ရခိုင်ပြည်နယ်အတွင်းရှိ IDP Camps များ ပိတ်သိမ်းနိုင်ရေး ညှိနှိုင်းဆောင်ရွက်နေစဉ် (Photo : aungthurein)

ကျောက်တော်မြို့နယ် နိဒင်ကျေးရွာ IDP စခန်းအပါအဝင် ရခိုင်ပြည်နယ်အတွင်းရှိ IDP စခန်းငါးခုအား ပိတ်သိမ်းနိုင်ရေး ဆောင်ရွက်နေကြောင်း သိရသည်။

ရခိုင်ပြည်နယ်ဆိုင်ရာ အကြံပြုချက်များအပေါ် အကောင်အထည် ဖော်ဆောင်ရေး ကော်မတီသည် ရခိုင်ပြည်နယ် အတွင်းရှိ IDP စခန်းများ ပိတ်သိမ်းနိုင်ရေးကို ဦးစားပေးအဖြစ် ဆောင်ရွက်လျက်ရှိရာ စစ်တွေမြို့ရှိ သက္ကေပြင်စခန်း၊ မြေပုံမြို့ရှိတောင်ပေါ်စခန်း၊ ကျောက်တော်မြို့ရှိ နိဒင်စခန်းများအား ပိတ်သိမ်းနိုင်ရေး ဆောင်ရွက်နေကြောင်းနှင့် စစ်တွေမြို့နယ်ရှိ ခေါင်းဒုက္ကာ (၁) နှင့် (၂)  စခန်းများရှိ စခန်းတာဝန်ခံများ စခန်းတွင်း နေထိုင်သူများနှင့် တွေ့ဆုံပြီး စခန်းပိတ်သိမ်းနိုင်မည့် အခြေအနေများကို ကနဦး ညှိနှိုင်းဆွေးနွေးမှု စတင်နေပြီဖြစ်ကြောင်း သိရသည်။

အိမ်ထောင်စု ၈၅ စု၊ လူဦးရေ ၅၈၁ ဦးရှိသည့် ကျောက်တော်မြို့နယ် နိဒင်ကျေးရွာ IDP စခန်းပိတ်သိမ်းပြီး ကျေးရွာနှင့် တစ်ဆက်စပ်တည်း ပြန်လည်နေရာချထားရေး အစီအစဉ်များအား စခန်းစီမံခန့်ခွဲမှု ကော်မတီဝင်များ၊ နိဒင်ကျေးရွာ တာဝန်ခံများ၊ စခန်းနေထိုင်သူများနှင့် ညှိနှိုင်းပြီးဖြစ်ကြောင်း သိရသည်။

ယင်းနှင့်ပတ်သက်ပြီး ရခိုင်ပြည်နယ်ဆိုင်ရာ အကြံပြုချက်များအပေါ် အကောင်အထည် ဖော်ဆောင်ရေး ကော်မတီမှ ညွှန်ကြားရေးမှူး ဒေါက်တာအောင်သူရိန်က “ခေါင်းဒုက္ကာ ၁ နဲ့ ၂ ကတော့ ကနဦး မေးမြန်းညှိနှိုင်းဆဲ ဖြစ်ပါတယ်။ ကျောက်တော်နိဒင်စခန်းကတော့ ပိတ်သိမ်းဖို့ ညှိနှိုင်းတဲ့ အဆင့်က တော်တော်ပြီးနေပြီ။ နေအိမ်ဆောက်လုပ်ဖို့ အတွက်လည်း စခန်းအနီးက မြေနေရာကို ကြည့်နေပြီ။ မြေတွေမှာ အိမ်ဆောက်ဖို့အတွက် တွက်ချက်တာ လုပ်နေပြီ။ ဘယ်နေ့ဘယ်အချိန် ပိတ်မယ်ဆိုတာတော့ အသေအချာ ပြောလို့မရသေးပါဘူး။ အချိန်ကန့်သတ် ဆောင်ရွက်တာ မဟုတ်ပေမယ့် မြန်နိုင်သမျှမြန်အောင် ဆောင်ရွက်နေပါတယ်” ဟု ရှင်းပြသည်။

နိုင်ငံတော် အတိုင်ပင်ခံရုံး ဝန်ကြီးဌာန ဒုတိယဝန်ကြီး ဦးခင်မောင်တင်နှင့် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန ဒုတိယဝန်ကြီး ဦးစိုးအောင်တို့သည် ရခိုင်ပြည်နယ် လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ဖုန်းတင့်နှင့် တာဝန်ရှိသူများနှင့်အတူ ဧပြီ ၅ ရက်က ကျောက်တော်မြို့နယ် နိဒင်ကျေးရွာ IDP စခန်းသို့ ရောက်ရှိပြီး စခန်းစီမံခန့်ခွဲမှု ကော်မတီဝင်များ၊ နိဒင်ကျေးရွာ တာဝန်ခံများ၊

စခန်းနေထိုင်သူများနှင့် တွေ့ဆုံခဲ့ကာ IDP စခန်းအား ပိတ်သိမ်းပြီး ကျေးရွာနှင့် တစ်ဆက်စပ်တည်း ပြန်လည်နေရာချထားရေး အစီအစဉ်များ၊ အခြေခံပညာ ကျောင်းများတွင် ဆရာ၊ ဆရာမများ ခန့်ထားပေးရေး၊ အခြေခံပညာ အထက်တန်း အောင်မြင်ပြီးသူများ အဆင့်မြင့်ပညာများ ဆက်လက်သင်ကြားနိုင်ရေး၊ ကျောက်တော်မြို့နယ်၊ ခေါင်းတုတ်ရွာတွင် တိုက်နယ်ဆေးရုံတစ်ခု ချထားပေးရေး၊ အသက်မွေးဝမ်းကျောင်း သင်တန်းများ ဖွင့်လှစ်ပေးရေး ကိစ္စရပ်များနှင့် IDP လျှောက်ထားကိုင်ဆောင်ရေး ကိစ္စရပ်များကို ရှင်းလင်းပြောကြား ဆွေးနွေးခဲ့ကြကြောင်း သိရသည်။

ထို့ပြင် ရခိုင်ပြည်နယ်ဆိုင်ရာ အကြံပြုချက်များအပေါ် အကောင်အထည် ဖော်ဆောင်ရေး ကော်မတီမှ ညွှန်ကြားရေးမှူး ဒေါက်တာအောင်သူရိန်သည် ဧပြီ ၆ ရက်တွင် စစ်တွေမြို့နယ်ရှိ ခေါင်းဒုက္ကာ (၁) နှင့် (၂) စခန်းများရှိ စခန်းတာဝန်ခံများ စခန်းတွင်း နေထိုင်သူများနှင့် တွေ့ဆုံပြီး စခန်းပိတ်သိမ်းနိုင်မည့် အခြေအနေများကို ကနဦး ညှိနှိုင်းဆွေးနွေးခဲ့ကြောင်း သတင်းထုတ်ပြန်ချက်များအရ သိရသည်။