သိပ္ပံပညာရှင်များသည် ကူးစက်မြန် H5 ငှက်တုပ်ကွေးဗိုင်းရပ်စ်ကို ဩစတြေးလျပင်လယ်ပျော်ငှက်တစ်ကောင်တွင် ပထမဆုံးအကြိမ်အဖြစ် ရှာဖွေတွေ့ရှိခဲ့ကြောင်း အစိုးရက ဇူလိုင် ၁၀ ရက်တွင် ပြောကြားခဲ့သည်။
ကမ္ဘာတစ်ဝန်းရှိ မွေးမြူရေးကြက်ငှက်များနှင့် တောရိုင်းငှက်များတွင် ပြင်းထန်သောရောဂါဝေဒနာများနှင့် သေဆုံးမှုနှုန်း မြင့်မားခြင်းတို့ကို ဖြစ်ပေါ်စေခဲ့သည့် H5 ဗိုင်းရပ်စ်မျိုးစိတ်ဘေးမှ ကင်းဝေးခဲ့သည့် တစ်ခုတည်းသော တိုက်ကြီးအဖြစ် ဩစတြေးလျနိုင်ငံသည် နှစ်ပေါင်းများစွာတိုင် ရှိနေခဲ့ခြင်းဖြစ်သည်။
ဇွန်လကတည်းက ဩစတြေးလျတွင် H5 ငှက်တုပ်ကွေး အတည်ပြုလူနာ စုစုပေါင်း ၁၂ ဦး တွေ့ရှိခဲ့သော်လည်း ၎င်းတို့အားလုံးမှာ ရွှေ့ပြောင်းပင်လယ်ပျော်ငှက်များတွင်သာ ဖြစ်ပြီး ဒေသတွင်း တောရိုင်းတိရစ္ဆာန်များတွင် ဖြစ်ပွားခဲ့ခြင်း မဟုတ်ပေ။
ဓာတ်ခွဲခန်းစစ်ဆေးမှုများအရ တောင်ပိုင်းဩစတြေးလျပြည်နယ် ရုတ်ဘ် မြို့ရှိ ဂျောက်ချွန်ငှက်ကြီး တစ်ကောင်တွင် အဆိုပါရောဂါ ကူးစက်ခံထားရကြောင်း အတည်ပြုနိုင်ခဲ့သည်။
"ဒါဟာ စိုးရိမ်စရာကောင်းတဲ့ ဖြစ်ပေါ်တိုးတက်မှုတစ်ခု ဖြစ်တာမှန်ပေမဲ့ မျှော်လင့်မထားတဲ့အရာတော့ မဟုတ်ပါဘူး" ဟု စိုက်ပျိုးရေးဝန်ကြီး ဂျူလီ ကောလင်း က ပြောကြားခဲ့သည်။
"ဒါပေမဲ့ လက်ရှိအချိန်အထိတော့ H5 ငှက်တုပ်ကွေးကြောင့် အစုလိုက်အပြုံလိုက် သေဆုံးတာမျိုး မရှိသေးဘူးဆိုတာကို ကျွန်မအနေနဲ့ ထပ်လောင်းပြောကြားလိုပါတယ်" ဟု ၎င်းက တက်စမေးနီးယားကျွန်းပြည်နယ်၏ မြို့တော် ဟိုဘတ်ရှိ သတင်းစာရှင်းလင်းပွဲတစ်ခုတွင် သတင်းထောက်များကို ပြောကြားခဲ့သည်။
ဗိုင်းရပ်စ်သည် အခြားတိရစ္ဆာန်အုပ်စုများ၊ မွေးမြူရေးကြက်ငှက်များ သို့မဟုတ် စိုက်ပျိုးမွေးမြူရေးစနစ်များသို့ ကူးစက်ပျံ့နှံ့သွားသည့် လက္ခဏာမတွေ့ရဘဲ လူသားများ၏ ကျန်းမာရေးအတွက်လည်း စိုးရိမ်ရမှုအဆင့် နိမ့်ပါးလျက်ရှိနေဆဲဖြစ်သည်ဟု ဝန်ကြီးက ဆိုသည်။
ဩစတြေးလျငှက်ထံသို့ ဗိုင်းရပ်စ် ကူးစက်ပျံ့နှံ့သွားနိုင်သည့် လမ်းကြောင်းများကို ဖော်ထုတ်နိုင်ရန် သိပ္ပံပညာရှင်များက ကြိုးပမ်းနေကြကြောင်းလည်း ကောလင်းက ထပ်လောင်းပြောကြားခဲ့သည်။
Ref:AFP
