ရန်ကုန်မြို့ ဆူးလေဘုရားလမ်းနှင့် ဘဏ်လမ်းထောင့်တွင် တည်ရှိသည့် ရန်ကုန်စတော့အိတ်ချိန်း တစ်နေရာကို တွေ့ရစဉ်

နမ့်ပေါ်ရေအားလျှပ်စစ် စီမံကိန်းအတွက် ဓာတ်အားဝယ်ယူရေး သဘောတူစာချုပ် ချုပ်ဆိုပြီးပါက လုပ်ငန်းတန်ဖိုးသင့်ခြင်းနှင့် လုပ်ငန်းအလားအလာ ညွှန်းတမ်းတို့ ရေးဆွဲကာ မြန်မာနိုင်ငံ ငွေချေးသက်သေခံ လက်မှတ်လုပ်ငန်း ကြီးကြပ်ရေးကော်မရှင် (SECM) နှင့် ရန်ကုန်စတော့အိတ်ချိန်း (YSX) သို့ စိစစ်ခံရန် တင်ပြပြီး ၂၀၁၈ ခုနှစ် ပထမသုံးလပတ်အတွင်း အတည်ပြုချက် ရရှိစေရန်နှင့် စာရင်းဝင်ကုမ္ပဏီဖြစ်စေရန် ဆောင်ရွက်သွားမည် ဖြစ်ကြောင်း Great Hor Kham ကုမ္ပဏီ၏ ဒါရိုက်တာအဖွဲ့ဥက္ကဋ္ဌ စိုင်းအုန်းမြင့်က ကုမ္ပဏီ၏ ၂၀၁၇ ခုနှစ် နှစ်ပတ်လည် အစီရင်ခံစာ အိတ်ဖွင့်ပေးစာတွင် ပြောကြားထားသည်။

၂၀၁၅ ခုနှစ် ဒီဇင်ဘာ ၉ ရက် ရန်ကုန်စတော့အိတ်ချိန်း ဖွင့်ပွဲတွင် SECM မှ Great Hor Kham ကုမ္ပဏီသည် ရန်ကုန်စတော့ အိတ်ချိန်းသို့ စာရင်းဝင်နိုင်သည့် အလားအလာရှိသော ကုမ္ပဏီတစ်ခုဖြစ်ကြောင်း ကြေညာခဲ့ပြီးနောက် စတော့အိတ်ချိန်းသို့ စာရင်းဝယ်နိုင်ရေး ပြင်ဆင်မှုများဖြစ်သော Due Diligence, Internal Control Review, Coporate Governance ဆိုင်ရာကိစ္စရပ်များကို စတင်ဆောင်ရွက်ခဲ့သည်။

ထိုသို့ ဆောင်ရွက်ခဲ့သော်လည်း အစိုးရအဖွဲ့အသစ် စတင်လွှဲပြောင်း တာဝန်ယူသည့် ကာလဖြစ်ခြင်းနှင့် မြန်မာနိုင်ငံ ရင်းနှီးမြှုပ်နှံမှု ကော်မရှင် ပြန်လည်ဖွဲ့စည်းသည့် ကာလများနှင့် တိုက်ဆိုင်နေသဖြင့် နမ့်ပေါ်ရေအားလျှပ်စစ် စီမံကိန်းအတွက် ရင်းနှီးမြှုပ်နှံမှု ခွင့်ပြုမိန့် လျှောက်ထားရာတွင် ခြောက်လခန့် ကြန့်ကြာခဲ့ကာ၂၀၁၇ ခုနှစ် မေလမှသာလျှင် ခွင့်ပြုမိန့်ရရှိခဲ့သည်။ ထို့ကြောင့် လျှပ်စစ်နှင့် စွမ်းအင်ဝန်ကြီးဌာန၊ လျှပ်စစ်ဓာတ်အား ထုတ်လုပ်ရေးလုပ်ငန်းနှင့် ဓာတ်အားဝယ်ယူရေး သဘောတူစာချုပ် ချုပ်ဆိုမည့် ကိစ္စသည်လည်း အလိုအလျောက် နောက်ကျခဲ့ကြောင်း သိရသည်။

နမ့်ပေါ်ရေအား လျှပ်စစ်စီမံကိန်း အတွက် ဓာတ်အားဝယ်ယူရေး သဘောတူစာချုပ် ချုပ်ဆိုပြီးပါက လုပ်ငန်းတန်ဖိုး သင့်ခြင်းနှင့် လုပ်ငန်းအလားအလာ ညွှန်းတမ်းတို့ ရေးဆွဲကာ မြန်မာနိုင်ငံ ငွေချေးသက်သေခံ လက်မှတ်လုပ်ငန်း ကြီးကြပ်ရေးကော်မရှင် (SECM)  နှင့် ရန်ကုန်စတော့အိတ်ချိန်း (YSX) သို့ စိစစ်ခံရန် တင်ပြပြီး ၂၀၁၈ ခုနှစ် ပထမသုံးလပတ်အတွင်း အတည်ပြုချက် ရရှိစေရန်နှင့် စာရင်းဝင်ကုမ္ပဏီ ဖြစ်စေရန် ဆောင်ရွက်သွားမည်ဖြစ်သည်။

၂၀၁၆ ခုနှစ် အစုရှယ်ယာရှင်များ၏ တတိယအကြိမ် နှစ်ပတ်လည် အစည်းအဝေး ဆုံးဖြတ်ချက်အရ ယခင် ခွင့်ပြုမတည်ငွေရင်း ကျပ်သန်း ၅၀၀၀ အစား၊ ကျပ်သန်း ၃၀၀၀၀ အထိ တိုးမြှင့်ခြင်းနှင့် ယခင်အစုရှယ်ယာတစ် စောင်လျှင် ကျပ် ၁၀၀၀၀၀ အစား၊ ကျပ် ၁၀၀၀ တန်သို့ အစုရှယ်ယာ ခွဲခြမ်းတန်ဖိုး သတ်မှတ်ခြင်းအား၂၀၁၇-၂၀၁၈ ဘဏ္ဍာ ရေးနှစ်တွင် ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန၏ အတည်ပြုချက်များ ကို ရရှိခဲ့သည်။ ၂၀၁၆-၂၀၁၇ ဘဏ္ဍာနှစ် ကုန်ဆုံးချိန်တွင် ကုမ္ပဏီအနေဖြင့် ရင်းနှီးမြှုပ်နှံမှုလုပ်ငန်းများ တိုးမြှင့်ဆောင်ရွက်နေသဖြင့် ၂၀၁၆-၂၀၁၇ ဘဏ္ဍာနှစ်အတွက် ရှယ်ယာရှင်များသို့ အမြတ်ဝေစု ခွဲဝေပေးခြင်း မရှိဘဲ လက်ရှိကုမ္ပဏီ၏ အသားတင်ပိုင်ဆိုင်မှုမှာ ကျပ်သန်း ၁၇၅၄၅ ဒသမ ၅၈ နှင့် ကုမ္ပဏီမှ ဖယ်ချန်ထားသည့် အမြတ်ငွေ ကျပ် ၁၁၄၉ ဒသမ ၇၈ သန်းရှိကာ ရှယ်ယာတစ်စောင်၏ စာရင်းတန်ဖိုးမှာ ကျပ်၂၄၆၇ ဒသမ ၉ ကျပ်အထိ ရှိနေကြောင်း သိရသည်။

လက်ရှိ ရန်ကုန်စတော့ အိတ်ချိန်းတွင် FMI၊ MTSH၊ MCB နှင့် ပထမပုဂ္ဂလိကဘဏ်တို့ အရောင်းအဝယ် ပြုလုပ်နေပြီး ၂၀၁၈ ခုနှစ်အတွင်း MAPCO၊ Great Hor Kham နှင့် TMH Telecom  တို့ စာရင်းဝင် ဖြစ်လာရန် မျှော်လင့်ထားပြီး လက်ရှိတွင် အစုရှယ်ယာ ၁၁ သန်းကျော်အတွက် ကျပ် ၁၁ ဘီလျံကျော် မ,တည်ထားသည့် တာမိုးညဲ ဦးမြင့်လွင်၏ TMH Telecom သည် ရန်ကုန်စတော့အိတ်ချိန်းသို့ ဝင်ရောက်ရန် ခွင့်ပြုချက် ရရှိခဲ့ပြီးဖြစ်ပြီး လက်ရှိတွင် ပြည်သူများသို့ ကနဦး အစုရှယ်ယာ ကျပ် ၁ ဒသမ ၆ ဘီလျံဖိုးခန့် ရောင်းချရန် ဆောင်ရွက်နေပြီး ၂၀၁၈ ခုနှစ် ဇန်နဝါရီ ၂၄ ရက်တွင် စာရင်းဝင်ကုမ္ပဏီ ဖြစ်လာမည်ဖြစ်သည်။