အငြင်းပွားဖွယ်မရှိ လိုက်ဟဲဗီးဝိတ်တန်း ချန်ပီယံခါးပတ်လေးခုစလုံးရရှိထားသူ ရုရှားလက်ဝှေ့သမား အော်တာဘီတာဘိဗ်အား ချန်ပီယံခါးပတ်ကာကွယ်ပွဲထိုးသတ်ရန် IBF (နိုင်ငံတကာလက်ဝှေ့အဖွဲ့ချုပ်) က ညွှန်ကြားထားကြောင်း သိရသည်။
ဘီတာဘိဗ် (၃၉ နှစ်) သည် အောက်တိုဘာ ၁၂ ရက်က ဆော်ဒီနိုင်ငံ၌ကျင်းပသည့် ချန်ပီယံခါးပတ်ပေါင်းစည်းပွဲတွင် ရုရှားတစ်နိုင်ငံတည်းသား ဒီမီထရီဘီဗောလ် (၃၃ နှစ်) ကို အမှတ်ဖြင့် အနိုင်ရပြီး WBC ၊ IBF နှင့် WBO ချန်ပီယံခါးပတ်များ ကာကွယ်နိုင်ခဲ့ သလို WBA (Super) ချန်ပီယံခါးပတ်ကိုပါ လွှဲပြောင်းရယူနိုင်ခဲ့သည်။
ဘီတာဘိဗ်သည် ၂၀၀၂ ခုနှစ်က WBA ၊ WBC ၊ IBF ချန်ပီယံခါးပတ်သုံးခုရရှိဖူးသည့် အမေရိကန်လက်ဝှေ့သမား ရွိုင်းဂျုံးစ်ဂျူနီယာနောက်ပိုင်း ပထမဆုံး အငြင်းပွားဖွယ်မရှိ လိုက်ဟဲဗီးဝိတ်တန်း ချန်ပီယံဖြစ်လာသလို ခါးပတ်လေးခုချီးမြှင့်ကာလတွင် ခါးပတ်အားလုံးရယူနိုင်သည့် ပထမဆုံးကစားသမားအဖြစ်လည်း မှတ်တမ်းဝင်ခဲ့သည်။
ဘီဗောလ်က ဘီတာဘိဗ်နှင့် မကျေပွဲ ထိုးသတ်ခွင့်ပြုရန်အတွက် ကူညီပေးရန် ရှေ့နေဖြစ်သူမှတစ်ဆင့် WBO ၊ WBA ၊ IBF ၊ WBC တို့ထံ အောက်တိုဘာ ၁၆ ရက်တွင် အကြောင်းကြားစာ ပေးပို့ခဲ့သည်။ သို့သော် IBF က ဘီတာဘိဗ်အား ချန်ပီယံခါးပတ် အတွက် နံပါတ် ၁ စိန်ခေါ်သူဖြစ်သည့် ဂျာမနီ လက်ဝှေ့သမား မီချာအယ်အိုင်းဖက်နှင့် ထိုးသတ်ရန် တရားဝင်ညွှန်ကြားခဲ့ခြင်းဖြစ်သည်။
ယခင်ကလည်း အလားတူအခြေအနေကြုံတွေ့ဖူးပြီး ဟဲဗီးဝိတ်တန်း ခါးပတ်လေးခုပိုင်ရှင် အိုလက်ဇန္ဒားအူဆိုက်မှာ တိုင်ဆန်ဖျူရီနှင့် မကျေပွဲထိုးသတ်လိုသဖြင့် IBF ချန်ပီယံခါးပတ် လက်လွှတ်ခဲ့ရသည်။
