သောင်ရင်းမြစ်ရေကျသွားသော်လည်း မြဝတီမြို့တွင်း၌တင်ကျန်ရစ်သောအမှိုက်များ ရွှံနွံနုန်းများရှင်းလင်းနေရဆဲဖြစ်ပြီး စာသင်ကျောင်းအချို့လည်း ပိတ်ထားဆဲဖြစ်ကြောင်း သိရသည်။
ဒေါနတောင်ခြေရှိ ဝေါလေချောင်း၊ ဂေါ်လီချောင်း၊ မဲကလာချောင်းတို့ပေါင်းဆုံစီးဆင်းလာသည့် သောင်ရင်းမြစ်ရေသည် စက်တင်ဘာလ ၁၀ ရက်နေ့မှ စတင်ကာ စက်တင်ဘာ ၁၂ ရက်နေ့ထိ မြဝတီမြို့ပေါ်ရပ်ကွက် (၅) ရပ်ကွက်၊ အမြင့်ပိုင်းဘုရင်နောင်လမ်းမထိရေလွှမ်းမိုးကာ အနိမ့်ပိုင်းနေရာများ၌ တစ်ခပ်အိမ်ခေါင်မိုးထိနစ်မြုတ်ခဲ့သည်။
စက်တင်ဘာ ၁၂ ရက်တွင် ရေကျသွားသော်လည်း မြို့တွင်းလမ်းများ၊နေအိမ်များ၊စာသင်ကျောင်းများတွင်အမှိုက်သရိုက်များနှင့်း ရွှံ့နွံများ များစွာတင်ကျန်ရစ်ခဲ့သည့်အတွက် မြို့နယ်စည်ပင်သာယာရေးအဖွဲ့၊ ရဲတပ်ဖွဲ့၊ DKBA တပ်ဖွဲ့ဝင်များ၊မီးသတ်တပ်ဖွဲ့ဝင်များ၊မြဝတီဖောင်ဒေးရှင်း၊ပရဟိတအဖွဲ့ များနှင့် ရပ်ကွက်နေပြည်သူများက ရှင်းလင်းနေရဆဲဖြစ်သည်။
မြဝတီဖောင်ဒေးရှင်းမှ ထွန်စက်တစ်စီး၊ ဘက်ဟိုးတစ်စီး ၊အမှိုက်တင်ယာဉ်ငါးစီးဖြင့် အမှတ်(၃) ရပ်ကွက်ရှိ အ.ထ.က(၂) စာသင်ကျောင်းနှင့် ပတ်ဝန်းကျင်၊မိုးကုတ်စက်ဝိုင်းဘုန်းတော်ကြီးကျောင်း ပတ်ဝန်းကျင်တို့တွင် ရွှံ့နွံ အမှိုက်ရှင်းလင်းရေးဆောင်ရွက်လျှက်ရှိသည်။
ဇူလိုင်နောက်ဆုံးအပတ်က ရေကြီးရေလျှံဖြစ်ပွားခဲ့စဉ်ကလောက် အမှိုက်သရိုက်များသော်လည်း ရွှံ့နွံများမှာ ယခင်အကြိမ်ကထက်များ ပြားကြောင်း မြဝတီဖောင်ဒေးရှင်းက တာဝန်ရှိသူတစ်ဦးက ပြောသည်။
ထို့အတူ မြဝတီခရိုင်ရဲတပ်ဖွဲ့မှူးဦးစီးသည့်ရဲတပ်ဖွဲ့ဝင်များ၊စည်ပင်သာယာရေးအဖွဲ့ဝင်များ၊မီးသတ်တပ်ဖွဲ့ဝင်များ ၊ DKBA တပ်ဖွဲ့ဝင်များ၊ပရဟိတအဖွဲ့များက အမှတ်(၂)ရပ်ကွက်ရှိ အမှတ်(၁)အခြေခံပညာအထက်တန်းကျောင်းခွဲနှင့် ပတ်ဝန်းကျင်လမ်းအား စုပေါင်းရှင်းလင်းလျှက်ရှိသည်။
မြဝတီ မြို့တွင် နှစ်စဉ်ရေကြီးရေလျှံခြင်းဖြစ်ပေါ်ခဲ့သော် ယခုနှစ်တွင် ထူးခြားစွာဖြင့် နှစ်ကြိမ်မြောက်ရေကြီးနစ်မြုတ်ခဲ့ခြင်းဖြစ်သည်။ဒုတိယအကြိမ်သည် ပထမအကြိမ်ထက် ပိုမို ရေတက်ခဲ့ကြောင်းသိရသည်။
