ရခိုင်ပြည်နယ်တွင် ဖြစ်ပွားခဲ့သည့် ပဋိပက္ခ အခြေအနေများကြောင့် ရင်းနှီးမြှုပ်နှံမှုအပေါ် အတိုင်းအတာတစ်ခုအထိ ထိခိုက်မှုရှိနိုင်ကြောင်းနှင့် ရင်းနှီးမြှုပ်နှံသူများအကြား လက်ရှိပြုပြင်ပြောင်းလဲမှု အရှိန်အဟုန် နှေးကွေးလျက်ရှိဟု အမြင်များရှိကြောင်း အောက်တိုဘာ ၄ ရက်က ကမ္ဘာ့ဘဏ် မြန်မာနိုင်ငံဆိုင်ရာ ရုံးတွင်ပြုလုပ်သည့် မြန်မာ့စီးပွားရေး စောင့်ကြည့်အစီရင်ခံစာနှင့်ပတ်သက်သည့် တွေ့ဆုံမေးမြန်းပွဲမှ သိရသည်။
“ရခိုင်ပြည်နယ်မှာ ဖြစ်ပွားပေါ်ပေါက်ခဲ့တဲ့ ပဋိပက္ခအခြေအနေကြောင့် ရင်းနှီးမြှုပ်နှံမှုအပေါ် အတိုင်းအတာတစ်ခုအထိ ထိခိုက်နိုင်တယ်ဆိုတာနဲ့ ပတ်သက်ပြီး နိုင်ငံခြားရင်းနှီးမြှုပ်နှံမှု သက်ရောက်နိုင်တာကို ပြောဖို့ အချက်အလက်မရှိပါဘူး။ ပြောနိုင်တာကတော့ အချိန်မရွေး လုံခြုံရေးဆိုင်ရာ ဆိုးရွားလာနိုင်တယ်ဆိုတဲ့ အခြေအနေက ပြည်တွင်းနဲ့ ပြည်ပ ရင်းနှီးမြှုပ်နှံမယ့်သူတွေကို ထပ်ပြီး စဉ်းစားစေတာ၊ လက်တွန့်တာ၊ ရပ်ဆိုင်းထားတာတွေ ဖြစ်နိုင်ပါတယ်” ဟု ကမ္ဘာ့ဘဏ် မြန်မာ၊ ကမ္ဘောဒီးယားနှင့် လာအို ပီဒီအာနိုင်ငံဆိုင်ရာ ဒါရိုက်တာ Ellen Goldstein က ပြောကြားသည်။
မြန်မာနိုင်ငံ၏ စီးပွားရေးတိုးတက်မှုနှုန်းသည် ၂၀၁၆ ခုနှစ်တွင် ၅ ဒသမ ၉ ရာခိုင် နှုန်းရှိရာမှ ယခုနှစ်တွင် ၆ ဒသမ ၄ ရာခိုင်နှုန်းအထိ ရှိလာမည်ဟု ခန့်မှန်းထားပြီး ယင်းမှာ စွမ်းအင်နှင့် သယ်ယူပို့ဆောင်ရေးကဲ့သို့ အရေးပါသည့် အခြေခံအဆောက်အအုံကဏ္ဍတို့တွင် အစိုးရနှင့် ပုဂ္ဂလိကရင်းနှီးမြှုပ်နှံမှုများ မြင့်တက်လာဖွယ်ရှိနေပြီး ငွေကြေးဖောင်းပွမှုနှုန်းမှာလည်း အားပျော့လာဖွယ် ရှိနေကြောင်း မြန်မာ့စီးပွားရေး စောင့်ကြည့် အစီရင်ခံစာနှင့် ပတ်သက်သည့် သတင်းထုတ်ပြန်ချက်အရ သိရသည်။
ထို့ပြင် သတင်းထုတ်ပြန်ချက်တွင် တစ်ကမ္ဘာလုံးအတိုင်းအတာဖြင့် စီးပွားရေးတိုး တက်မှုအခြေအနေများ တိုးတက်ကောင်းမွန်လာသည့်အတွက် မြန်မာနိုင်ငံသည် ရင်းနှီးမြှုပ်နှံမှု အခွင့်အလမ်းများကို အသုံးချနိုင်မည့် အလားအလာများရှိနေကြောင်း၊ သို့သော် စီးပွားရေးတိုးတက်မှုနှုန်းအပေါ် သက်ရောက်နိုင်သည့် အရာများလည်းရှိကြောင်း၊ လက်တလော ရခိုင်ပြည်နယ်တွင် ဖြစ်ပွားပေါ်ပေါက်ခဲ့သည့် ပဋိပက္ခအခြေအနေများကြောင့် ရင်းနှီးမြှုပ်နှံမှုများအပေါ် အတိုင်းအတာတစ်ခုအထိ ထိခိုက်မှုရှိနိုင်ကြောင်း ဖော်ပြပါရှိသည်။ ထို့ပြင် ရင်းနှီးမြှုပ်နှံသူများအကြား လက်ရှိတွင် ပြုပြင်ပြောင်းလဲမှု အရှိန်အဟုန် နှေးကွေးလျက်ရှိသည်ဟူသော အမြင်များရှိနေသည့်အပြင် သဘာဝဘေး အန္တရာယ်များ ကျရောက်နိုင်သည့် အနေအထားများကြောင့် နဂိုရှိနေသည့် စိန်ခေါ်မှုများကို ပိုမိုဆိုးရွားစေနိုင်သည်ဟု သုံးသပ်ထားသည်ကို ကမ္ဘာ့ဘဏ်၏ သတင်းထုတ်ပြန်ချက်တွင် ဆိုထားသည်။
သိသာထင်ရှားသည့် ပြုပြင်ပြောင်းလဲမှုများနှင့် နိုင်ငံခြားရင်းနှီးမြှုပ်နှံမှု ကတိကဝတ်များ ခိုင်မာအားကောင်းမှုရှိနေသော်လည်း အကောင်အထည်ဖော်မှုအပိုင်းတွင် နှေးကွေးမှုများနှင့် ရင်ဆိုင်နေရကြောင်း၊ မြန်မာ့စီးပွားရေး စောင့်ကြည့်အစီရင်ခံစာက အကြံပြုချက်များအနက် တစ်ခုမှာ လက်ရှိဆောင်ရွက်လျက်ရှိသည့် အရေးပါသော ပြုပြင်ပြောင်းလဲမှုများအား ဆက်လက်ဆောင်ရွက်ရန်နှင့် ယင်းသို့ ဆောင်ရွက်လျက်ရှိသည်နှင့် စပ်လျဉ်းပြီး သက်ဆိုင်သူများအားလုံးထံ ပြန်ကြားဆက်သွယ်ပေးမှုများ မြှင့်တင်ဆောင်ရွက်ရန်ဖြစ်ကြောင်း၊ ယင်းဆောင်ရွက်ချက်များအနက် အချို့မှာ ရင်းနှီးမြှုပ်နှံသူများ၏ ယုံကြည်မှုကို မြှင့်တင်နိုင်ရန် ဆောင်ရွက်လျက်ရှိသည့် လုပ်ငန်းများအနက် ငွေရေးကြေးရေး ဝန်ဆောင်မှုများ၊ လျှပ်စစ်ဓာတ်အား၊ မြေယာပိုင်ဆိုင်နိုင်မှု၊ စီးပွားရေးဆိုင်ရာနှင့် အလုပ်သမားရေးရာ ဥပဒေမူဘောင်များ အစရှိသည်တို့ကို တိုးတက်ကောင်းမွန်လာစေမည့် လုပ်ဆောင်ချက်များ ပါဝင်သည်ဟု မြန်မာ့စီးပွားရေး စောင့်ကြည့်အစီရင်ခံစာ နှင့်ပတ်သက်သည့် သတင်းထုတ်ပြန်ချက်က ဆိုထားသည်။
