PSG အသင်းနှင့် လမ်းခွဲပြီး ရီးယဲလ်အသင်းသို့ ပြောင်းရွှေ့ခဲ့သည့် ပြင်သစ်တိုက်စစ်မှူး ဘာပေသည် လာလီဂါ၏ လစာအများဆုံးကစားသမားစာရင်းတွင် တတိယနေရာသာ ရပ်တည်နိုင်ခဲ့ကြောင်း သိရသည်။
ပြီးခဲ့သည့်တစ်ပတ် အင်္ဂါနေ့က ရီးယဲလ်အသင်း၏ ကစားသမားသစ်အဖြစ် မိတ်ဆက်ပွဲပြုလုပ်ခဲ့သည့် ဘာပေသည် ရီးယဲလ်အသင်း၌ တစ်နှစ်လစာ ပေါင်(၂၆.၃)သန်းသာ ရရှိမည်ဖြစ်သည့်အတွက် တတိယနေရာတွင်သာ ရပ်တည်နိုင်ခြင်းဖြစ်သည်။
တစ်နှစ်လစာ ပေါင်(၃၁.၆)သန်းရရှိသည့် ဘာစီလိုနာကွင်းလယ်ကစားသမား ဒီယွန်းက လာလီဂါ၏ လစာအများဆုံးကစားသမားအဖြစ် ဆက်လက်ရပ်တည်ခဲ့ပြီး ဘာစီလိုနာတိုက်စစ်မှူး လီဝန်ဒေါစကီးက တစ်နှစ်လစာပေါင်(၂၈.၂)သန်းဖြင့် ဒုတိယနေရာတွင် ရပ်တည်လျက်ရှိသည်။
ရီးယဲလ်အသင်းသည် ဘာပေကို လစာနှုန်းထားထက် ပုံရိပ်မူပိုင်ခွင့်အတွက် ရာခိုင်နှုန်းပိုမိုပေးအပ်ကာ စာချုပ်ချုပ်ဆိုထားခြင်းဖြစ်သောကြောင့် ၎င်းအနေဖြင့် လစာအများဆုံးကစားသမား ဖြစ်မလာခြင်းဟုလည်း သိရသည်။
ရီးယဲလ်အသင်းသည် လာလီဂါ၏ စည်းမျဉ်းနှင့်အညီ လစာထိန်းချုပ်မှု ပြုလုပ်ထားခြင်းဖြစ်သော်လည်း လာလီဂါ၏ လစာအများဆုံးကစားသမား (၁၀)ဦးစာရင်းတွင်မူ ရီးယဲလ်ကစားသမား (၆)ဦးပါဝင်ကာ အများဆုံးဖြစ်ခဲ့ကြောင်းသိရသည်။ ယင်းစာရင်းတွင် ဘာစီလိုနာမှ (၃)ဦး၊ အက်သလက်တီကိုမှ (၁)ဦး ပါဝင်ခဲ့သည်။
