တောင်ငူတွင် ရေအနည်းငယ်ပြန်ကျလာပြီဖြစ်သော်လည်း အကူအညီမရောက်သေးသည့် နေရာများ ရှိနေ၊ ရေဘေးကူညီသည့် ရှင်ပေါလုအဖွဲ့မှ ပရဟိတအဖွဲ့ဝင်တစ်ဦး သေဆုံးခဲ့ကြောင်း တောင်ငူမြို့တွင် ရေဘေး ကူညီနေသည့် အဖွဲ့အချို့ထံမှ သိရသည်။
" တယောက်ဆုံးပါးသွားတယ်။ ရှင်ပေါလုအဖွဲ့ကပါ" ဟု တောင်ငူမြို့ရှိ ရေဘေးကူညီရေးအဖွဲ့တစ်ခုမှ တာဝန်ရှိသူတစ်ဦးက ပြောကြားသည်။
သေဆုံးသူမှာ ရှင်ပေါလုအဖွဲ့မှ ၂၆ နှစ်အရွယ် စောနော်ဂြ ဖြစ်ကြောင်းသိရပြီး ရေစီးသန်သည့်အချိန်တွင် ရေထဲသို့မျှောပါကာ အသက်ဆုံးရှုံးခဲ့ခြင်းဖြစ်သည်။
တောင်ငူတွင် ရေအနည်းငယ်ပြန်ကျလာပြီ ဖြစ်သော်လည်း အချို့သောနေရာများမှာ ကယ်ဆယ်ရေးများ မရောက်ရှိသဖြင့် ယင်းနေရာများသို့ ဦးစားပေးကာ သွားရောက်ကူညီကယ်ဆယ်နေသည်ဟု တောင်ငူမြို့ရှိ Save The Trees Rescue Team မှ ကိုကျော်သူရက ပြောကြားသည်။
" ရေကတော့ ပြန်ကျနေတယ်။ ဒါပေမဲ့ ရေတက်တုန်းက ကျွန်တော်တို့ မရောက်ခဲ့တဲ့နေရာတွေရှိတယ်။ အဲ့ဒီနေရာတွေမှာက သုံးလေးရက်လောက် ကြာနေတော့ ဒုက္ခရောက်နေကြတယ်။ အဲ့ဒီနေရာတွေက ရေကြီးတုန်းက အန္တရာယ်တော်တော်ရှိတယ်။ ရေစီးကြမ်းတယ်။ ရေဝဲတွေ ရှိတယ်။ အခုတော့ အဲ့ဒီနေရာတွေကို စမ်းတိုးနေတယ်" ဟု ကိုကျော်သူရက ပြောကြားသည်။
အဆိုပါနေရာများမှာ တောင်ငူမြို့ လေးမိုင်ဘက်အခြမ်းရှိ ကမ်းဘားနီ၊ နောင်ဘိုနောင်ချို အစရှိသည့် ကျေးရွာများဖြစ်ပြီး ရေကြီးရေလျှံမှုကြောင့် သုံးလေးရက်ခန့် အစာနှင့် သောက်စရာရေများ ပြတ်လပ်နေသည်ဟု သိရသည်။
