ထိုင်း-မြန်မာနယ်စပ် တာ့ခ် ခရိုင် မဲဆောက် မြို့နယ် မဟာဝန်ကျေးရွာ အနီးတွင် မြန်မာနိုင်ငံဘက်မှ တရားမဝင် ဝင်ရောက်လူသူ တရုတ်နိုင်ငံသား ၁၂ ဦး အား ထိုင်း နိုင်နိုင်ငံတာဝန်ရှိသူများက ဇူလိုင် ၂၃ တွင် ဖမ်းဆီး ရမိခဲ့ကြောင်းသိရသည်။
ထိုင်းနိုင်ငံ၊ တာက်ခ်ခရိုင်၊ မဲဆောက်မြို့နယ် ရဲတပ်ဖွဲ့ (မဟာဝန်ကျေးရွာ အုပ်စု ရဲကင်း) သည် ရာချာမနူး စစ်ကြောင်းနှင့် ဒေသဆိုင်ရာ အုပ်ချုပ်ရေးအဖွဲ့များ ပူးပေါင်း၍ မဟာဝန်ကျေးရွာအုပ်စု၊ အကွက် (၂)၊ ဖာခွမ်ကျေးရွာ (မဲကုန်းကိန်းကျေးရွာ) ရှိ ပြောင်းခင်းအတွင်း သို့ ဝင်ရောက်စစ်ဆေးစဉ် ဖမ်းဆီရမိခဲ့ခြင်းဖြစ်သည်။
အဆိုပါ ပြောင်းခင်းတွင် မသင်္ကာဖွယ် လူစုကို တွေ့ရှိကြောင်း သတင်းပေးပို့ချက်အရ သွားရောက်စစ်ဆေးခဲ့ရာပြောင်းခင်းအတွင်း ပုန်းအောင်းနေသည့် တရုတ်နိုင်ငံသား ၁၁ ဦးကို စစ်ဆေးတွေ့ရှိခဲ့ပြီး ၎င်းတို့အနက် ၁၀ ဦးမှာ မည်သည့် အထောက်အထားစာရွက်စာတမ်းမှ မရှိဘဲ ၁ ဦးတွင်သာ ပတ်စပို့ စာရွက်စာတမ်း ပါရှိသည်ကို တွေ့ရှိရသည်။ ဘာသာပြန် အက်ပလီကေးရှင်း (App) မှတစ်ဆင့် စစ်ဆေးမေးမြန်းရာတွင် ၎င်းတို့အားလုံးသည် မြန်မာဘက်ခြမ်းမှ နယ်စပ်ကို တရားမဝင် ခိုးကူးလာခြင်းဖြစ်ကြောင်း ဝန်ခံခဲ့ကြသည်။
ထို့ပြင် အဖွဲ့ ၃မှ မဲကုကျေးရွာအုပ်စုရှိ လမ်းဘေးတွင် လမ်းလျှောက်နေသည့် တရုတ်နိုင်ငံသား ၁ ဦးကိုလည်း ထပ်မံတွေ့ရှိခဲ့သဖြင့် စုစုပေါင်း တရုတ်နိုင်ငံသား ၁၂ ဦးကို ထပ်မံ၍ထိန်းသိမ်းနိုင်ခဲ့သည်။
လက်ရှိတွင် သက်ဆိုင်ရာ စစ်ဘက်ဆိုင်ရာ တာဝန်ရှိသူများက အဆိုပါ ဖမ်းဆီးရမိသူများအား တာ့ခ်ခရိုင် လူဝင်မှုကြီးကြပ်ရေးဌာန (တောမော) ထံ စနစ်တကျ လွှဲပြောင်းပေးအပ်ထားပြီး ဥပဒေအတိုင်း ဆက်လက် အရေးယူဆောင်ရွက်နိုင်ရေးနှင့် ကွင်းဆက်များကို ကွင်းဆင်းစစ်ဆေးသွားမည်ဖြစ်ကြောင်း သိရသည်။
