မန်ယူတိုက်စစ်မှူးဟောင်း ဘာဘာတော့ဗ်က အသင်းနည်းပြ အာမိုရင်မ်အနေဖြင့် စပို့တင်းလစ္စဘွန်းတိုက်စစ်မှူး ဂျိုကယ်ရက်စ်အား မန်ယူအသင်းသို့ ခေါ်ဆောင်လာနိုင်ကြောင်း သုံးသပ်ပြောကြားခဲ့သည်။
စပို့တင်းလစ္စဘွန်းနည်းပြ အာမိုရင်မ်သည် မန်ယူနည်းပြအဖြစ် ခန့်အပ်ခံထားရပြီး နိုဝင်ဘာ (၁၁) ရက်တွင် မန်ယူအသင်းကို စတင်ကိုင်တွယ်မည်ဖြစ်သည်။
အသက် (၂၆)နှစ်အရွယ်ရှိ ဂျိုကယ်ရက်ဇ်သည် စပို့တင်းလစ္စဘွန်းနည်းပြ အာမိုရင်မ်လက်အောက်တွင် ခြေစွမ်းပြနေပြီး ပြီးခဲ့သည့် ၂၀၂၃-၂၄ ရာသီက ပြိုင်ပွဲစုံ ပွဲ (၅၀) တွင် (၄၃) ဂိုးအထိ သွင်းယူခဲ့သည်။
ထို့ပြင် ဂျိုကယ်ရက်စ်သည် ယခုရာသီတွင်လည်း စပို့တင်းလစ္စဘွန်းအတွက် ပြိုင်ပွဲစုံ (၁၇) ပွဲတွင် (၂၃) ဂိုးအထိ သွင်းယူထားရာ ၎င်းကို ခေါ်ယူရန် ဥရောပထိပ်တန်းအသင်းများစွာက စိတ်ဝင်စားနေကြောင်း သိရှိရသည်။
အာမိုရင်မ်က ၎င်းအနေဖြင့် လာမည့် ၂၀၂၅ ဇန်နဝါရီအပြောင်းအရွှေ့ကာလတွင် စပို့တင်းလစ္စဘွန်းကစားသမားများကို မန်ယူအသင်းထံသို့ ခေါ်ယူမည်မဟုတ်ဟု ပြောဆိုထားသည်။
သို့သော် ဘာဘာတော့ဗ်က အာမိုရင်မ်နှင့် ရင်းနှီးသည့်ဆက်ဆံရေးရှိသော ဂျိုကယ်ရက်စ်ကို အနာဂတ်တွင် မန်ယူဂျာစီနှင့် မြင်တွေ့ရနိုင်ကြောင်း ပြောကြားခဲ့ခြင်းဖြစ်သည်။
ဘာဘာတော့ဗ်က "ဂျိုကယ်ရက်စ်က အခုအချိန်မှာ ဂိုးတွေကို အပျော်သွင်းနေသူပါ။ သူနဲ့ အာမိုရင်မ်တို့အကြား ထူးခြားတဲ့ဆက်ဆံရေးရှိတယ်လို့ ထင်ပါတယ်။ ဒီတော့ တစ်နေ့မှာ သူ့ကို မန်ယူဂျာစီနဲ့ မြင်တွေ့ရနိုင်ပါတယ်"ဟု ပြောကြားခဲ့သည်။
