ထိုင်းနိုင်ငံလုပ်ငန်းခွင်အတွင်း မတော်တဆအက်စစ်ဖျန်းမိ၍ ခန္ဓာကိုယ်ထိခိုက်ဒဏ်ရာရရှိခဲ့သည့် မြန်မာအလုပ်သမားတစ်ဦးကို အလုပ်ရှင်က အလုပ်ဆင်းမှသာ လုပ်ခလစာပေးမည်ဆိုသဖြင့် လူမှုဖူလုံရေးရုံးသို့ တိုင်ကြားကြောင်း သိရသည်။
ထိုင်းနိုင်ငံ စမုစခွန်ရှိ လုပ်ငန်းခွင်တစ်ခု၌ အလုပ်လုပ်ကိုင်နေစဉ် မတော်တဆအက်စစ်ဖျန်းမိ၍ ခန္ဓာကိုယ်နှင့် မျက်လုံးတို့တွင် ပြင်းထန်ဒဏ်ရာများရရှိခဲ့သည့် မြန်မာအလုပ်သမား ဦးစောကြည်လင်းသည် ဆေးဝါးကုသမှုခံယူခဲ့ရပြီးနောက် ဒဏ်ရာဝေဒနာဆက်လက်ခံစားနေရသဖြင့် လုပ်ငန်းခွင်ပြန်ဝင်ရန် အခက်အခဲရှိနေစဉ် အလုပ်ရှင်ဘက်မှ အလုပ်ဆင်းမှသာ လုပ်ခလစာပေးမည်ဆိုသဖြင့် လူမှုဖူလုံရေးရုံးသို့ သွားရောက်တိုင်ကြားခဲ့ကြောင်း အလုပ်သမားသံအရာရှိရုံးမှ သိရသည်။
အဆိုပါကိစ္စရပ်နှင့်ပတ်သက်၍ ဇွန် ၁၉ ရက်တွင် အလုပ်သမားသံမှူးနှင့်အဖွဲ့သည် ကာယကံရှင် မြန်မာအလုပ်သမားနှင့်အတူ စမုစခွန်ခရိုင် လူမှုဖူလုံရေးရုံးသို့ ကိုယ်တိုင်ကိုယ်ကျသွားရောက်၍ တာဝန်ရှိသူများနှင့် ညှိနှိုင်းဆောင်ရွက်ပေးခဲ့ကြောင်း သိရသည်။
ထို့နောက် ဆရာဝန်ဆေးစာညွှန်းကြားချက်အရ ဆက်လက်နားနေရန်လိုအပ်ပါက အလုပ်မဆင်းနိုင်သည့် ကာလများအတွက် ဥပဒေနှင့်အညီ ရထိုက်ခွင့်ရှိသော လုပ်ခလစာများနှင့် လူမှုဖူလုံရေးအကျိုးခံစားခွင့်များ အပြည့်အဝရရှိစေရေး ညှိနှိုင်းဆောင်ရွက်ပေးခဲ့ကြောင်း အလုပ်သမားသံအရာရှိရုံးမှ သိရသည်။
မြန်မာရွှေ့ပြောင်းအလုပ်သမားများအနေဖြင့် အလုပ်သမားရေးရာကိစ္စရပ်များနှင့် စပ်လျဉ်း၍ အလုပ်သမားသံအရာရှိရုံး (Call Center) 020030015၊ အလုပ်သမားသံမှူး (ဗန်ကောက်) 0618108454၊ အလုပ်သမားသံအရာရှိ (ဗန်ကောက်) 0626890119၊ အလုပ် သမားသံအရာရှိ (ဗန်ကောက်) 0652206952၊ အလုပ်သမားသံအရာရှိ (မဲဆောက်) 0652206953၊ အလုပ်သမားသံအရာရှိ (ချင်းမိုင်) 0945866607 အလုပ်သမားသံအရာရှိ (ရနောင်း) 0634818121 စသည့်အလုပ်သမားသံအရာရှိ ဖုန်းနံပါတ်များသို့ ရုံးချိန်အတွင်း တိကျစွာသတင်းပေးပို့ပြီး အကူအညီတောင်းခံတိုင်ကြားနိုင်ကြောင်း သိရသည်။
