ပြည်သူ့စစ်မှုထမ်းသင်တန်း အမှတ်စဉ် (၁၅) သင်တန်းဖွင့်ပွဲများကို တိုင်းစစ်ဌာနချုပ်အသီးသီးရှိ သင်တန်းကျောင်းများတွင် ဇူလိုင် ၁၄ ရက်က ပြုလုပ်ခဲ့ကြောင်း သိရသည်။
အဆိုပါသင်တန်းကျောင်းအသီးသီး၌ ဇူလိုင် ၁၄ ရက် နံနက်ပိုင်းတွင် ပြည်သူ့စစ်မှုထမ်း သင်တန်းအမှတ်စဉ် (၁၅) သင်တန်းဖွင့်ပွဲများ ပြုလုပ်ကြပြီး သင်တန်းဖွင့်ပွဲများတွင် သင်တန်းကျောင်းများအလိုက် ကျောင်းအုပ်ကြီးများက သင်တန်းဖွင့်အမှာစကားများ ပြောကြားခဲ့ကြောင်း သိရသည်။
သင်တန်းဖွင့်ပွဲများသို့ နေပြည်တော်ကောင်စီဥက္ကဋ္ဌ၊ တိုင်းဒေသကြီးနှင့် ပြည်နယ်ဝန်ကြီးချုပ်များ၊ တိုင်းမှူးများနှင့် တာဝန်ရှိသူများ တက်ရောက်၍ ပြည်သူ့စစ်မှုထမ်းသင်တန်းအမှတ်စဉ် (၁၅) မှ သင်တန်းသားများအား တွေ့ဆုံကာ သင်တန်းသားများအတွက် ဂုဏ်ပြုချီးမြှင့်ငွေများနှင့် ပစ္စည်းများ ပေးအပ်ကြပြီး သင်တန်းသားများအား လိုက်လံနှုတ်ဆက်အားပေးခဲ့ကြောင်း သိရသည်။
ပြည်သူ့စစ်မှုထမ်းသင်တန်း အမှတ်စဉ် (၁) ကို ၂၀၂၄ ခုနှစ် ဧပြီ ၈ ရက်မှစတင်၍ ဖွင့်လှစ်သင်ကြားပေးခဲ့ပြီး သင်တန်းအပတ် စဉ် (၂) ကို မေ ၁၄ ရက်တွင်လည်းကောင်း၊ သင်တန်းအမှတ် (၃) ကို ဇွန် ၂၅ ရက်တွင် လည်းကောင်း၊ သင်တန်းအမှတ်စဉ် (၄) ကို သြဂုတ် ၅ ရက်တွင်လည်းကောင်း၊ သင်တန်းအမှတ်စဉ် (၅) ကို စက်တင်ဘာ ၉ ရက်တွင်လည်းကောင်း၊ သင်တန်းအမှတ် (၆) ကို အောက်တိုဘာ ၂၁ ရက်တွင်လည်းကောင်း၊ သင်တန်းအမှတ် (၇) ကို နိုဝင်ဘာ ၂၆ ရက်တွင်လည်းကောင်း၊ သင်တန်းအမှတ် (၈) ကို ဒီဇင်ဘာ ၂၃ ရက်တွင်လည်းကောင်း အသီးသီးဖွင့်လှစ်ခဲ့သည်။
ထို့ပြင် ပြည်သူ့စစ်မှုထမ်းသင်တန်း အမှတ် (၉) ကို ၂၀၂၅ ခုနှစ် ဇန်နဝါရီ ၂၀ ရက်တွင်လည်းကောင်း၊ သင်တန်းအမှတ် (၁၀) ကို ဖေဖော်ဝါရီ ၁၀ ရက်တွင်လည်းကောင်း၊ သင်တန်းအမှတ်စဉ် (၁၁) ကို မတ် ၁၇ ရက် တွင်လည်းကောင်း၊ သင်တန်းအမှတ်စဉ် (၁၂) ကို ဧပြီ ၂၂ ရက်တွင်လည်းကောင်း၊ သင်တန်းအမှတ်စဉ် (၁၃) ကို မေ ၁၉ ရက်တွင်လည်းကောင်း၊ သင်တန်းအမှတ်စဉ် (၁၄) ကို ဇွန် ၁၆ ရက်တွင်လည်းကောင်း အသီးသီး ဖွင့်လှစ်ခဲ့သည်။
လက်ရှိတွင် ပြည်သူ့စစ်မှုထမ်းသင်တန်း အမှတ် (၁) မှ အမှတ် (၁၁) အထိ သင်တန်းတက်ရောက်ပြီးသူများ သင်တန်းပြီးဆုံး၍ သင်တန်းဆင်းကာ တပ်ရင်း/တပ်ဖွဲ့အသီးသီးတွင် တာဝန်ထမ်းဆောင်နေပြီဖြစ်သည်။
သင်တန်းအမှတ်စဉ်တစ်ခုလျှင် သင်တန်းသားဦးရေ ၅၀၀၀ ခန့်ခေါ်ယူမည်ဟု နစက၏ ယခင်ထုတ်ပြန်ပြောဆိုမှုအရ သိရသည်။
