အင်္ဂလန်လက်ရွေးစင်အသင်းခေါင်းဆောင် ဟာရီကိန်းသည် ဘူလ်ဂေးရီးယား အသင်းနှင့်ပွဲ၌ ပယ်နယ်တီမှတစ်ဆင့် နှစ်ဂိုးသွင်းယူပြီးနောက် အင်္ဂလန်အသင်းအတွက် ပယ်နယ်တီဂိုးရရှိမှု အများဆုံးစာရင်းတွင် ဒုတိယနေရာရောက်ရှိလာကြောင်း သိရသည်။
စက်တင်ဘာ ၇ ရက်က ဝင်ဘလေကွင်း၌ ကစားသည့်ပွဲတွင် အင်္ဂလန်အသင်းက ဘူလ်ဂေးရီးယားအသင်းကို (၄-၀) ဂိုးဖြင့် ဂိုးပြတ်အနိုင်ရပြီး ဟာရီကိန်းက ၂၄၊ ၅၀၊ ၇၃ မိနစ်တွင် ဟက်ထရစ်နှင့် စတာလင်က ၅၅ မိနစ်တွင် တစ်ဂိုးသွင်းယူပေးခဲ့သည်။
ဟာရီကိန်းသည် အဖွင့်ဂိုးကို စတာလင်၏ဖန်တီးပေးမှုမှတစ်ဆင့် ပိတ်သွင်းယူခဲ့ပြီး ကျန်နှစ်ဂိုးကိုမူ ပယ်နယ်တီမှတစ်ဆင့် သွင်းယူခဲ့ခြင်းဖြစ်သည်။
ဟာရီကိန်းသည် အင်္ဂလန်ကစားသမား ဘဝ ပွဲ ၄၀ မြောက်တွင် ၂၅ ဂိုးသွင်းယူထား ပြီး ယင်းဂိုးများအနက် ပယ်နယ်တီမှသွင်းယူ သည့်ဂိုး (ပယ်နယ်တီအဆုံးအဖြတ်မပါဝင်)ရှစ်ဂိုးရှိလာကြောင်း သိရသည်။
၎င်းသည် အင်္ဂလန်အသင်းအတွက် ပယ်နယ်တီကန်ခွင့်ရသည့်ရှစ်ကြိမ်စလုံး အမှားအယွင်းမရှိသွင်းယူနိုင်ခဲ့ခြင်းဖြစ်ရာ ခုနစ်ဂိုးသွင်းယူထားသည့် ၀ိန်းရွန်နီကိုကျော်၍ ဒုတိယနေရာရောက်ရှိလာခြင်းဖြစ်ပြီး ကိုးဂိုးဖြင့် အများဆုံးသွင်းယူထားသည့် လမ်းပတ်၏စံချိန်ကိုလိုက်မီရန် တစ်ဂိုးသာလိုအပ်တော့သည်။
