ရှမ်းပြည်နယ် (မြောက်ပိုင်း) ကျောက်မဲမြို့အနီးတွင် အောက်တိုဘာ ၉ ရက် ည ၈ နာရီဝန်းကျင်ခန့်တွင် လက်နက်ကြီး၊ လက်နက်ငယ်ပစ်ခတ်သံများ ကြားနေရကြောင်း ဒေသခံများက ဆိုသည်။
အဆိုပါ ပစ်ခတ်မှုကြောင့် ကျောက်မဲမြို့အနီးရှိ ကျွဲကုန်းကျေးရွာအတွင်းသို့ လက်နက်ကြီးကျည်ကျရောက်ခဲ့ကာ ဂိုထောင်တစ်လုံး ပျက်စီးခဲ့ရပြီး အသက် (၂၅) နှစ်အရွယ် အမျိုးသမီးတစ်ဦး လက်နက်ကြီးကျည်စထိမှန် ဒဏ်ရာရရှိခဲ့ကြောင်း သိရသည်။
“ လက်နက်ကြီးကျတာက အိမ်တချို့ ထိမှန်ပျက်စီးသွားတယ်။ အမျိုးသမီးတစ်ဦး လက်နက်ကြီး ကျည်စထိမှန်ပြီး စိုးရိမ်စရာ မလိုလောက်တဲ့ ဒဏ်ရာရတယ်။ ပထမတော့ လက်နက်ငယ်သံတွေကြားရတယ်။ နောက်တော့ လက်နက်ကြီးသံတွေကြားရတယ်။ ဒါနဲ့သူတို့လည်း ထွက်မကြည့်ရဲဘူးလို့ ပြောတယ်။ တော်တော်ကြာငြိမ်သွားပြီးမှ လက်နက်ကြီးတွေကျတာတဲ့။ အဲဒီရွာထဲက လူတွေလည်း အိမ်ထဲမှာပဲ ဝပ်နေကြတာ” ဟု ကျောက်မဲမြို့နေသူ ဒေသခံတစ်ဦးက ပြောကြားသည်။
အောက်တိုဘာ ၃ ရက်မှ စတင်ကာ တပ်မတော်နှင့် ရှမ်းပြည်ပြန်လည်ထူထောင်ရေးကောင်စီ RCSS တို့ ကျောက်မဲမြို့နယ်အတွင်း နေ့စဉ်နီးပါးထိတွေ့တိုက်ပွဲများ ဖြစ်ပွားခဲ့ပြီးနောက် တိုက်ပွဲရှောင်သူဦးရေမှာ အောက်တိုဘာ ၉ ရက် နောက်ဆုံးရရှိသော သတင်းအချက်အလက်များအရ တိုက်ပွဲ ရှောင်သူဦးရေ ၃၀၀၀ နီးပါးထိရှိလာပြီဖြစ်ကြောင်း သိရသည်။
“တိုက်ပွဲရှောင်တွေအတွက် ကျန်းမာရေးလိုအပ်ချက်တွေ လိုအပ်နေတယ်။ သူတို့မှာ ဘုန်းကြီးကျောင်းမှာ ဖြစ်သလိုနေနေကြရတယ်။ တကယ်လို့များ တစ်ယောက်လောက်တာ ကိုဗစ်ဖြစ်ခဲ့ရင် မတွေးဝံ့စရာပါပဲ။ ကျွန်တော်တို့က NGO ၊ INGO အဖွဲ့တွေနဲ့ တိုက်ပွဲရှောင်တွေရှိတဲ့နေရာတွေ သွားပြီး ငွေသွားထောက်ပံ့တာပါ။ ကျွန်တော်တို့ လေးနေရာပဲသွားနိုင်ခဲ့တယ်။ ၁၀ သိန်း နှစ်နေရာနဲ့ ရှစ်သိန်းနှစ်နေရာ လှူခဲ့ပါတယ်။ Mask တွေ Hand Gel တွေနဲ့ ဆပ်ပြာတွေလည်း လှူခဲ့ပါတယ်’’ ဟု ရှမ်းလူငယ်များအဖွဲ့ (လားရှိုး) မှ ကိုစိုင်းဟန်က ပြောကြားသည်။
“ မနေ့ကတော့ နားအော်၊ နားချန်ဘက်မှာ တပ်တွေဝင်သွားတော့ အဲဒီဘက်က ရွာသားတွေက ဟဲကွီကိုပြေးလာကြတယ်။ ဟဲကွီမှာတော့ တိုက်ပွဲရှောင်တွေ ၄၀၀ ကျော်လောက် ထပ်ရောက်လာတယ်။ အဓိကတော့ သူတို့အတွက် ရေရှည်အထားခံမယ့် စားသောက်ကုန်တွေလိုတယ်။ နောက်ပြီး လက်ဆေးဆပ်ပြာတွေ၊ လက်သန့်ဆေးရည်တွေ လိုတယ်။ အမျိုးသမီး လစဉ်သုံးပစ္စည်းတွေလိုတယ်” ဟု နောင်ပိန်ကျေးရွာ ကမ်းလင့်လက်များ လူမှုကူညီရေးအသင်းမှ ကိုနေအောင်က ပြောကြားသည်။
အောက်တိုဘာ ၉ ရက် ညနေပိုင်းထိ တိုက်ပွဲရှောင်သူဦးရေမှာ ပုံဝိုးကျေးရွာတွင် ၇၁၈ ဦး၊ တောင်ထိပ်ကျေးရွာတွင် ၆၄၃ ဦး၊ နောင်ကွမ်ကျောင်းတွင် ၈၃ ဦး၊ ကောင်းလန်း ရွာတွင် ၂၄၀ ဦး၊ နားဆောင်းရွာတွင် ၁၅၀၊ ကွမ်ဟင်ကျောင်းတွင် ၄၄၆ ဦး၊ နမ့်ဟန်ခိတ်ကျေးရွာတွင် ၁၀၀ နှင့် ဟဲကွီကျေးရွာတွင် ၄၀၀ ဝန်းကျင်ခန့်ထိ ရှိလာကြောင်း သိရသည်။
