ပြီးခဲ့သည့်စနေနေ့က ကစားခဲ့သော ပရီးမီးယားလိဂ်ပွဲစဉ် ချယ်လ်ဆီး (၄-၀) ခရစ္စတယ်ပဲလေ့စ်ပွဲတွင် ချယ်လ်ဆီးကစားသမားများအကြား ပယ်နယ်တီကန်ရန် အငြင်းပွားခဲ့သည့်ဖြစ်ရပ်၌ အင်္ဂလန်တိုက်စစ်မှူး အေဘရာဟမ် မှားယွင်းခဲ့သည်ဟု ချယ်လ်ဆီးအသင်းနည်းပြ လမ်းပတ်က ပြောကြားခဲ့သည်။
ယင်းပွဲတွင် ပွဲချိန် (၈၂)မိနစ်$ ချယ်လ်ဆီးအသင်းရရှိသော ပယ်နယ်တီကိုကန်ရန် အေဘရာဟမ်က ကြိုးပမ်းခဲ့ပြီး ချယ်လ်ဆီးအသင်းခေါင်းဆောင် စပိန်နောက်ခံလူ အက်ဇ်ပီလီကွယ်တာက ၎င်းကိုမကန်စေဘဲ အီတလီကွင်းလယ်လူ ဂျော်ဂျင်ဟိုကိုသာ ကန်သွင်းစေခဲ့ခြင်းဖြစ်သည်။ အေဘရာဟမ်သည် ယင်းပယ်နယ်တီအားကန်ခွင့်ရရန် အသည်းအသန်ကြိုးပမ်းခဲ့သော်လည်း အသင်းခေါင်းဆောင်ဖြစ်သူက လက်မခံခဲ့ခြင်းဖြစ်သည်။ ယင်းပယ်နယ်တီကို ဂျော်ဂျင်ဟိုကန်ရန် ပြင်ဆင်နေသည့်အချိန်တွင် အေဘရာဟမ်အနေဖြင့် မကျေနပ်သောပုံစံရှိခဲ့သည်ကို ရုပ်သံပရိသတ်များ တွေ့မြင်ခဲ့ရသည်။
ယင်းပွဲတွင် ချယ်လ်ဆီးအသင်းသည် တတိယဂိုးနှင့် စတုတ္ထဂိုးတို့ကို ပယ်နယ်တီမှတစ်ဆင့် ရရှိခဲ့ခြင်းဖြစ်ပြီး ယင်းဂိုး (၂)ဂိုးမှာ (၄)မိနစ်သာခြား(၇၈ မိနစ်နှင့် ၈၂ မိနစ်)ခဲ့သည်။ ပထမအကြိမ်ရရှိသော ပယ်နယ်တီမှာ ပယ်နယ်တီစည်းအတွင်း ဘောလုံးနှင့်အတူ ထိုးစစ်ဆင်လာသော အေဘရာဟမ်ကို ခရစ္စ တယ်ပဲလေ့စ်နောက်ခံလူ မစ်ချယ်က တားဆီးရာမှ (လဲကျခဲ့၍) ရရှိခဲ့ခြင်းဖြစ်ပြီး ယင်းပယ်နယ်တီဂိုးကိုလည်း ဂျော်ဂျင်ဟိုကပင် သွင်းယူခဲ့သည်။ ပွဲအပြီးတွင် ချယ်လ်ဆီးကစားသမားများအ ကြား ပယ်နယ်တီလုသည့်ဖြစ်ရပ်နှင့်ပတ်သက်၍ လမ်းပတ်အား မီဒီယာများက မေးမြန်းခဲ့ရာ ၎င်းက ''ဒီကိစ္စကို အဝတ်လဲခန်းထဲမှာ ဖြေရှင်းခဲ့ပြီးပါပြီ။ ဒါဟာ ပြဿနာတစ်ခုမဟုတ်ပါဘူး။ ကျွန်တော်က အသင်းမှာဦးဆောင်သူတွေကို အလိုရှိပါတယ်။ ပဋိပက္ခအနည်းငယ်ဖြစ်တာကို အရေးမစိုက်ပါဘူး။ တမ်မီ (အေဘရာဟမ်)ဟာ ပယ်နယ်တီကိုကန်သွင်းပြီး ဂိုးလိုချင်တယ်ဆိုရင်တော့ သူ့ရဲ့နေရာကို နည်းနည်းပိုယူချင်တယ်လို့ထင်ပါတယ်။ သူ့ရဲ့ဂိုးဆာလောင်မှုကို ကျွန်တော် အသိအမှတ်ပြုပါတယ်။ သူ့ရဲ့စွမ်းဆောင်ရည်ကလည်း ဂိုးရသင့်ပါတယ်။ ဒါပေမဲ့ ကျွန်တော်တို့မှာ ချမှတ်ထားတဲ့စည်းမျဉ်းတွေရှိပါတယ်။ ဒါကို ကျော်လွှားလို့မရနိုင်ပါဘူး။ အကယ်၍ တစ်စုံတစ်ယောက်က ဟက်ထရစ် အခွင့်အရေး မပေါ်ခဲ့ဘူးဆိုရင်ပေါ့''ဟု ပြောကြားခဲ့သည်။
ယင်းပွဲတွင် ချယ်လ်ဆီးအသင်းအတွက် ကျန်ဂိုး (၂)ဂိုးကို နောက်ခံလူများဖြစ်သည့် ဘင်ချီဝဲလ် (၅၀ မိနစ်)နှင့် ဇူးမား (၆၆ မိနစ်)တို့က သွင်းယူခဲ့ကြပြီး ဇူးမား သွင်းယူသောဂိုးကိုလည်း ချယ်လ်ဆီးနောက်ခံလူသစ် ဘင်ချီဝဲလ်က ဖန်တီးပေးခဲ့ခြင်းဖြစ်သည်။
