မန်ယူအသင်းနှင့် အနာဂတ်လှုပ်ခတ်နေသော ပြင်သစ်ကွင်းလယ်လူ ပေါ့ဘာ ကို ခေါ်ယူရန် ပစ်မှတ်ထားနေသော အသင်းများစာရင်းတွင် ပြင်သစ်ကလပ် PSG အသင်းလည်း ပါဝင်လာကြောင်း ဗြိတိန်သတင်းစာများက ဖော်ပြခဲ့ကြသည်။ ပေါ့ဘာသည် မန်ယူအသင်းတွင် နည်းပြ မော်ရင်ဟိုနှင့် ဆက်ဆံရေးအဆိုးရွားဆုံးအခြေအနေသို့ ရောက်ရှိနေပြီး မော်ရင်ဟို၏လက်အောက်တွင် ကစားရန်ဆန္ဒမရှိတော့ကြောင်း ဗြိတိန်သတင်းစာ များက ဖော်ပြခဲ့ကြသည်။

မန်ယူအသင်းတွင် ပေါ့ဘာနှင့် မော်ရင်ဟိုတို့ နှစ်ဦးအနက် တစ်ဦးဦးမရှိမှဖြစ်မည့်အနေအထားသို့ ရောက်ရှိလာပြီဟု Daily Express သတင်းစာကလည်း ဖော်ပြခဲ့သည်။ ပေါ့ဘာအား ခေါ်ယူရန် စပိန်အသင်းကြီးဖြစ်သည့် ဘာစီလိုနာအသင်းနှင့် သူ၏အသင်းဟောင်း စီးရီးအေကလပ် ဂျူဗင်တပ်စ်အသင်းတို့က စိတ်ဝင်စားနေပြီး ယခု PSG အသင်းကလည်း သူ့ကိုခေါ်ယူရန် ပစ်မှတ်ထားနေကြောင်း သိရှိရသည်။

ဗြိတိန်လောင်းကစားကုမ္ပဏီအချို့ကမူ မော်ရင်ဟို နှင့် ပေါ့ဘာ နှစ်ဦးအနက် မန်ယူအသင်းမှ မည်သူအရင်ထွက်ရမည်ဆိုသည်ကို ကြေးဖွင့်လျက်ရှိနေကြောင်း သိရှိရသည်။ ယင်းကဲ့သို့ ကြေးဖွင့်ရာတွင် မော်ရင်ဟို ထွက်ခွာရမည့် လောင်းကြေးမှာ ပိုမြင့်နေကြောင်းလည်း Daily Express သတင်းစာက ဖော်ပြခဲ့သည်။ SkyBet ၏ အလေးပေးချက်အရ ပေါ့ဘာထက် မော်ရင်ဟို အရင်ထွက်ရမည့်လောင်းကြေးမှာ (၁း၆)လေး ဖြစ်ပြီး မော်ရင်ဟိုထက် ပေါ့ဘာ အရင်ထွက်ရမည့်လောင်းကြေးမှာ (ရး၂)လေးဖြစ်ကြောင်း သိရှိရသည်။

မော်ရင်ဟိုသည် ပြီးခဲ့သည့်ရက်သတ္တပတ်အတွင်းက ပေါ့ဘာအား ဒုတိယအသင်းခေါင်း ဆောင်အဖြစ် ခန့်အပ်တော့မည်မဟုတ်ကြောင်း အတည်ပြုကြေညာခဲ့သည်။ ပေါ့ဘာသည် မော်ရင်ဟို၏နည်းစနစ်များကို လူသိရှင်ကြားဝေဖန်ပြီးနောက် မော်ရင်ဟိုက ယင်းကဲ့သို့ ဆုံးဖြတ်ခဲ့ခြင်းလည်းဖြစ်သည်။ လက်ရှိအချိန်တွင် ပေါ့ဘာကို ခေါ်ယူရန်စိတ်ဝင်စားနေသော ဘာစီလိုနာအသင်း၏ ဘုတ်အဖွဲ့၌ သူ့အားခေါ်ယူမည့် ကိစ္စနှင့်ပတ်သက်၍ အမြင်ကွဲလွဲလျက်ရှိနေကြောင်းလည်း ESPN သတင်းဌာနက ဖော်ပြခဲ့သည်။

ဘာစီလိုနာအသင်းသည် ကွင်းလယ်အား အားဖြည့်ရန်အတွက် ပေါ့ဘာအပြင် PSG အသင်းမှ ရာဘီယူ၊ အေဂျက်စ်အသင်းမှ ဖရန်ကီဒီယွန်း အစရှိသော ကစားသမားများကိုလည်း ပစ်မှတ်ထားနေပြီး ၎င်းတို့(၃)ဦးအနက် ပေါ့ဘာမှာ မြင့်မား သည့်လစာငွေ၊ မြင့်မားသည့်ပြောင်းရွှေ့ကြေးနှင့် မြင့်မားသည့်အေးဂျင့်ကြေးများ ပေးရဖွယ်ရှိ နေသောကြောင့် ဘာစီလိုနာဘုတ်အဖွဲ့ဝင်အချို့က ၎င်းကို ခေါ်ယူရန်ဆန္ဒမရှိကြောင်း ESPN သတင်း ဌာနက ဖော်ပြခဲ့သည်။