရောက်ချိန် နိုင်ငံရေးအကျပ်အတည်းဟု ဆိုရမည်။ ဆီးရီးယား၊ အီရတ်နှင့် အာဖဂန်နစ္စတန်တို့မှ ဒုက္ခသည်ရာထောင်ချီလျက် ဥရောပတိုက်သို့ ဝင်ရောက်လာခဲ့ကြ၏။ အစပိုင်းတွင် ဟန်ဂေရီက လက်မခံခဲ့သဖြင့် အနောက်ဘက်နိုင်ငံများသို့ ဆက်ရွှေ့လာခဲ့ကြ၏။ ထိုအချိန်တွင် မာကယ်၏ “ငါတို့ ဒါကိုလုပ်နိုင်တယ်” (“Wir schaffen das”_“We Can do this”) ဟူသော ကြေညာချက် ထွက်ပေါ်လာပြီး ပဋိပက္ခအတွင်း လူသားချင်းစာနာ ထောက်ထားမှုဆိုင်ရာ အကောင်းမြင် သဘောထားကို ဖြစ်ထွန်းစေကာ ဥရောပတိုက်ကို ညီညွတ်စေခဲ့၏။ ဟန်ဂေရီတွင် ပိတ်မိနေသည့် နိုင်ငံပျောက်နေသော ခိုကိုးရာမဲ့ ဒုက္ခသည်များကို ဂျာမနီနိုင်ငံအတွင်းထောင်ချီ၍ လက်ခံပေးခဲ့ပြီး ၂၀၁၅ နှစ်ကုန်၌ စုစုပေါင်း ဒုက္ခသည် ၈၉၀,၀၀၀ ခန့် လက်ခံခဲ့ပြီး ဖြစ်ပါသည်။

အစပိုင်းတွင် မာကယ်၏ဆုံးဖြတ်ချက်ကို ဂျာမနီမှ သူ့ကိုကြိုက်သူများနှင့် ကမ္ဘာကပါ ကြိုဆိုခဲ့ကြ၏။ သူ့နိုင်ငံအတွက် ပြည်တွင်းစစ်ကြောင့် ပြေးလာသူများထံမှ ‘ထုံးတမ်းဓလေ့သစ်များကို ကြိုဆိုနိုင်ခဲ့ခြင်း’ အဖြစ် နမူနာအပြကောင်းခဲ့သည်။ သို့သော် ဤသို့သော ဟုတ်ယောင်ထင် ပျော်ရွှင်ချိန်မှာ တိုတောင်းလှ၏။ မကြာမီ ‘မြောက်အာဖရိကန်အာရပ်’ အမျိုးသားတစ်ယောက်၏ မုဒိမ်းမှုနှင့် ကိုလုံးမြို့၌ ခိုးမှုပေါ်ပေါက်ခဲ့ရာ ဂျာမန်အချို့က မာကယ်၏ တံခါးဖွင့်ဝါဒအပေါ် စိတ်အချဉ်ပေါက်လာခဲ့ကြသည်။ ပြည်သူတို့အနေနှင့် လက်သင့်ခံလိုက်ရသော ဧည့်သည်များအတွက် သူတို့နစ်နာပုံများကို သတင်းဖော်ထုတ်ပြသခဲ့၏။ ဤသို့သော လက်သင့်ခံရန်ခက်ခဲသည့် စိုးရိမ်ဖွယ်မာကယ်၏မူဝါဒများမှာ လက်ယာစွန်း AfD (Alternative for Germany party - AfD) ပါတီအတွက် ဝေဖန်စရာအကွက်ကောင်း ရသွားခဲ့သည်။

မာကယ်ကို မကြိုက်ကြသည့် ကွန်ဆာဗေးတစ် ဂျာမန်များက CDU မှလွဲ၍ သူတို့အတွက် ‘ရွေးစရာမရှိ’ ဖြစ်နေသည်ကို နှစ်ပေါင်းများစွာ ပြောလာခဲ့ကြသည်။ ၂၀၁၃ ခုနှစ်တွင် ထူထောင်လာခဲ့သည့် AfD သည် ဥရောပသမဂ္ဂ၊ ယူရိုငွေကြေးနှင့် ဂရိနိုင်ငံအပေါ် ကယ်တင်ပေးခြင်းတို့ကို ဆန့်ကျင်သည့်ပါတီဖြစ်၏။ မာကယ်၏ လူဝင်မှုကြီးကြပ်ရေး မူဝါဒကိုလည်း ဆန့်ကျင်ကာ ‘ဂျာမနီသည် ဂျာမန်တို့အတွက်သာ’ ဖြစ်ရမည်ဟု ခံယူချက်ရှိသည်။ ထို့ကြောင့် ၂၀၁၇ ခုနှစ် ရွေးကောက်ပွဲ၌ CDU အတွက် ပ့ံပိုးမဲမှာ ၈ ဒသမ ၆ ရာခိုင်နှုန်းထိ ထိုးကျသွားပြီး AfD သည် ပါလီမန်ဝင်ရောက်ရန် အနည်းဆုံးလိုအပ်သည့် မဲငါးရာခိုင်နှုန်းကို ကျော်လွန်ရရှိခဲ့၏။

မာကယ်သည် အဝေဖန်အကဲ့ရဲ့ မခံရသူတော့မဟုတ်ပါ။ သူ့ကိုဝေဖန်သူအများစုက ပြဿနာများကို ဖြေရှင်းသည့်အခါတိုင်း မာကယ်သည် အပြောင်းအလဲလုပ်ရန် အခွင့်သာပါလျက်၊ ‘မြွေမသေ တုတ်မကျိုး’ အခြေအနေမျိုးကိုသာ ပြန် ‘လည်’ သွားတတ်သူဟု ဆိုပါသည်။ မူဝါဒရေးရာ ပြဿနာများတွင် ဂျာမန်ပြည်သူတို့ ပေးသည့်အကြံဉာဏ်ကို ဥပေက္ခာပြုခဲ့သည့်အတွက် စစ်မှန်သောခေါင်းဆောင်မှုကို သူဘယ်အခါမှ မပြနိုင်ခဲ့ဟုလည်း ဆိုကြပြန်ပါသည်။ တစ်ဖန် CDU သည် ‘သက်ကြီးပိုင်း နိုင်ငံရေး’ ကိုသာ အာရုံစိုက်သည့်အတွက် လူငယ်မျိုးဆက်သစ်များအတွက် စဉ်းစားပေးသည့် အရေးကိစ္စများ၌ လစ်ဟင်းခဲ့သည်ဟု ဝေဖန်ကြ၏။ ဂျာမနီသည် ဗျူရိုကရက်ယန္တရားအတွင်း တဝဲလည်လည်ဖြစ်ကာ ‘အရွယ်ကျလျက်’ ရှိပြီး ပြည်သူ့ရေးရာဝန်ဆောင်မှုများကို ဒစ်ဂျစ်တယ်ခေတ်နှင့် အမီလိုက်ဖို့ လိုအပ်နေပါသည်။ သူ၏ ၁၆ နှစ်တာသက်တမ်းတွင် အကောင်းချည်းဟု မြင်ကြရန် အပြင်ပန်းအားဖြင့် ပြသခဲ့သော်ငြား နောက်ကွယ်တွင်တော့ သူ့ပါတီအတွင်း ပြိုင်ဘက်ဖြစ်လာနိုင်သူများကို အပြတ်ရှင်း၍ အေးရာအေးကြောင်း ဖန်တီးခဲ့သည့် အကျိုးဆက်အဖြစ် ယခုသူ ‘နား’ ချိန်တွင် ဆက်ခံနိုင်သူ တူတူတန်တန် မထားနိုင်ခဲ့ပါ။

၂၀၁၇ ခုနှစ် ရွေးကောက်ပွဲရလဒ်များ မျှော်လင့်သလို ဖြစ်မလာသည့်အတွက် CDU ၏ အနာဂတ်အတွက် ပါတီတွင်း အကြိတ်အနယ် ဆွေးနွေးခဲ့ကြသည်။ AfD သို့ ကူးပြောင်းသွားသော မဲဆန္ဒရှင်များကို မည်သို့ပြန်လည် ဆွဲဆောင်မည်နည်း၊ မာကယ်ကိုယ်တိုင် ဗဟိုလက်ယာစွန်း၌ ဆက်လက်ရပ်တည်မည်လောစသည့် မေးခွန်းများ ထွက်ပေါ်လာ၏။ နောက်တစ်နှစ်အကြာတွင် ရှင်းလင်းသည့်အဖြေ ထွက်လာခဲ့သည်။ CDU ခေါင်းဆောင်အဖြစ်မှ နုတ်ထွက်မည်ဖြစ်ကြောင်းနှင့် သူ့အရိုက်အရာကို တပည့်ရင်းတစ်ယောက်ဖြစ်သော အန်နီဂရက်ကရန့် ကာစင်ဘာဝါ (Annegret Kramp – Karrenbauer-AKK) အား ဆက်ခံစေမည်ဟု မာကယ်ကြေငြာခဲ့၏။

လူအများသိကျွမ်းပြီးဖြစ်သည့် AKK ကို ပါတီတွင်းရာထူးတိုးပေးလိုက်ခြင်းဖြင့် ပါတီအနေနှင့် မူလနှုန်းစံမပျက် ကောင်းမွန်စွာ ရှေ့ဆက်နိုင်လိမ့်မည်ဟု ယူဆကြပါသည်။ သို့သော်လည်း AKK ၏ တာဝန်ယူရချိန်မှာလည်း တစ်နှစ်ကျော်သာရှိခဲ့ပြီး မာကယ့်စိတ်ကြိုက် နောက်တစ်ယောက်ဖြစ်သည့် အာမင်လက်စ်ချက်နှင့် အစားထိုးခဲ့၏။ သူသည် လက်ရှိရွေးကောက်ပွဲတွင် CDU ၏ ဝန်ကြီးချုပ်လောင်း ဖြစ်ပါသည်။

CDU ၏ ဥက္ကဋ္ဌဖြစ်လာသည့် လက်စ်ချတ်၏ နောက်ကြောင်းကို လိုက်လံတူးဆွကြသည့်အခါ စိတ်ပျက်ဖွယ်ရာများသွားတွေ့ရ၏။ နွေရာသီက ကောက်ခံခဲ့သော လူထုသဘောထား စစ်တမ်းများတွင် သူဦးဆောင်ခဲ့သော်လည်း လက်ရှိစုံစမ်းစစ်ဆေးမှုအရ အဂတိလိုက်စားမှု၊ သူတစ်ပါး၏အတွေးနှင့် အရေးကို မိမိကိုယ်ပိုင်ဖြစ်သယောင် ဟန်ဆောင်လိမ်ညာခဲ့မှုများက ဆက်တိုက်ဆိုသလို ထွက်ပေါ်လာခဲ့ရာ သူ့အတွက်သွေးရူးသွေးတန်း အခြေအနေဟု ဆိုရပေမည်။ တစ်ဖန် မဲဆန္ဒရှင်များအနေနှင့် သူ့အပေါ် လူသစ်တစ်ယောက်အဖြစ် တက်တက်ကြွကြွ အားမပေးချင်ကြသလို မာကယ်၏အမှတ်တံဆိပ် အရည်အသွေးနှင့် နှစ်ပရိစ္ဆေဒ ကြာမြင့်မှုအပေါ် စိတ်ဝင်စားမှုမှာလည်း လျော့ပါးလျက်ရှိနေကြသည်။ ရလဒ်အနေနှင့် နှစ်ပေါင်းများစွာအတွင်း CDU သည် အတိုက်အခံပါတီဘဝသို့ ပထမဆုံးအကြိမ် သက်ဆင်းရတော့မည်။ မာကယ်၏ အောင်မြင်မှုမှာလည်း စူးရှထက်မြက်သော နိုင်ငံရေးအမြင်ဆိုသည်ထက် ပုဂ္ဂိုလ်ရေးကိုးကွယ်မှုကြောင့်သာ သံမဏိရှည်ခဲ့ခြင်းဟု သုံးသပ်ရပါတော့မည်။