ပြီးခဲ့တဲ့ ရက်ပိုင်းက ဥရောပထိပ်သီးအသင်းတွေရဲ့ ပစ်မှတ်ထားခြင်းကို ခံနေရတဲ့ ကစားသမားတစ်ဦးအကြောင်းကို ဥရောပဘောလုံးဝက်ဘ်ဆိုက်တွေမှာ တွေ့ရတယ်။ စိတ်ဝင်စားခြင်းခံရတဲ့ ကစားသမားကတော့ ဖရန့်ဖတ်အသင်းရဲ့ အီဂျစ်ကြယ်ပွင့်တိုက်စစ်ကစားသမား အိုမာမာမွတ်ဖြစ်ပြီး သူ့ကို ဥရောပထိပ်သီးအသင်းတွေဖြစ်တဲ့ လီဗာပူးလ်၊ မန်ယူ၊ ဘာစီလိုနာနဲ့ PSG အသင်းတို့ က ပစ်မှတ်ထားနေကြတယ်။ သူက ဒီရာသီမှာမှ ဖရန့်ဖတ်အသင်းနဲ့အတူ တောက်ပလာသူဖြစ်ပြီး ဥရောပထိပ်သီးအသင်းတွေရဲ့ စိတ်ဝင်စားခြင်းကို အချိန်တိုအတွင်း ခံခဲ့ရတယ်။ အိုမာမာမွတ်ရဲ့ ယခုရာသီ ဘွန်ဒစ်လီဂါ စွမ်းဆောင်ရည်ကလည်း အားရစရာ အရမ်းကောင်းတယ်။