အာဂျင်တီးနားတိုက်စစ်မှူး လော်တာရိုမာတီနက်ဇ်အနေဖြင့် စာချုပ်သက်တမ်းတိုးရေးအတွက် အင်တာမီလန်အသင်းနှင့် မဆွေးနွေးရသေးကြောင်း ကစားသမား၏အေးဂျင့်ဖြစ်သူ ဘီတိုယာကေးက အတည်ပြုပြောကြားခဲ့သည်။
အသက် (၂၃)နှစ်အရွယ်ရှိ လော်တာရိုမာတီနက်ဇ်သည် ပြီးခဲ့သည့် ၂၀၁၉-၂၀ ရာသီတွင် အင်တာမီလန်အသင်းအတွက် ပြိုင်ပွဲစုံ (၄၉)ပွဲကစားပြီး (၂၁)ဂိုးသွင်းယူကာ ခြေစွမ်းပြခဲ့သူဖြစ်သည်။
လော်တာရိုမာတီနက်ဇ်ကို ခေါ်ယူရန် ဘာစီလိုနာအသင်းက ပစ်မှတ်ထားနေခြင်းကြောင့် အင်တာမီလန်အသင်းအနေဖြင့် ၎င်းကို စာချုပ်သက်တမ်းတိုးရန်ကြိုးပမ်းနေပြီး သဘောတူညီရရှိရန် နီးစပ်နေပြီဟု အီတလီမီဒီယာများက ဖော်ပြခဲ့ကြသည်။
သို့သော် ယင်းသတင်းများကို လော်တာရိုမာတီနက်ဇ်၏ အေးဂျင့်ဖြစ်သူ ယာကေးက ငြင်းဆန်ခဲ့ပြီး စာချုပ်သစ်အတွက် ဆွေးနွေးရခြင်းမရှိသေးကြောင်း ပြောကြားခဲ့ခြင်းဖြစ်သည်။
ယာကေးက "အင်တာမီလန်အသင်းနဲ့ ချုပ်ဆိုထားတဲ့ လော်တာရိုမာတီနက်ဇ်ရဲ့ စာချုပ်က ၂၀၂၃ ခုနှစ်မှာမှ သက်တမ်း ကုန်ဆုံးမှာပါ။ အပြောင်းအရွှေ့စျေးကွက်ပိတ်တာလည်း သိပ်မကြာသေးပါဘူး။ အင်တာမီလန်အသင်းအနေနဲ့ လော်တာရိုမာတီနက်ဇ်ကို စာချုပ်သက်တမ်းတိုးဖို့ ဆွေးနွေးတာမျိုးလည်း မရှိသေးပါဘူး"ဟု ပြောကြားခဲ့သည်။
ထို့ပြင် ယာကေးက လော်တာရိုမာတီနက်ဇ်အနေဖြင့် ဘာစီလိုနာတိုက်စစ်မှူး မက်ဆီနှင့် တွဲဖက်ကစားရန် ဆန္ဒရှိနေသော်လည်း ဘာစီလိုနာအသင်းအနေဖြင့် ၎င်းကို ကမ်းလှမ်းခဲ့ခြင်းမရှိကြောင်းလည်း ပြောကြားခဲ့သည်။
