ပေါက်ခေါင်းမြို့တွင် အလုပ်ရုံဆွေးနွေးပွဲ ပြုလုပ်နေသည်ကို မေ ၂၄ ရက်က တွေ့ရစဉ်
တိုင်းရင်းသားအခွင့်အရေးရရှိရန်နှင့် ချင်းတိုင်းရင်းသားရေးရာ ဝန်ကြီးတစ်နေရာ ရရှိရေးအတွက် ပဲခူးတိုင်းဒေသကြီး (အနောက်ပိုင်း) ပြည်ခရိုင် ပေါက်ခေါင်းမြို့တွင် ချင်းတိုင်းရင်းသား လူဦးရေစာရင်းများ စတင်ကောက်ခံနေကြောင်း သိရသည်။
အဆိုပါစာရင်းများ ကောက်ခံနိုင်ရန်အတွက် မေ ၂၄ ရက်က ပေါက်ခေါင်းမြို့တွင် အလုပ်ရုံဆွေးနွေးပွဲတစ်ခုကို ပြုလုပ်ခဲ့ပြီး ချင်းတိုင်းရင်းသားကျေးရွာများမှ အုပ်ချုပ်ရေးမှူးများ၊ ခေါင်းဆောင်များ၊ ချင်းစာပေနှင့် ယဉ်ကျေးမှုကော်မတီ၊ အရှိုချင်းလူငယ်အစည်းအရုံးတို့မှ တက်ရောက်ဆွေးနွေးခဲ့ကြသည်။
“ချင်းတိုင်းရင်းသားတွေက မိမိလူမျိုးစာရင်းကို ပိုင်ပိုင်နိုင်နိုင်ကောက်ယူထားပြီးတော့ မိမိလူမျိုးတွေရဲ့ အခွင့်အရေးကို ကာကွယ်စောင့်ရှောက်နိုင်ဖို့ ရည်ရွယ်တယ်။ နောက်တစ်ခုက ချင်းတိုင်းရင်းသားရေးရာဝန်ကြီး တစ်နေရာရရှိဖို့ကိုလည်း မျှော်လင့်တယ်” ဟု ပဲခူးတိုင်းဒေသကြီး ချင်းစာပေနှင့် ယဉ်ကျေးမှုကော်မတီဒုဥက္ကဋ္ဌ ဆလိုင်းအေးပိုင်က ပြောကြားသည်။
တိုင်းဒေသကြီးအတွင်း တိုင်းရင်းသားရေးရာဝန်ကြီး တစ်နေရာရရှိရန်အတွက် လူဦးရေ ၀ ဒသမ ၀၁ (၅၀၀၀၀) ပြည့်မီရန် အနည်းငယ်သာလိုတော့ပြီး သေချာစစ်တမ်းကောက်ယူလိုက်ပါက ကျော်လွန်သွားမည်ဖြစ်ကြောင်း ၎င်းက ဆက်လက်ပြောကြားသည်။
“လာမယ့် ၂၀၂၀ အတွက် ချင်းလူဦးရေစာရင်းက ပိုပြီးတော့အရေးကြီးတယ်။ ချင်းဆိုချင်းပေါ့။ ဘာမှရှက်စရာမလိုဘူး။ ရဲရဲရင်ဆိုင်ရမယ်။ ကိုယ့်ရိုးရာ ကိုယ့်ယဉ်ကျေးမှုတွေကို တန်ဖိုးထားဖို့လိုတယ်။ ကိုယ့်အခွင့်အရေးကို ရရှိအောင်လုပ်ရမယ်” ဟု ပေါက်ခေါင်းမြို့နယ် အရှိုချင်းလူငယ်အစည်းအရုံး အတွင်းရေးမှူး မိုင်အေးအေးမာက ပြောကြားသည်။
ယင်းစာရင်းများ ကောက်ယူရာတွင် လူမျိုးမှာ ချင်းဖြစ်နေသော်လည်း မှတ်ပုံတင်တွင် ဗမာဖြစ်နေခြင်းများကို ကြုံတွေ့နေရကြောင်း၊ ပေါက်ခေါင်းမြို့နယ်တွင် ချင်းတိုင်းရင်းသား ကျေးရွာပေါင်း ၃၅ ရွာရှိပြီး အခြားကျေးရွာများတွင်လည်း ပျံ့နှံ့နေထိုင်လျက်ရှိပြီး ချင်းတိုင်းရင်းသားလူဦးရေမှာ ၁၀၀၀၀ ခန့်ရှိမည်ဟု ခန့်မှန်းကြောင်း စစ်တမ်းကောက်ယူနေသူများထံက သိရသည်။
