တနင်္သာရီတိုင်းဒေသကြီး ထားဝယ်မြို့ လယ်တွင် စက်တင်ဘာ ၂၂ ရက် နံနက်က ဖုန်းအရောင်းဆိုင်တစ်ဆိုင် ဖောက်ထွင်းခံရမှုကြောင့် ကျပ်သိန်း ၅၀ ခန့် တန်ဖိုးရှိဖုန်းများ ခိုးယူခံရသည့်အပြင် ဆိုင်ကို ဓာတ်ဆီလောင်း ၍မီးရှို့ခဲ့သောကြောင့် မီးလောင်ကျွမ်းမှုဖြစ် ပွားခဲ့ကြောင်း သိရသည်။
စက်တင်ဘာ ၂၂ ရက်နံနက် ၅ နာရီခန့် က ထားဝယ်မြို့ အနောက်မြို့တွင်းရပ်ကွက် မြို့တွင်းလမ်းနှင့်ဗိုလ်ချုပ်လမ်းထောင့်ရှိ BSM Mobile အရောင်းဆိုင်တွင်မီးလောင်မှုဖြစ်ပွားနေကြောင်း ဆိုင်ပိုင်ရှင်ဦးရဲလွင်ဦး၏ ဖုန်းဆက်သတင်းပေးချက်အရ ထားဝယ်ခရိုင်မီးသတ်တပ်ဖွဲ့မှ လက်ထောက်ညွှန်ကြားရေးမှူး ဦးသိန်းဇော်ဝင်းဦးဆောင်သည့် မီးသတ်တပ်ဖွဲ့ဝင် ၃၅ ဦး၊ မီးငြိှမ်းသတ်ယာဉ်နှစ်စီး၊ ရေသယ်ယာဉ်နှစ်စီးတို့ဖြင့်သွားရောက် ငြိှမ်းသတ်ရာ နံနက် ၅ နာရီ မိနစ် ၂၀ ခန့်တွင် မီးငြိှမ်းသတ်နိုင်ခဲ့ကြောင်း ထားဝယ်ခရိုင်မီးသတ်တပ်ဖွဲ့ထံမှရရှိသည့် မှုခင်းမှတ်တမ်း အရ သိရသည်။ မီးငြိှမ်းသတ်ပြီးနောက် မီးလောင်ခဲ့သည့်ဆိုင်ကို စစ်ဆေးချက်အရ ဆိုင် အနောက်ဘက်ရှိ ပြတင်းပေါက်တံခါးချက် ပြုတ်ထွက်နေပြီး ပြတင်းပေါက်တွင်တပ်ဆင်ထားသည့် သံတိုင်တစ်ချောင်းကွေးနေသည်ကိုတွေ့ရသဖြင့် ဆက်လက်စစ်ဆေးရာ ပြ တင်းပေါက်အပြင်ဘက်၌ ဖုန်းများပြုတ်ကျနေသည်ကိုတွေ့ရကြောင်း၊ ဆိုင်အတွင်း တပ်ဆင်ထားသည့် CCTV Record များကိုမီး ရှို့ဖျက်ဆီးထားသည်ကို တွေ ့ရသဖြင့် ဆက်လက်စုံစမ်းစစ်ဆေးရာ ဆိုင်အတွင်းဖောက် ထွင်းခိုးယူသူ လူငယ်တစ်ဦးက ဆိုင်အတွင်းရှိ ဖုန်းများကိုခိုးယူခဲ့ပြီးနောက် ၎င်း၏လုပ် ဆောင်မှုကို သဲလွန်စဖျောက်ရန် ဆိုင်အတွင်းရှိ CCTV Record ရှိရာကို မီးရှို့ဖျက်ဆီးခဲ့ရာမှ ယခုလိုမီးလောင်ကျွမ်းခဲ့ရခြင်း ဖြစ်သည်ကိုတွေ ့ရပြီး ကျူးလွန်သူ လူငယ်ကိုဖမ်းဆီးရမိရန် ပူးပေါင်းအဖွဲ့ဖြင့် ပိတ်ဆို့ရှာဖွေစုံစမ်းနေသည်ဟု သိရသည်။
‘‘ဖုန်းဆိုင်မှာ မနက်တုန်းက မီးလောင်တယ်ဆိုတော့ နံပါတ် (၁) ကမီးငြိှမ်းတာပေါ့။မီးငြိမ်းဖို့အတွက်က ဦးစားပေးလုပ်တယ်။မီးငြိှမ်းပြီးတော့မှ လိုက်ကြည့်တော့အနောက်မှာပြတင်းပေါက်က ချက်ပြုတ်နေတယ်။ ချက်ပြုတ်နေတဲ့အနေအထားရယ်၊ နောက်မှာရှိတဲ့ သံတိုင်တစ်ခုကွေးနေတဲ့အနေအထားတွေ့ တော့ မီးသတ်အဖွဲ့ကနေပြီးတော့ ဒီဟာတွေ ကိုဖွင့်ပြီးတော့ မီးငြိှမ်းထားတာ မဟုတ်ဘူး။ ဒါဆိုရင်တော့ တစ်ခုခုတော့ဖြစ်ပြီဆိုပြီး လိုက်စစ်ကြည့်တယ်။ စစ်ကြည့်တော့ အပြင်မှာ ကြည့်လိုက်တော့ ဖုန်းတွေက ပြုတ်ကျနေ တယ်။ အပြင်မှာဖုန်းတွေပြုတ်ကျနေတော့ ဒါဆိုရင် အထဲကို လူဝင်ပြီးတော့ တစ်ခုခုလုပ်သွားတာနဲ တူတယ်ဆိုပြီး လိုက်ကြည့်တယ်။ လိုက်ကြည့့်တဲ့အနေအထားအရ အထဲကို သူခိုးဝင်ခိုးတယ်။ ခိုးပြီးတော့ သူကပြောရရင်တော့ အထဲမှာရှိတဲ့ CCTV Record မှတ်တမ်းရိုက်ထားတဲ့ဟာတွေရှိတာကိုး။ ပြောရ ရင်တော့သူ့ရဲ့လုပ်ဆောင်ခဲ့တဲ့ဟာကို မသိအောင် ဒီ CCTV Record ကိုမီးရှို့တယ်လို့ ယူဆရတာပေါ့။ သူတို့ရဲ့လုပ်ငန်းတွေကို လက်စ ဖျောက်တာပေါ့။ ပြောရရင်တော့ သက်သေသဲလွန်စ မကျန်အောင် လုပ်တဲ့အနေအထားပေါ့’’ဟု ထားဝယ်ခရိုင်ရဲတပ်ဖွဲ့ မှူး ဒုရဲမှူးကြီးလှိုင်မင်းထွန်းက ပြောကြား သည်။
ဖုန်းဆိုင်ကို ဖောက်ထွင်းခိုးယူ၍ မီးရှို့ ဖျက်ဆီးသူကိုဖမ်းဆီးရန် ထားဝယ်မြို့အ တွင်း ရဲတပ်ဖွဲ့ဝင်များက ဖြန့်ကြက်စုံစမ်းရှာဖွေနေသည့်အပြင် မြို့အဝင်အထွက်ဂိတ်များ နှင့် အဓိကထွက်ပေါက်များအပြင် မြိတ်၊ မေတ္တာနှင့် ထီးခီး နယ်စပ်အထိ စစ်ဆေးရေး ဂိတ်များကိုပါ သတင်းပို့ကာ ဝင်ထွက်သွားလာ မှု မရှိစေရေးပိတ်ဆို့ စစ်ဆေးရန်နှင့်မသင်္ကာသူများကို စောင့်ကြည့်ပြီး တရားခံအမြန်ဆုံး ဖမ်းဆီးနိုင်ရန် ဆောင်ရွက်နေကြောင်း ထားဝယ်ခရိုင်ရဲတပ်ဖွဲ့မှူးက ပြောကြားသည်။
မီးလောင်မှုကြောင့် (၂၀x၅၀) ပေ အုတ်ညှပ်သွပ်မိုးတစ်ထပ် မီးလောင်ကျွမ်းခဲ့ကြောင်း၊ မီးလောင်မှုဖြစ်ပွားရာမှ မသင်္ကာဖွယ်ရာ ဆိုင်ကယ်ဦးထုပ်တစ်လုံး၊ ဖိနပ်တစ်ရန်၊ ဖုန်းအခွံသုံးဘူး၊ ပိုက်ဆံနှင့်ပြတင်းပေါက် သံတိုင်ပြုတ်ထွက်နေကြောင်း တွေ့ရှိ၍ မှုခင်း ရဲတပ်ဖွဲ့ (CID)၊ ခရိုင်ရဲတပ်ဖွဲ့မှူး၊ ခရိုင်မီး သတ်ဦးစီးမှူးတို့ ပူးပေါင်းအဖွဲ့ဖြင့်စစ်ဆေးရာ CCTV (Hard Disk) မှတ်ဉာဏ်သိမ်းစက် မှ ပြန်လည်ကြည်ရှုသည့်မှတ်တမ်းအရ ဓာတ်ဆီလောင်းမီးရှို့ခဲ့ခြင်းဖြစ်ပြီး မီးစတင်လောင်ကျွမ်းရာ CCTV မော်နီတာတစ်လုံး၊ ငွေရှင်းကောင်တာစားပွဲတစ်လုံး၊ Click – i 125 အဖြူရောင်တစ်စီး မီးလောင်ခဲ့ကြောင်း မှုခင်းမှတ်တမ်းအရ သိရသည်။
