ကြက်ငှက်တုပ်ကွေးရောဂါ ဖြစ်ပွားမှုအတွက် လိုက်နာဆောင်ရွက်ရမည့် အချက် ခုနစ်ချက်ကို စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ မွေးမြူရေးနှင့် ကုသရေး ဦးစီးဌာနမှ သတင်းထုတ်ပြန်ခဲ့သည်။

လိုက်နာဆောင်ရွက်ရန် အသိပေးခဲ့မှုတွင် ဆောင်းခိုငှက်များနှင့် အိမ်မွေး ကြက်၊ ငှက်၊ ဘဲ၊ ငုံးများ ဆက်စပ်ထိတွေ့မှု မရှိစေရေး ဂရုပြု ဆောင်ရွက်ရန်၊ ကြက်၊ ဘဲ၊ ငုံး စသည့် ကြက်ငှက်မွေးမြူရေးခြံများ၏ ဇီဝလုံခြုံရေးကို အထူးဂရုပြု ဆောင်ရွက်ရန်၊ ကြက်ငှက်မွေးမြူရေး ခြံများနှင့် ကြက်ဘဲအရှင်ဈေးများတွင် ပိုးသတ်သန့်စင်ခြင်း လုပ်ငန်းကို စနစ်တကျဆောင်ရွက်ရန်နှင့် ခြံပတ်ဝန်းကျင် သန့်ရှင်းရေးနှင့် မွေးမြူရေးခြံသုံး ပိုးသတ်ဆေးဖျန်းခြင်း ပုံမှန်ပြုလုပ်ရန်လိုကြောင်း သိရသည်။

အလားတူ ကြက်မွေးမြူရေးခြံအတွင်းသို့ ဝင်ပါက နှာခေါင်းစည်း၊ လက်အိတ် စသည့် အကာအကွယ်ပစ္စည်းများ စနစ်တကျ ဝတ်ဆင်ရန်၊ ကြက်ငှက်များကိုင်တွယ်ပြီးတိုင်း ကြက်ခြံအတွင်းမှ ထွက်သည့်အခါတိုင်း ဆပ်ပြာဖြင့် လက်ဆေးခြင်း၊ တစ်ကိုယ်ရေးသန့်ရှင်းရေးများ ပြုလုပ်ခြင်းများ ဆောင်ရွက်ရန်၊ ကြက်၊ ငှက်၊ အသား၊ ဥ စသည်တို့ကို သေချာစွာ ချက်ပြုတ်ပြီးမှ စားသုံးရန်၊ ကြက်ငှက်များ ရုတ်တရက်သေဆုံးကြောင်း သိရှိရပါက မြန်မာနိုင်ငံ မွေးမြူရေးလုပ်ငန်း အဖွဲ့ချုပ်တို့ကို ချက်ချင်း သတင်းပို့ရန်နှင့် ရောဂါကြိုတင်ကာကွယ်ရေးနှင့် ရောဂါစူးစမ်းရှာဖွေခြင်း လုပ်ငန်းများတွင် သက်ဆိုင်ရာဌာန၊ အဖွဲ့အစည်းများနှင့် ပူးပေါင်းပါဝင် ဆောင်ရွက်ကြရန်တို့ ဖြစ်ကြောင်း သိရသည်။

ကြက်ငှက်တုပ်ကွေး ရောဂါသည် မြန်မာနိုင်ငံတွင် ၂၀၀၆ ခုနှစ်တွင် စတင်ကျရောက် ဖြစ်ပွားခဲ့ရာမှ ၂၀၁၆ ခုနှစ်အထိ စုစုပေါင်း ရှစ်ကြိမ် ကျရောက်မှု ဖြစ်ပွားခဲ့ပြီး ဖြစ်ကြောင်း၊ ၂၀၁၇ ခုနှစ် ဇူလိုင် ၁၆ ရက်တွင် တနင်္သာရီတိုင်းဒေသကြီး၊ ထားဝယ်ခရိုင်၊ ထားဝယ်မြို့၊ ဝဲကျွန်းထိန်သစ်ရပ်ကွက်ရှိ ကြက်မွေးမြူရေးခြံတွင် ကြက်များ စတင်သေဆုံးခဲ့သောကြောင့် ရောဂါနမူနာ ပစ္စည်းများကို ရန်ကုန်မြို့၊ တိရ စ္ဆာန်ရောဂါရှာဖွေရေး ဓာတ်ခွဲခန်းတွင် မော်လီကြူလာနည်းဖြင့် စစ်ဆေးခဲ့ရာ H5N1 Positive ဖြစ်ကြောင်း ဇူလိုင် ၂၃ ရက်တွင် အတည်ပြုနိုင်ခဲ့ကြောင်း၊ ကြက်ငှက်တုပ်ကွေးရောဂါ ကျရောက်ဖြစ်ပွားမှုကို ကမ္ဘာ့တိရစ္ဆာန် ကျန်းမာရေးအဖွဲ့သို့ ကနဦး သတင်ပေးပို့ခဲ့ကြောင်း သိရသည်။ ရောဂါဖြစ်ပွားမှုအား လျင်မြန်စွာ ထိန်းချုပ်နိုင်ရန်အတွက် ရောဂါဖြစ်တိရစ္ဆာန်များ ရှင်းလင်းဖယ်ရှားခြင်းနှင့် ရောဂါကူးစက်ပြန့်ပွားမှု ထိန်းချုပ်ခြင်း လုပ်ငန်းများကို ဦးစီးဌာနမှ ပညာရှင်များ၊ ဒေသဆိုင်ရာ ကူးစက်ရောဂါ ထိန်းချုပ်ရေး အဖွဲ့များနှင့် တာဝန်ရှိသူများ ပူးပေါင်း၍ ကြက်ငှက်တုပ်ကွေးရောဂါ ကာကွယ်ထိန်းချုပ်ရေး စီမံချက်ပါ လုပ်ငန်းစဉ်များနှင့်အညီ ဆောင်ရွက်လျက်ရှိကြောင်း ထုတ်ပြန်ခဲ့သည်။