မည်သည့် လက်နက်ကိုင်အဖွဲ့အစည်းက အနိုင်ရသည်ဖြစ်စေ၊ အမြဲတစေ ဆုံးရှုံးနေရသည်မှာ မြန်မာနိုင်ငံရှိ ပြည်ထောင်စုသားများ၏ အသက် အိုးအိမ်စည်းစိမ်များသာဖြစ်သဖြင့် ငြိမ်းချမ်းရေးစကားဝိုင်းဖြင့် နိုင်ငံကို ပြန်လည်တည်ဆောက် ကယ်တင်ရန် စတော့ဟုမ်းကမ္ဘာ့ငြိမ်းချမ်းရေးဆုရှင် IBEC ဆရာတော် အဂ္ဂမဟာသဒ္ဓမ္မဇောတိကဓဇ ဒေါက်တာ အရှင်သောဘိတက ယနေ့ (အောက်တိုဘာ ၂ ရက်)တွင် မေတ္တာရပ်ခံတောင်းဆိုခဲ့သည်။
လက်နက်ကိုင်အသီးသီး၏ စစ်ပွဲတွေအစား ငြိမ်းချမ်းရေးကိုဆွေးနွေးရန် အချိန်တန်ပြီဖြစ်ဟု IBEC ဆရာတော်က မေတ္တာရပ်ခံချက် ထုတ်ပြန်ခဲ့ခြင်းဖြစ်သည်။
IBEC ဆရာတော်၏ မေတ္တာရပ်ခံချက်တွင်မြန်မာနိုင်ငံသည် လွတ်လပ်ရေးရပြီးစကာလမှစ၍ ယနေ့တိုင် မြန်မာနိုင်ငံသားတိုင်းရင်းသား ညီအကိုမောင်နှမများ တန်းတူညီမျှမရှိမှု ပြဿနာ၊ ပင်လုံကတိကဝတ် ပြဿနာ၊ လူမျိူးစု ပြဿနာ များအကြား အချင်းချင်းလက်နက်ကိုင်စစ်ပွဲများ အတောမသတ်ဆင်နွှဲနေခဲ့ကြသည်မှာ ယနေ့တိုင် အထိ ပြည်သူပြည်သားများ သိရှိပြီးဖြစ်ကြောင်း ဖော်ပြထားသည်။
ထို့ပြင် ၂၀၂၁ ခုနှစ်၊ ဖေဖော်ဝါရီ ၁ ရက်မှ ၂၀၂၅ ခုနှစ်၊ အောက်တိုဘာအထိ မြန်မာနိုင်ငံသားများ အချင်းချင်းလက်နက်ကိုင်တိုက်ပွဲဆင်နွှဲကြသဖြင့် မြန်မာနိုင်ငံသားလူငယ် များစွာ သေကြေပျက်စီးကာ တိုင်းပြည်၏အနာဂတ်ပျက်စီးနေသည်ကို ပြည်သူပြည်သားများသိရှိပြီး ဖြစ်သကဲ့သို့ မြို့ပြကျေးရွာ နှင့် နိုင်ငံတော်၏ အခြေခံအရင်းအမြစ်များဆုံးရှုံးလျက်ရှိကြောင်းနှင့် မည်သည့် လက်နက်ကိုင်အဖွဲ့အစည်းက အနိုင်ရသည်ဖြစ်စေ၊ အမြဲတစေ ဆုံးရှုံးနေရသည်မှာ မြန်မာနိုင်ငံတော် ကြီးနေ ပြည်ထောင်စုသားများ၏ အသက် အိုးအိမ်စည်းစိမ်များသာဖြစ်ကြောင်း ထုတ်ပြန်ချက်တွင် IBEC ဆရာတော်က မိန့်ကြားထားသည်။
မြတ်ဗုဒ္ဓ၏ တရားတော်အရ ရန်ကိုရန်ချင်း တုံ့ပြန်နှင်းပြီး အချင်းချင်းသတ်ဖြတ်ကြပါက ဘယ်သောအခါမှ စစ်ပွဲတွေပြီးဆုံးမည်မဟုတ်သဖြင့် မြန်မာ့လက်နက်ကိုင်အဖွဲ့အစည်းအသီးသီးဖြစ်ကြသည့် မြန်မာ့တပ်မတော်၊ KIA၊ AA၊ KNU၊ MNDAA၊ TNLA၊ UWSA၊ PDF အပါအဝင် တိုင်းရင်းသားလက်နက်ကိုင်အသီးသီး အနေဖြင့် စစ်ပွဲများနှင့် အချင်းချင်းသတ်ဖြတ်မှုကို ရပ်တန့်ကာ ငြိမ်းချမ်းရေးစကားဝိုင်းဖြင့် အမိမြန်မာနိုင်ငံကို ပြန်လည်တည်ဆောက် ကယ်တင်ရန် တောင်းဆိုကြောင်း IBEC ဆရာတော်၏ ထုတ်ပြန်ချက်တွင်ဖော်ပြပါရှိသည်။
