အလုပ်သမားများနှင့် ပတ်သက်သည့် သတင်းစာ ရှင်းလင်းပွဲကို စက်တင်ဘာ ၈ ရက်က ပြုလုပ်စဉ်
လုပ်ခလစာနည်းခြင်း၊ ကုန်ဈေးနှုန်း ကြီးမြင့်ခြင်း စသည့်အကြောင်းများကြောင့် စားဝတ်နေရေး ပြဿနာများ ဖြစ်ပေါ်နေပြီး ထွက်ပေါက်ပိတ်နေကြောင်း အလုပ်သမားအရေး လှုပ်ရှားသူများ၏ ပြောကြားချက်အရ သိရသည်။
စက်တင်ဘာ ၈ ရက် နံနက် ၁၁ နာရီက ရန်ကုန်မြို့ လမ်း ၅၀ ရှိ မြန်မာဂျာနယ်လစ် ကွန်ရက်ရုံးခန်းတွင် ပြည်သူ့လွှတ်တော် အလုပ်သမားရေးရာ၊ အငြင်းပွားမှု ဖြေရှင်းရေးဥပဒေ ဒုတိယအကြိမ် ပြင်ဆင်ချက် ဥပဒေကြမ်း၌ ထောင်ဒဏ်ထည့်သွင်းရေးနှင့် ကုန်ဈေးနှုန်း ကြီးမြင့်နေမှုကြောင့် အလုပ်သမားများ ကြုံတွေ့နေရသော အခက်အခဲ လုပ်ခလစာ ပြဿနာများနှင့် စပ်လျဉ်း၍ အလုပ်သမားအဖွဲ့များ ပူးပေါင်းထားသည့် လွတ်လပ်သော မြန်မာနိုင်ငံလုံးဆိုင်ရာ အလုပ်သမားရေးရာအဖွဲ့ ဗဟိုစည်းရုံးရေး ကော်မတီက သတင်းစာ ရှင်းလင်းခဲ့သည်။
“ကုန်ဈေးနှုန်းနဲ့ အလုပ်သမားထုနဲ့က အများကြီး တိုက်ရိုက်အချိုးကျပါတယ်။ ဝင်ငွေနဲ့ ထွက်ငွေ မမျှတလို့ ပြောနေရတယ်။ တစ်နေ့တာ စားဝတ်နေရေးကို ဖြေရှင်းတဲ့ အခါ အဆောင်ခတွေ၊ ထမင်းနှစ်နပ်နှုန်း၊ ခရီး စရိတ် စသဖြင့်တွက်ကြည့်တဲ့အခါမှာ ကျွန်မတို့ တကယ်ကို ၅၆၀၀ ထက်မနည်း ရရှိမှသာ အဆင်ပြေမယ်လို့ တွက်ပြီးသား။ ၄၈၀၀ သတ်မှတ်တယ်။ ကုန်ဈေးနှုန်းတွေကလည်း အဆမတန် မြင့်တက်လာတဲ့ အခါကျတော့ စားဝတ်နေရေး ပြဿနာတွေက ပေါ်လာတယ်။ ကျွန်မတို့က အစိုးရကို သွားပြီးတော့ မလောက်ငတဲ့ ပြဿနာကို အတင်းဖြေရှင်းခိုင်းနေတာ မဟုတ်ပါဘူး။ ကုန်ဈေးနှုန်းငြိမ်အောင် လုပ်ပေးဖို့ လိုအပ်ပါတယ်” ဟု အလုပ်သမားရေး လှုပ်ရှားသူ ဒေါ်သက်သက်အောင်က ပြောကြားသည်။
ထို့ပြင် အလုပ်သမားပြဿနာများ ဖြေရှင်းရာ၌ ဥပဒေအရ ခုံသမာဓိကောင်စီသို့ အလုပ်ရှင်၊ အလုပ်သမား တက်ရောက် ဖြေရှင်းရကြောင်း၊ ထိုသို့ဖြေရှင်းရာတွင် အလုပ်ရှင်၊ အလုပ်သမားများမှာ ခုံသမာဓိကောင်စီ၏ ဆုံးဖြတ်ချက်ကို လိုက်နာရကြောင်း၊ သို့သော် အလုပ်ရှင်များမှာ ခုံသမာဓိကောင်စီ၏ ဆုံးဖြတ်ချက်ကို မလိုက်နာဘဲ ပြင်ပတရားရုံးများတွင်သာ ဖြေရှင်းကြကြောင်း၊ ပြင်ပတရားရုံးများကလည်း ပြစ်မှုအတွက် ဒဏ်ငွေ ကျပ် ၁၀ သိန်းသာ ချမှတ်လေ့ရှိကြောင်း၊ လုပ်ငန်းရှင်များကလည်း ဒဏ်ငွေ ကျပ် ၁၀ သိန်းသာ ဆောင်လေ့ရှိပြီး အလုပ်သမားများကို အလုပ်ထုတ်မှုများကြောင့် အလုပ်သမားသမဂ္ဂများပါ ပျက်စီးသွားကြောင်း၊ ထို့ပြင် ပြင်ပတရားရုံးများတွင် အမှုရင်ဆိုင်ရပါက ကြာမြင့်သည့် ရုံးချိန်းများကြောင့် အလုပ်သမားများမှာ ရှေ့နေငှားခ၊ ခရီးစရိတ်များ မတတ်နိုင်ကြောင်း အလုပ်သမားအရေး လှုပ်ရှားသူများက ဆိုသည်။
“ဒီပြဿနာတွေက ဘယ်မှာတက်လဲဆိုတော့ ဆန္ဒပြမှုတွေနဲ့ အလုပ်သမားတွေက တရားစွဲခံရရော။ အလုပ်သမားတွေက ထွက်ပေါက်ပိတ်နေပြီ။ ထွက်ပေါက်ပိတ်နေတယ်။ ကျွန်တော်တို့ဆီမှာ လာအကူအညီတောင်းတဲ့ ခုံသမာဓိကောင်စီတက်တဲ့ အမှု ၁၂ မှုက ၁၀ မှုမှာ လုပ်ငန်းရှင်တွေက အမိန့်ကို မလိုက်နာဘူး” ဟု အလုပ်သမားရေး လှုပ်ရှားနေသူ ကိုနန္ဒစစ်အောင်က ပြောကြားသည်။
ထိုနည်းတူ ခုံသမာဓိကောင်စီ၏ ဆုံးဖြတ်ချက်ကို မလိုက်နာပါက ငွေဒဏ်ကျခံရမည့်အစား ထောင်ဒဏ်ကျခံရမည်ဟု အစားထိုးသင့်ကြောင်း၊ ပြည်ထောင်စု မြန်မာနိုင်ငံတော်၏ တည်ဆဲ အလုပ်သမားရေးရာ ဥပဒေများတွင် တားမြစ်ချက်များကို ချိုးဖောက်ပါက ပြစ်မှုပြစ်ဒဏ်များနှင့် စပ်လျဉ်း၍ ထောင်ဒဏ် ငွေဒဏ် နှစ်ရပ်စလုံးဖြစ်စေ ပြဋ္ဌာန်းထားကြောင်း၊ ယင်းကြောင့် အလုပ်သမားရေးရာ အငြင်းပွားမှု ဖြေရှင်းရေး ဥပဒေကို ဒုတိယအကြိမ် ပြင်ဆင်သည့် ဥပဒေကြမ်း၌ တရားဥပဒေ ပြဋ္ဌာန်းသင့်ပါကြောင်း၊ အမျိုးသားလွှတ်တော် အတည်ပြုချက် ဥပဒေကြမ်းကို ဆက်လက်အတည်ပြု ပြဋ္ဌာန်းသင့်ကြောင်း၊ ILO က ထောင်ဒဏ်ပါဝင်နေမှုကို သဘောမတူဟု ပြောကြားထားကြောင်း၊ ILO အနေဖြင့် အလုပ်သမားထုနှင့် အလုပ်သမား သမဂ္ဂများ၏ အကျိုးစီးပွားနှင့် အလုပ်သမား အခွင့်အရေး ထိခိုက်စေမည့် လုပ်ရပ်များကို မဆောင်ရွက်သင့်ကြောင်း အလုပ်သမားအရေး ဆောင်ရွက်သူ တရားလွှတ်တော်ရှေ့နေ ဦးဌေးက ပြောကြားသည်။
“ကျွန်တော်တို့ ဒီမှာရှိတဲ့ အလုပ်သမားတွေကို အရပ်ဘက်တရားရုံး လွှဲတာက ဒီကနေ့ မြန်မာနိုင်ငံရဲ့ တရားစီရင်ရေးက ဘယ်လောက်အထိ တရားဥပဒေ စိုးမိုးမှုရှိလဲဆိုတာ ကျွန်တော်တို့ မေးခွန်းထုတ်ချင်ပါတယ်။ နောက်ပြီး ILO က သူတို့ပြဋ္ဌာန်းထားတဲ့ ၈၇ ကို သူတို့ကိုယ်တိုင် မထီမဲ့မြင်ပြုတာ။ အဲဒီအတွက် ကျွန်တော်တို့ အလုပ်သမား ဖြေရှင်းရေး ဥပဒေမှာ ထောင်ဒဏ်ထည့်သွင်းရေး ကိစ္စနဲ့ ပတ်သက်ပြီးတော့ အကြံပေးတာ မဟုတ်ဘဲနဲ့ ဒီလိုဝင်ရောက် စွက်ဖက်တာကို ကျွန်တော်တို့ အလုပ်သမားထုက လက်မခံပါဘူးလို့ ပြောချင်ပါတယ်” ဟု အလုပ်သမားရေး လှုပ်ရှားသူ ဦးထွန်းထွန်းနိုင်က ပြောကြားသည်။
