မျက်မှောက်ကာလမှာ ဥရောပထိပ်သီးအသင်းတွေရဲ့ တိုက်စစ်အတွဲအဖက်ကောင်းတွေကို တဖြည်းဖြည်း ပြန်မြင်လာရပြီလို့ ဆိုရပါမယ်။ ရီးယဲလ်မက်ဒရစ်မှာ အမ်ဘာပေ၊ ဗင်နီစီယပ်စ်၊ ဘယ်လင်ဟမ်။ လီဗာပူးလ်မှာ ဆာလာ၊ ဂျိုတာ၊ ဒီယက်စ်။ ချယ်လ်ဆီးမှာ ပါလ်မာ၊ ဂျက်ဆင်၊ ဆန်ချို။ အာဆင်နယ်မှာ ဆာကာ၊ ဟာဗက်ဇ်၊ မာတင်နယ်လီ အစရှိသဖြင့် အတွဲအဖက်ကောင်းများစွာကို မြင်လာရတယ်။ ဒါ့အပြင် ဘိုင်ယန်မြူးနစ်၊ ဘာစီလိုနာတို့ ပိုင်ဆိုင်ထားတဲ့ တိုက်စစ်အစုအဖွဲ့ကလည်း အားရစရာကောင်းတယ်။ ဒါပေမဲ့ ဥရောပဘောလုံးကမ္ဘာကို သူတို့အနေနဲ့ ဘယ်လောက်အထိ လွမ်းမိုးနိုင်မလဲဆိုတာကိုတော့ ဆက်လက်စောင့်ကြည့်ရမှာပါ။ ဒါကြောင့် (၂၁)ရာစုအတွင်း ဘောလုံးကမ္ဘာက ပရိသတ်တွေကို ဖမ်းစားနိုင်ခဲ့ကြတဲ့ ထိတ်ထိတ်ကြဲတိုက်စစ်အတွဲအဖက်တွေကို ဖော်ပြလိုက်ပါတယ်။